အုတ်ကို အရာဝတ္တုအမျိုးမျိုးမှ ပြုလုပ်နိုင်၍ အများအားဖြင့် မြေစေး clay ဖြင့် ပြုလုပ်သည်။ ကောင်းမွန်သော မြေစေးတွင် alumina(Al2O3) ၊ သဲ silica or sand (SiO2)၊ သဲအောက်ဆိုက် oxide of iron (Fe2O3)၊ ထုံးသို့မဟုတ် မြေဖြူ Lime or chalk (CaCo3) တို့ပါဝင်ပြီး အခြား Magnesia, sodium, potassium စသည်တို့ အနည်းငယ်ပါဝင်သည်။

မြေစေးတွင် alumina 25% မှ 30% အထိပါဝင်သင့်သည်။ Alumina သည်မြေစေးအား ပျော့ပြောင်းသိပ်သည်းစေသည်။ သို့ရာတွင် လိုအပ်သည်ထက်ပိုပါက အုတ်အခြောက်လှမ်းစဉ်ရာတွင် ကျုံ့ဝင်ခြင်း၊ လိမ်ကောက်ခြင်း ဖြစ်ပေါ်စေနိုင်သည်။ သဲပါဝင်သည့် ရာခိုင်နှုန်း မှာ 50-75% ဖြစ်ပြီး မြေစေးအား မာစေနိုင်သဖြင့် ခုံးခွက်ကောက်ကွေးခြင်းနှင့် ကွဲအက်ခြင်းတို့မှ ကာကွယ်နိုင်သည်။ သို့သော် များလွန်းပါက ကျွတ်ဆတ်ပြီး ကျိုးပဲ့လွယ်သည်။

ထုံးမှုန့်သည် မြေစေးတွင် ပါဝင်သည့် အရာဝတ္တုများကို စေးကပ်နေစေရန် ချုပ်ကိုင်ထားပြီး အုတ်၏အရောင်ကို ဖျော့စေနိုင်၏။ များလွန်းလျှင်မူ အုတ်ဖုတ်သောအခါ ပုံသဏန် ပြောင်းလဲသွားတတ်၏။ Oxide of iron နှင့် magnesia တို့အနည်းငယ် ပါဝင်ခြင်းသည် အုတ် ကို နီညိုရောင်နင့် အဝါရောင်ဖြစ်စေသည်။ သို့ရာတွင် များလွန်းပါက အုတ်ကို ပျက်စီးစေနိုင်သည်။ ဆားသည် လေထုမှ ရေခိုးရေငွေ့များကို စုပ်ယူူသော သတ္တိရှိသည်။

အုတ်ဖြစ်ရန် အဆင့်ဆင့်ပြုလုပ်နည်းများ.....

အုတ်ပြုလုပ်ရာတွင် အဆင့်လေးဆင့်ရှိသည်။ ယင်းတို့မှာ-

၁။ အုတ်ပြုလုပ်ရန် မြေစေးရွေးချယ်တူးဖော်ခြင်းနှင့် ပြင်ဆင်ခြင်း

၂။ ပုံသွင်းခြင်း

၃။ အခြောက်လှန်းခြင်း

၄။ မီးဖုတ်ခြင်း  စသည်တို့ဖြစ်သည်။

အုတ်ပြုလုပ်ရန်မြေစေးရွေးချယ်တူးဖော်ခြင်းနှင့် ပြင်ဆင်ခြင်း

မြန်မာပြည်တွင် များသောအားဖြင့် လယ်ကွက်များမှ သင့်တော်သော မြေစေးများကို ရွေးချယ်ပြီး အုတ်ဖုတ်ကြသည်။ အုတ်ဖုတ်ရန် မြေစေး ရွေးချယ်ရာ၌ ဆားဓာတ်ပါရှိပါက အုတ်ကို ရေစိုလျှင် ဆားပွင့်များ ပေါ်ထွက်လာကာ plastering ပြုလုပ်ရာ တွင်ခက်ခဲသဖြင့် ဆားငံရည် ရောက်သောနေရာများမှမြေကို ရှောင်ရှားရမည်။ မြေစေးများကို မတူးဖော်မီ အပေါ်ယံရှိ အမှိုက်သရိုက်နှင့် မကောင်းသော မြေလွှာများကို ဖယ်ရှားပြီး ကောင်းသောမြေစေးကို မြေတူးစက်ဖြင့် တူးဖော်ကာ မြေသယ်ကားများဖြင့် မြေကြိတ်စက် ရှိရာသို့ သယ်ယူရလေသည်။

၎င်းနောက် မြေကြီးတွင် ပါလာသော အမှိုက်သရိုက်နှင့် ကျောက်ခဲများကို ဖယ်ပစ်၍ ကျန်မြေကြီးများကို မြေကြိတ်စက် pan grinder ထဲသို့ထည့်၍ ကြေအောင် ကြိတ်ပစ်ရလေသည်။ တဖန် ၎င်းကြိတ်စက်ဖြင့် ကြိတ်ပြီးသော မြေကြီးများကို ရေဖြင့် ရောစပ်ရန် pugging mill ထဲသို့ ထည့်၍ ရေထည့်ပြီးလျှင် မြေကြိးနှင့် ရေသမ သွားအောင် လိုအပ်သည့် အချိုးအဆ အတိုင်းရေပါဝင်စေရန် စီမံပေးရ လေသည်။ ရေများသွားပါက ပုံသွင်းရာတွင် ခဲယဉ်းသဖြင့် သတိထားရမည်။ ဤကဲ့သို့ ပြုပြင်ပြီးသော ရွှံ့စေးများကို ပုံသွင်းလောင်းသော နေရာသို့ ပို့ဆောင် ရလေသည်။

ပုံသွင်းခြင်း

ရေဖြင့် သမအောင် နယ်ပြီးသော ရွှံ့စေးများကို လက်အားဖြင့်လည်းကောင်း၊ စက်အားဖြင့်လည်းကောင်း၊ ပုံသွင်းနိုင်လေသည်။ ရွှံ့စေးများကို ပုံသွင်းသောအခါ အုတ်ပုံသဏ္ဍာန်ဖြစ်အောင် ပြုလုပ်ရသည်။ ယင်းအုတ်ပုံသဏ္ဍာန် ရွှံ့တိုးများသည် မီးဖုတ်သောအခါ ကြုံလှီသွားသောကြောင့် မီးမဖုတ်မီ အရွယ်အစား အလိုက် 1/8" မှ 1/10" ထိ ပို၍ ကြီးထားရသည်။ လက်ဖြင့် ပုံသွင်းရာတွင် အောက်၌ လိုအပ်သည့်ပုံစံ frog ပါသည့် သစ်သားပြားခံ၍ ပုံစံခွက် wooden mould တင်ကာ ရွှံ့တုံးကို ပေါက်ထည့်ပြီး ဝါယာ ကြိုးဖြင့် ဖြတ်ယူပါက လိုအပ်သည့် ပုံစံရရှိလေသည်။

Pugging mill မှ ရေဖြင့် သမအောင် နယ်ပြီးသော ရွှံ့စေးများကို လွန်ဖြင့် ပုံသွင်းသောစက် auger brick machine ထဲသို့ ထည့်ရ၏။ ယင်းစက်၏ ထွက်ပေါက် dieမှ လေးထောင့်ပုံသဏ္ဍာန် ရွှံ့စေးချောင်းသည် လွန်သွားများ လှည့်ထုတ်မှုကြောင့် အပြင်သို့ ထွက်လာသေသည်။ ထိုရွှံ့စေးချောင်းအား ဖြတ်စက် cutting machine သို့ သယ်ယူပို့ဆောင်၍ အုတ်ပုံသဏ္ဍာန် ကလေးများဖြစ်အောင် ထပ်မံ ဖြတ်ထုတ်ရ၏။

အခြောက်လှန်းခြင်း

ပုံသွင်းပြီးသော အုတ်များအား မီးမဖုတ်မီ ဥိးစွာ အခြောက်လှမ်းရလေသည်။ အခြောက်လှမ်းရခြင်း၏ ရည်ရွယ်ချက်မှာ ပျော့နေသာ အုတ်များကို ပုံသဏ္ဍာန် ပြောင်းလဲသွားခြင်း မဖြစ်စေရန်နှင့် မီးဖုတ်ရန် မီးဖိုထဲတွင် စီသောအခါ စီသောအခါ ပွန်းပဲ့ခြင်း မဖြစ်ပေါ်စေရန် ဖြစ်လေသည်။

လေသလပ်ခံ၍ အခြောက်လှမ်းခြင်း

မိုးနည်းပါး၍ ရာသီဥတုကြည်လင်သော အရပ်ဒေသများတွင် လေသသပ်ခ့၍ အခြောက်လှမ်းနည်းကို အသုံးပြုသင့်သည်။ ဤနည်းတွင် ပုံသွင်းပြီးသောအုတ်များကို မြေတလင်းတွင်ဖြစ်စေ၊ အကာမပါသည့် တဲများတွင်ဖြစ်စေ၊ လေဝင်ထွက်သွားလာနိုင်စေရန် စနစ်တကျစီပြီး အခြောက်ခံထားရသည်။ ရာသီဥတု အခြေအနေအရ ၂ရက်မှ ၅ရက်ခန့်အထိ ဤသို့ ပြုလုပ်ပေးခြင်းအားဖြင့် ခြောက်သွေ့စေနိုင်သည်။

လေပူပေး၍ အခြောက်လှမ်းခြင်း

စက်ဖြင့် ပုံသွင်း၍ရသော အုတ်များကို များသောအားဖြင့် စက်ရုံတွင်မှာပင် လေပူများဖြတ်သွားစေရန် ပြုလုပ်ပေးသောနည်းဖြင့် ခြောက်သွေ့စေသည်။ ဤနည်းတွင် မီးဖုတ်ပြီးသော အုတ်များအား အအေးခံထားသည့် အခန်းမှ အပူရှိန်ကို ပန်ကာဖြင့်စုတ်ယူ၍ ပုံသွင်းပြီးအုတ်များ စီထားသော အခန်းတွင်းသို့ပို့ပေးခြင်းဖြင့် ခြောက်သွေ့စေလေသည်။

အုတ်အမျိုးအစားနှင့် ရေပါဝင်သည့် အချိုးအဆကိုလိုက်၍ ၃ရက်မှ ၅ရက်ခန့်အထိ အချိန်ကြာမြင့်လေသည်။ မည်သည့်နည်းဖြင့် အခြောက်လှမ်းသည်ဖြစ်စေ လျင်မြန်စွာ ခြောက်သွေ့စေပါက ကွေးကောက်ခြင်း၊ ကွဲအက်ခြင်းများ ဖြစ်ပေါ်တက်သဖြင့် သတိထားရမည်။

မီးဖုတ်ခြင်း

အုတ်ပြုလုပ်ရာတွင် မီးဖုတ်ခြင်းသည် နောက်ဆုံးအဆင့်ဖြစ်၏။ မီးဖုတ်ရာတွင် အပူရှိန်ညီမျှစွာ ပေးမှသောကောင်းမွန်သော အုတ်ကို ရရှိနိုင်သည်။ အုတ်ဖုတ်ရန်လိုအပ်သော ပျမ်းမျှအပူချိန်မှာ သာမန်အုတ်များကို မြေအမျိုးအစားနှင့် ရေအချိုးအစားကိုလိုက်၍ 850°C မှ 1500°C အထိ အပူပေးရသည်။ အထူးမီးခံအုတ်များကို အပူပေးရာတွင် 1400°C မှ 1500°C အထိ အပူပေးရလေသည်။ မီးဖုတ်ရာ၌ နည်းအမျိုးမျိုးဖြင့် ဖုတ်နိုင်ပြီး အဓိကအားဖြင့် temporary kiln ခေါ် ယာယီမီးဖိုဖြင့် အုတ်ဖုတ်နည်းနှင့် Hoffman ring kilnခေါ် ခေတ်မီ မီးဖိုများဖြင့် အုတ်ဖုတ်နည်းစနစ်မျိုးကို အသုံးပြုလေ့ရှိသည်။

ယာယီမီးဖိုဖြင့် အုတ်ဖုတ်ခြင်း

အခြောက်လှမ်းပြီးသော အုတ်များအား နေရာခွဲ၍ စီထားပြီးလျှင် အပြင်မှ အုတ်ကျိုးများ ရွှံ့သရွတ် mud plastering ဖြင့် မွန်းမံ ကာရံ ထားရသည်။ အဘယ်ကြောင့်ဆိုသော် အတွင်းမှ လေပူများ အပြင်သို့ မထွက်စေရန်ပင် ဖြစ်၏။ ၎င်းနောက် မိးဖို၏ အောက်ပိုင်းရှိ ပေါင်းကူးပုံ အပေါက်များမှ မီးသွေးများ ထည့်ကာ လောင်ကျွမ်းစေသောအခါ လေပူများသည် အတွင်းရှိ အုတ်များကို ဖြတ်၍ မီးခိုးခေါင်းတိုင်မှ ထွက်သွားလေသည်။

ဤကဲ့သို့ တစ်ပတ်ခန့် မီးဖုတ်ပြီးနောက်ရက် အနည်းငယ် အအေးခံ၍ အုတ်များကို ထုတ်ယူရန် ဖိုကို ဖျက်ပစ်ရလေသည်။ ယာယီမီးဖိုဖြင့် အုတ်ဖုတ်ခြင်းသည် တစ်ခါတစ်ရံ မီးလောင်းကျွမ်းမှု မညီမျှသဖြင့် ကောင်းမွန်သော အုတ်များကို ရရန် မလွယ်ကူချေ။ ထို့အပြင် တစ်ခါ မီးဖုတ်ပြီးတိုင်း ဖိုများကို ဖျက်ပစ်ရသောကြောင့် အလုပ်လုပ်ရာ၌ အချိန်ကြာမြင့်ပြီး ငွေကြေး ပိုမိုကုန်ကျနိုင်သည်။ ဤနည်းဖြင့် မီးဖုတ်ခြင်းကို clamp burning ဟူ၍လည်းခေါ်သည်။

ပထမတန်းစားအုတ်၏ ဂုဏ်အင်္ဂါရပ်များ.....

၁။ ကောင်းမွန်သော အုတ်များသည် အပူရှိန်ညီ၍ ကောင်းစွာလောင်းကျွမ်းပြီး နီမြန်းသောအရောင်ရှိသည်။

၂။ အုတ်၏ နံဘေးစောင်းများထက်နေ၍ တွန့်လိမ်ကွဲအက်ခြင်းများ မရှိစေရ။

၃။ အုတ်ကို ချွန်ထက်သော အရာဝတ္တုနှင့် ခြစ်ကြည့်ပါက အရာမထင်ခြင်း။

၄။ အုတ်နှစ်ချပ်ကို ရိုက်ခတ်ကြည့်သောအခါ ကြည်လင်ပြတ်သားသော အသံပေါ်ထွက်လာခြင်း။

၅။ အုတ်ကို ရေတွင် ၁နာရီမှ ၂နာရီခန့် စိမ်ထားပါက အုတ်အလေးချိန်၏ ၆ပုံ ၁ပုံ မှ ၄ပုံ ၁ပုံ ရှိသောရေကို စုတ်ယူနိုင်ခြင်း။

၆။ အုတ်ကို ဖိနှိပ်ကြည့်ပါက တစ်စတုရန်းပေသည် တန်ချိန် ၅၀ အလေးခံနိုင်ခြင်း။

၇။ အုတ်တစ်ချပ်ကို ၂ပေခွဲ သို့မဟုတ် ၃ပေခန့်ရှိသော အမြင့်မှ မြေပြင်သို့ လွတ်ချကြည့်ပါက ကွဲအက်မှု မရှိခြင်း စသည်တို့ဖြစ်ကြညသည်။

ဒုတိယတန်းစား အုတ်မှာ အကွဲအအက် အနည်းငယ်စီ ပါရှိတတ်ပြီး တတိယတန်းစား အုတ်များမှာ ပထမတန်းနှင့် ဒုတိယတန်းစား အုတ်များကို ရွေးချယ်၍ ကျန်သော အုတ်များဖြစ်သည်။

အုတ်အမျိုးအစားများ

သာမန်ရိုးရိုးအုတ်

သာမန်အဆောက်အအုံများတွင်သုံးသော ရိုးရိုးအုတ်များကို မြန်မာနိုင်ငံအနှံ့အပြားတွင် တွေ့ရှိနိုင်သည်။ လယ်ကွက်အတွင်းမှ တူးဖော်ရရှိသော မြေးစေးတို့ဖြင့် ပြုလုပ်ပြီး အရပ်ဒေသလိုက်၍ အုတ်ပုံစံနှင့် အရွယ်အစား အနည်းငယ် ပြောင်းလဲမှုရှိသသည်။

သို့ရာတွင် အများဆုံး ထုတ်လုပ်သော အုတ်တချပ် အရွယ်အစားမှာ ၁/၄ လက်မမှ ၃/၈ လက်မ ထူသော အင်္ဂတေဆက်ကြောင်း တစ်ကြောင်း၏ အထူ အပါအဝင် အလျား ၉လက်မ၊ အနံ ၄-၁/၂ လက်မနှင့် အထူ၃လက်မဖြစ်၏။ အလျား၉လက်မနှင့် အနံ ၄-၁/၂လက်မရှိ အုတ်ချပ်မျက်နှာပြင် တဖက်တွင် frog ခေါ် ချိုင့်ခွက်ကလေးများပါရှိတတ်ရာ ယင်းတို့သည် အုတ်ချပ်ကို ကိုင်တွယ်ရာ၌ လွယ်ကူပေါ့ပါးစေသည့်အပြင် အုတ်တစ်ချပ်နှင့် တစ်ချပ်အကြားရှိ အင်္ဂတေ ဆက်ကြောင်းများကို ပိုမိုဆက်စပ် ခိုင်မြဲစေနိုင်သည်။ အုတ်နံရံများစီသောအခါ ချိုင့်ခွက်ကလေးများ ပါသော အုတ်မျက်နှာပြင်ကို အပေါ်မှထား၍ စီရသည်။

မီးခံအုတ်

မီးအပူဒဏ်ခံနိုင်သော ရွှံ့စေးမြေတစ်မျိုးမှ ထုတ်ယူရရှိသည်။ ယင်းမြေစေးတွင် သဲကျောက် (silca rock) ၅၅% မှ ၇၇%နှင့် အလျူမီနာ ၂၂%မှ ၃၅% အထိ ပါဝင်ပြီး အပူရှိန် ၁၄၀၀°C တိုင်အောင် မီးဖုတ်ပေးခြင်းဖြင့် မီးခံအုတ်များကို ရရှိနိုင်သည်။ မီးအပူရှိန် 2000°C အထိခံနိုင်သော အုတ်ကို ရရှိလျှင် သဲကျောက်မှုံ့ sand stone၊ သလင်းကျောက်မှု့ံ့ Quartzite 95% မှ ၉၇%နှင့် ထုံး lime တို့ကို ရောစပ်လျက် ဖိနှိပ်သွင်း ယူနိုင်လေသည်။ မီးခံအုတ်များကို ဘွိုင်လာအိုး၏ အောက်ခံခုံများ flurnace ခေါ်မီးဖိုများနှင့် အခြားအပူဒဏ်ခံရန် လိုအပ်သော နေရာများတွင် ထည့်သွင်း အသုံးပြုသည်။

ကြွေရည်သုတ်အုတ်

မီးခံသည့် မြေစေးတစ်မျိုးအား ပုံသွင်းပြီး သင့်တော်သောကြွှေရည် သို့မဟုတ် ချော်ရည်များ သုတ်လိမ်း၍ မီးဖုတ်ခြင်းဖြင့် ရရှိနိုင်သည်။ ယင်းအုတ်များအား ရေတိုက်စားခြင်း၊ အက်ဆစ်များ ထိတွေ့ခြင်းတို့မှ ကာကွယ်ရန်နှင့် မျက်နှာပြင်ချောမွေ့ လှပစေရန် glazing ပြုလုပ်ပေးရသည်။ Glazing ပြုလုပ်နည်း သုံးမျိုးရှိ၏။

(က) Natural Glazing အုတ်များကို အပူရှိန်များစွာ ပေးသောအခါ ရွှံ့စေးမှုန့်များ တစ်ခုနှင့်တစ်ခု အရည်ပျော် ပေါင်းစပ်သွားလေသည်။

(ခ) Common Salt Glazing အုတ်များဖုတ်သောအခါ ရိုးရိုးဆား common salt ကို အုတ်များပေါ်လို့ ပက်ဖျန်းပေးခြင်းဖြင့် အုတ်မျက်နှာပြင်ပေါ်တွင် ဓာတ်တုန့်ပြန်မှု chemical reaction ဖြစ်ပေါ်၍ ချောမွတ်သော အုတ်များကို ရရှိနိုင်သည်။

(ဂ) Glazing with Special Solution မိမိအလိုရှိရာအရောင်နင့် ကြွေရည်များကို မီးမဖုတ်မီ သုတ်လိမ်း၍ မီးဖုတ်ခြင်ဖြင့် လှပပြီး အရောင်အမျိုးမျိုးရှိသော အုတ်များကို ရရှိနိင်သည်။

အင်ဂျင်နီယာသုံးအုတ်

မီးအပူဒဏ်ပြင်းစွာ ခံနိုင်သည့် မြေစေးမျိုးကို ကျစ်လစ်သိပ်သည်းအောင် ပုံစံသွင်းယူ၍ မီးဖုတ်ခြင်းဖြင့် ရရှိနိုင်သည်။ အုတ်အရောင်မှာ အနည်းငယ် ပြာ၍ ရေစမစုပ်နိုင်သည့်အပြင် အလွန်မာကျောသော အုတ်တစ်မျိုးဖြစ်သည်။ ယင်းအုတ်များကို တံတားအောက်ခံတိုင်များ၊ သင်္ဘောဆိပ်ခံတိုင်ကြီးများနှင့် အခြားအလေးဝန် ခံနေရသော နေရာများတွင် အသုံးပြုကြလေသည်။

အပေါက်ကလေးများပါသောအုတ်

ပုံစံသွန်းလောင်းပြီး ရွှံ့စေးကို 3/8" မှ 5/8" အချင်းရှိသသည့် အပေါက်ကလေးများ (အနည်းဆုံး ၁၀ပေါက်မှ အများဆုံးအထိ) ဖောက်၍ မီးဖုတ်ခြင်းဖြင့် ရရှိသည်။ ယင်းအုတ်များသည် ရွှံ့စေးအကုန် သက်သာခြင်း၊ အခြောက်လှမ်းရာ၌ လည်းကောင်း၊ မီးဖုတ်ရာ၌ လည်းကောင်း လွယ်ကူလျင်မြန်ခြင်း၊ အလေးချိန်ပေါ့ပါး၍ စရိတ်အကုန်သက်သာခြင်း၊ အုတ်တစ်ချပ်နှင့်တစ်ချပ်အကြား အင်္ဂတေ ကောင်းမွန်စွာ စွဲမြဲခိုင်မာစေခြင်း စသော အကျိုးကျေးဇူးများကြောင့်များစွာ ထုတ်လုပ် အသုံးပြုလျက်ရှိသည်။

(ယခုအခါ ရန်ကုန်မြို့ အနီးရှိ ဒညင်းကုန်း အစိုးရ အုတ်ကြွစက်မှ ဤအုတ်မျိုးများကို ထုတ်လုပ်လျက် ရှိသည်။)

ခေါင်းပွအုတ်

၎င်းအုတ်များကို သာမန်အုတ်များ ပြုလုပ်သည့် မြေစေးမျိုးနှင့်ပင် ပြုလုပ်နိုင်သည်။ သို့ရာတွင် ရွှံ့စေးထဲ၌ ခဲလုံးကလေးများ မပါစေရန် အထူးဂရုပြုရမည်။ ပုံသွင်းရာ၌ ရွှံ့စေးတွင် လေများ မခိုအောင်းစေရန် လေစုပ်ယူနိုင်သည့် လွန်စက်များဖြင့် ပုံသွင်းရသည်။ သင့်လျော်သည့် အပေါက်များပါသောအုတ်ကို ဖိနှိပ်ပုံသွင်းယူပြီး မီးဖုတ်ခြင်းဖြင့် ခေါင်းပွအုတ်များ ရရှိနိုင်၏။ ဤအုတ်များကို အသုံးပြုခြင်းဖြင့်နံရံ အလေးချိန် ပေါ့ပါးခြင်း၊ အပူအအေးမျှတခြင်း၊ စွတ်စိုထိုင်းမှိုင်းခြင်းမှ ကာကွယ်ခြင်း၊ အသံလုံခြင်း စသောအကျိုးကျေးဇူးများကို ရနိုင်ပါသည်။

ပေါ့ပါး၍ ပွသောအုတ်

ဤအုတ်များမှာ diatomaceous earth ခေါ် မြေစေးတစ်မျိုးကိုသော်လည်းကောင်း၊ မီးလောင်ကျွမ်းသွားသည့် လွှစာ၊ စပါးခွံ၊ မီသွေးမှုန့် စသည့် ပစ္စည်းများကို မြေစေးနှင့် ရောစပ်၍လည်းကောင်း မီးဖုတ်ခြင်းဖြင့် ရရှိနိုင်လေသည်။ ယင်းအုတ်များကို ယာယီအုတ်စီခြင်း လုပ်ငန်းနေရာမျိုးတွင် အသုံးပြုသည်။

ဘိလပ်မြေနှင့် ရောစပ်သောအုတ်

သဲများသော မြေမျိုးတွင် ဘိလပ်မြေ ၅ ရာခိုင်နူန်းထက် မနည်းရော၍ ဖိနှိပ်စက်ဖြင့် ပုံသွင်းယူရလေသည်။ ဤအုတ်မျိုးကို မီးမဖုတ်ရပဲ အချိန် ၂ပတ်ကြာမျှ အဝတ်စိုများ အုပ်ထားခြင်းဖြင့် ဘိလပ်မြေအိပ်ပြီး မာကျောလာလေသည်။ ယင်းတို့ကို အတွင်းနံရံများ စီရာ၌ အသုံးပြုနိုင်သည်။

သဲနှင့် ထုံးရောစပ်သောအုတ်

သန့်ရှင်းသော သဲတွင် လတ်ဆတ်သည့် ထုံး ၁၀ရာခိုင်နှုန်းကို သမအောင် ရောစပ်ပြီး အားကောင်းသော ဖိနိပ်စက်ဖြင့် ပုံသွင်းယူရသည်။ ခိုင်မာလာစေရန် ပေါင်းအိုးတွင် 100 to 200 Ibs/sq-in အင်အားရှိသည့် ရေငွေ့ဖြင့် သုံးနာရီခန့်ထားရသည်။ အဆောက်အုံအတွင်း နံရံများတွင် အသုံးပြုလေ့ရှိသည်။

ဖတ်ရှုမှုအများဆုံး အိမ်ခြံမြေဗဟုသုတများ

ဘိလပ်မြေ၊ အုတ်၊ သဲ၊ ကျောက် ယေဘုယျ တွက်ချက်နည်း

PAE စနစ် နဲ့ အိမ်ဆောက်ခြင်း သိမှတ်ဖွယ်ရာ

အိမ်တွေမှာ အိမ်မြှောင်စုတ်ထိုးသံကြားရင်ဘာတွေဖြစ်မှာလဲ

အိမ်ခြံမြေ ဝယ်ယူလိုသူများ သတိပြုစရာ အိမ်မြေကို အပေါင်ထားမည်ဆိုလျှင်

Credit : Myanmar Builders Guide

Posted By : Sint Sint (ShweProperty.com)