''လာဗျာ ဦးသက်နိုင်''

စာရေးသူ၏ ရုံးခန်းတံခါးဝရှေ့တွင် ရောက်ရှိနေသော ဦးသက်နိုင်ကို စာရေးသူက လှမ်း၍ ခရီးဦးကြိုပြု လိုက်ခြင်းဖြစ်ပါသည်။

''မြို့တော် စည်ပင်ရုံးကိုလာရင်းနဲ့ တစ်ဆက်တည်း ဆရာ့ဆီ သတိရလို့ ဝင်လာလိုက်တာ''

''မိုးတွင်းကာလဆိုတော့ ဦးသက်နိုင်တို့လို အိမ် ခြံ မြေ အကျိုးဆောင်လုပ်ငန်းတွေ အရောင်းအဝယ်ပါးနေ မှာပေါ့''

''ထူးထူးခြားခြားတော့ အပြောင်း အလဲမရှိပါဘူး။ ပုံမှန်လေးပါပဲ''

''မကြာမီရက်ပိုင်းကထုတ်ပြန်ထားတဲ့ ၂ဝ၁၉ ခုနှစ် ပြည်ထောင်စု၏ အခွန်အကောက် ဥပဒေကြမ်းထွက်လာ တော့ စီးပွားရေးလောကမှာ လှုပ်လှုပ်ရှားရှားဖြစ်လာကြတယ်လို့ကြားတယ်။ အထူးသဖြင့် ဦးသက်နိုင်တို့လို အိမ် ခြံ မြေ အရောင်းအဝယ် ကိစ္စတွေမှာ အခွန်နှုန်းတွေ ပြောင်းလဲသွားတယ်လို့ သိရတယ်''

''ဟုတ်ကဲ့ ဆရာ၊ အခွန်အကောက် ဥပဒေကြမ်းမှာဖော်ပြချက်အတိုင်း အတည်ပြု ပြဋ္ဌာန်းပေးရင်တော့ အိမ် မြေ ဝယ်သူတွေအနေနဲ့ ဝယ်ခွန်ဆောင်ဖို့ အခြေအနေတွေရှိလာနိုင်ပါတယ်''

''အခွန်နှုန်းတွေ မြင့်နေတော့ အမှန်တကယ်နေထိုင်ဖို့ စုဆောင်းဝယ်သူအနေနဲ့ ဝန်ထုတ်ဝန်ပိုးတစ်ခု ဖြစ်လာ ကြတယ်''

''ဟုတ်ပါတယ်။ ဒါကြောင့် မြေကွက်အမည်ပေါက် မပြောင်းကြတော့ဘဲ ကိုယ်စားလှယ်စာနဲ့ ဆောင်ရွက်နေကြ တာများတယ်''

''ကိုယ်စားလှယ် လွှဲစာနဲ့ အရောင်းအဝယ်လုပ်တာကတော့ မြေအမည်ပေါက် သက်ရှိထင်ရှားရှိမှ အဆင်ပြေမှာ မဟုတ်ဘူးလား''

''ဟုတ်တယ် ဆရာ။ တချို့က ကိုယ်စားလှယ်လွှဲစာရသူထံက ကိုယ်စားလှယ်လွှဲစာထပ်ဆင့်ယူတာမျိုးတွေ ဖြစ်လာကြတယ်''

''တချို့လည်း ကြားဖူးနားဝနဲ့ လုပ်နေကြတာဆိုတော့ ဥပဒေသဘောကို နားမလည်ကြဘူး။ မိမိက ထပ်ဆင့် လွှဲပြောင်းရောင်းချပေးကမ်းမှ အခက်အခဲရှိတာတွေ ဖြစ်လာရတော့တယ်''

''အဆင့်ဆင့်ဝယ်ထားကြပြီး အမည်မပြောင်းတော့ အိမ်မြေတွေမှာ အခက်အခဲရှိလာကြတယ်။ မူရင်း အမည် ပေါက်ကို နောက်မှထပ်ရှာရတာတွေ၊ အမည်ပေါက်ကွယ်လွန်သွားလို့ အမည်ပေါက်သူရဲ့ အမွေဆက်ခံသား သမီးတွေကို ရှာဖွေရတာနဲ့ လုပ်ငန်းမတွင်ကျယ်တာတွေရှိ လာတတ်တယ်''

''ဒါကြောင့်မို့လည်း တရားရုံးတွေမှာ အိမ်မြေမှတ်ပုံတင်အရောင်းအဝယ်ချုပ်ဆိုပေးစေလိုမှုဆိုတဲ့ အမှုတွေ များလာတာပေါ့''

''မှန်ပါတယ် ဆရာ။ အချို့လည်း  အမည်ပေါက်သူရှာတွေ့ပြီး အမည် ပေါက်သူက စာချုပ်စာတမ်းမှတ်ပုံတင် ပြုလုပ်ပေးဖို့ ဒါမှမဟုတ် ကိုယ်စားလှယ် ယူထားဖို့အတွက် ထိုက်တန်တဲ့ အဖိုးစားနားကန်တော့ရတာ တွေရှိလာတယ်''

''ကောင်းတာတော့ဗျာ အိမ်ခြံ မြေ ဝယ်လိုက်ရင် အခွန်ဆောင်ပြီး အမည်ပြောင်းလိုက်တာကတော့ အကောင်း ဆုံးပဲ။ ဒါပေမယ့် ဝင်ငွေရ လမ်းမဖော်ပြနိုင်ရင် အိမ်မြေတန်ဖိုး ကျပ်သိန်းတစ်ထောင်ကျော်ပါက ၃ဝ ရာခိုင်နှုန်း ထမ်းဆောင်နေကြရတဲ့အတွက် အခက်အခဲရှိနေကြတာဆိုတော့ အလွယ်တကူအခွန်ရှောင်တာ မျိုးဖြစ်လာကြ တာပေါ့''

''နိုင်ငံတော် အစိုးရအနေနဲ့ကလည်း တရားမဝင်ငွေ (ငွေမည်း) ကိစ္စတွေကို ထိန်းချုပ်လိုတာနဲ့ အခွန်နှုန်း မြှင့်ထားတာလည်း ဖြစ်နိုင်တယ်''

''ဟုတ်တယ် ဦးသက်နိုင်။ ရင်းနှီးမြှုပ်နှံကြတာလည်း အိမ်ခြံမြေ ကား၊ ရွှေ၊ ဈေးကွက်တွေပဲရှိတော့ အိမ်ခြံ မြေမှာ ပိုပြီးရင်းနှီးမြှုပ်နှံမှုတွေ ဖြစ်နေတာ မဟုတ်လား''

''ဟုတ်ပါတယ် ဆရာ။ ဘာပဲဖြစ်ဖြစ်၊ အခွန်နှုန်းတွေ လျှော့ချလိုက်မယ်ဆိုရင်တော့ အိမ် ခြံ မြေ အရောင်းအဝယ် လုပ်ငန်းတွေမှာ ပြန်လည် ဦးမော့လာနိုင်ပါတယ်''

''မှန်ပါတယ်။ ဒါလည်း ကြိုဆိုရမယ့် ကိစ္စပါ။ တစ်ခုတော့ရှိတယ်။ ကျွန်တော် အမှတ်မမှားဘူးဆိုရင် ယခင်နှစ် ကလည်း အခွန်အကောက် ဥပဒေကြမ်းမှာ အခြေပစ္စည်းတစ်ရပ်ရပ်ကို ဝယ်ယူခြင်း၊ တည်ဆောက်ခြင်း၊ ရယူခြင်း၊ လုပ်ငန်းအသစ်တည်ထောင်ခြင်း၊ လုပ်ငန်းထပ်မံတိုးချဲ့ ဆောင်ရွက်ခြင်းကိစ္စတွေရဲ့ အခွန်အကောက် နှုန်းထားလျှော့ချပြဋ္ဌာန်းဖို့ ဖော်ပြခဲ့တယ်။ ဒါပေမယ့် ပြည်ထောင်စု လွှတ်တော်က ယခင်နှုန်းထားအတိုင်း ပြန်လည်အတည်ပြု သတ်မှတ်ခဲ့တယ်လို့ မှတ်သားထားမိတယ်''

''ဟုတ်ပါတယ် ဆရာ။ ဒါကြောင့်မို့ ယခု ဥပဒေကြမ်းပါ နှုန်းထားများအတိုင်း ပြည်ထောင်စုလွှတ်တော်က အတည်ပြုပြဋ္ဌာန်းပေးဖို့ ပြည်သူက တိုက်တွန်းဖို့ လိုအပ်ပါတယ်''

''အခွန်ဦးစီးဌာနက အိမ်မြေတန်ဖိုး သတ်မှတ်စံနှုန်းတွေကိုတော့ ယခင်နှစ်တွေထက်လျှော့ပြီး ကာလပေါက်ဈေး သတ်မှတ်ပေးခဲ့တယ်လို့ သိရတယ်''

''ဟုတ်ပါတယ် ဆရာ။ ဒါကြောင့်မို့ အခု အခွန်အကောက်ဥပဒေမှာလည်း အိမ် မြေ ဝယ်ခွန်ကို လျော့ပေါ့ သတ်မှတ်လိမ့်မယ်လို့ မျှော်လင့်တောင့်တနေကြတာပေါ့''

''ဥပဒေကြမ်းပါ နှုန်းထားများအရဆိုရင်တော့ ၁ဝ ရာခိုင်နှုန်းကျော် လျှော့ချလိုက်တယ်လို့ တွေရတယ်။ ယခင် နှုန်းထားမှာက ဝင်ငွေကျပ် ၁ မှ ကျပ်သိန်း ၃ဝဝ အထိကို ၁၅ ရာ ခိုင်နှုန်း။ ကျပ်သိန်း ၃ဝ၁ မှ ကျပ် သိန်း ၁ဝဝဝ အထိကို  ၂ဝ ရာခိုင်နှုန်း။ ကျပ်သိန်းတစ်ထောင်တစ်ကျပ် မှ အထက်ကို ၃ဝ ရာခိုင်နှုန်း ဝင်ငွေပေါ်မှ ကောက်ခံ မှာဖြစ်ပါတယ်။ ယခုအခွန်အကောက် ဥပဒေကြမ်းအရ ကျပ်ငွေ ၁ ကျပ်မှ ကျပ်သိန်းတစ်ထောင်အထိကို ဝင်ငွေခွန်၏ ၃ ရာ ခိုင်နှုန်းသာ ထမ်းဆောင်ရမှာဖြစ်တဲ့အတွက် နှုန်းထားမှာ အလွန်ကွာခြားသွားပြီဖြစ်ပါတယ်''

''ဟုတ်ကဲ့ ဆရာ။ များသောအားဖြင့် အရောင်းအဝယ်ဖြစ်ကြတာကလည်း ကျပ်သိန်းတစ်ထောင်ဝန်းကျင်တွေက များတယ် ဆရာ''

''ဒါကြောင့်မို့ အမှန်တကယ် ဝယ်သူတွေအတွက် ပိုအဆင်ပြေသွားတာပေါ့။ ကျပ်သိန်းတစ်ထောင် တစ်ကျပ် ကနေ ကျပ်သိန်းသုံးထောင်အထိကို ၅ ရာခိုင်နှုန်းသာ ထမ်းဆောင်ရမှာဖြစ်ပြီး ကျပ်သိန်းသုံး ထောင်တစ်ကျပ်မှ ကျပ်သိန်း သုံးသောင်းအထိကို ၁ဝ ရာခိုင်နှုန်းနဲ့ ကျပ်သိန်းသုံးသောင်တစ်ကျပ်မှ အထက်ကို ၃ဝ ရာခိုင်နှုန်းလ့ို ဖော်ပြထားတာကို တွေ့ရပါတယ်''

''ဟုတ်ပါတယ် ဆရာ။ ကျပ်သိန်း တစ်ထောင်အထက်တန်ဖိုးရှိတဲ့ အိမ်မြေဆိုရင် ယခင်က ၃ဝ ရာခိုင်နှုန်း ပေး ဆောင်ရမှာကို ယခုဖော်ပြချက်အရ ကျပ်သိန်းသုံးထောင်တန်ဖိုးအထိ ဝင်ငွေရဲ့ ၅ ရာခိုင်နှုန်းသာ ထမ်းဆောင်ရ မှာဖြစ်တဲ့အတွက် အများကြီး လျော့ပေါ့သွားမှာ ဖြစ်ပါတယ်''

''ဟုတ်တယ် ဦးသက်နိုင်။ အိမ်မြေ အရောင်းအဝယ်တွေ ပြန်လည် လှုပ်ရှားလာနိုင်တာပေါ့''

''အားလုံးကလည်း အဲဒီလို မျှော်လင့်နေကြပါတယ်''

''နောက်တစ်ခုက အခြေပစ္စည်းဖြစ်တဲ့ အိမ် ခြံ မြေကို ရောင်းချလွှဲပြောင်း၍ အမြတ်အစွန်းရခဲ့ရင် ယင်းအမြတ် အစွန်းပေါ်မှာ ရောင်းခွန်အဖြစ် ၁ဝ ရာခိုင်နှုန်းထမ်းဆောင်ရမှာ ဖြစ်ပါတယ်''

''အမြတ်အစွန်းဆိုတော့ ရောင်းချလို့ အမြတ်အစွန်းငွေတန်ဖိုးပေါ်မှာ ချမှတ်ကောက်ခံတာ မဟုတ်လား ဆရာ''

''မှန်ပါတယ်။ ဒါကြောင့် ရောင်းခွန် ၁ဝ ရာခိုင်နှုန်းဆောင်ပြီးတဲ့အခါ ရောင်းဖိုးငွေဟာ ငွေဖြူဖြစ်သွားတဲ့အတွက် ပစ္စည်းထပ်မံဝယ်ယူရာမှာ ရောင်းဖိုးငွေထက် လျော့သည့် အိမ်မြေကို ဝယ်ခဲ့ရင် ဝယ်ခွန်ထပ်မံထမ်းဆောင်ရန် မလိုအပ်တော့ပါ''

''တကယ်လို့ မိမိပစ္စည်းရောင်းရငွေထက်ပိုမြင့်တဲ့ အိမ် မြေကိုဝယ်ရင် ဘယ်လိုဖြစ်မလဲ ဆရာ''

ရောင်းဖိုးငွေထက်ပိုတဲ့ ငွေကြေးပမာဏအပေါ်သာ အခွန်နှုန်းအလိုက် ကောက်ခံမှာဖြစ်တဲ့အတွက် များစွာသက် သာသွားမှာဖြစ်ပါတယ်။ ဒါကြောင့် ရောင်းခွန် ဝယ်ခွန် နှစ်မျိုးလုံးထမ်းဆောင်မှုတွေဖြစ်ပေါ်လာနိုင်တာမို့ အခွန် အကောက် ဥပဒေကြမ်းအတိုင်းအတည်ပြုနိုင်ပါစေလို့ ဆုတောင်းမိကြောင်း ဆွေးနွေးလိုက်ပါသည်။

Ref : Zaygwet Journal ထီယု (ဥပဒေအတိုင်ပင်ခံ)

Photo Credit : Mmtime

Posted By : Sint Sint (ShweProperty.com)