“သေတမ်းစာနဲ့ အမွေထိန်းစာ ဘယ်လိုကွာခြားပါသလဲ ဆရာ”ဟု မိတ်ဆွေတစ်ဦး၏ သားဖြစ်သူက စာရေး သူထံ လာရောက်မေးမြန်းဆွေး နွေးပါသည်။

“သေတမ်းစာဆိုတာက ဗုဒ္ဓဘာသာဝင်တွေအနေနဲ့ ရေးခွင့်မရှိဘူး။ ခရစ်ယာန် ဘာသာကိုးကွယ်သူ၊ အစ္စလာမ် ဘာသာကိုးကွယ်သူတွေကတော့ မိမိပိုင်ပစ္စည်းတွေကို မိမိကွယ်လွန်သွားရင် ဘယ်လိုစီမံခန့်ခွဲရမယ်ဆိုတာကို ကြိုတင်ပြီး ရေးသားညွှန်ကြားခဲ့တဲ့စာဖြစ်တယ်”

 “ဆရာပြောသလို သေတမ်းစာကို မိမိကွယ်လွန်ခဲ့ရင် စီမံခန့်ခွဲဖို့ ရေးသားတယ်ဆိုတော့ တစ်ဦးဦးက ဆောင် ရွက်ပေးရမယ့် သဘောလား ဆရာ”

 “မှန်ပါတယ်။ ဥပဒေအရတော့ စီမံခန့်ခွဲ ဆောင်ရွက်ဖို့ သေတမ်းစာ အတည်ပြုသူ တစ်ဦးတစ်ယောက်ကို သေတမ်းစာထဲမှာ တိတိကျကျ ဖော်ပြခန့်ထားရမှာဖြစ်ပါတယ်”

 “တချို့ကပြောတော့ သေတမ်း စာရေးထားခဲ့တဲ့ ပစ္စည်းဆိုရင် တရားရုံးမှာ လျှောက်ထားရယူကြရတယ်လို့ ပြောကြတယ်။ ဆရာ၊ အဲဒါ ဟုတ်ပါသလား။ သေတမ်းစာမှာပါရှိတဲ့အတိုင်း ပစ္စည်းခွဲဝေယူလိုက်ကြလို့ မရဘူး လား”

 “ရွှေ့ပြောင်းနိုင်တဲ့ ပစ္စည်း ရွှေ၊ ငွေ၊ ကားစတဲ့ ပစ္စည်းတွေဆိုရင်တော့ လက်ရောက်ပေးအပ်ခွဲဝေလို့ရတယ်။ ဒါပေမယ့် မရွှေ့မပြောင်းနိုင်တဲ့ ပစ္စည်းဖြစ်တဲ့ အိမ်၊ မြေ၊ တိုက်ခန်းတွေကိုတော့ လက်ရောက်ပေးအပ်သည့်တိုင် ဥပဒေနဲ့အညီ ပိုင်ဆိုင်ခွင့် အမည်ပြောင်းတဲ့အခါမှာ အခက်အခဲရှိနိုင်တယ်”

 “အိမ်ပေါ်မှာ လက်ရှိနေထိုင်သူက ဖယ်မပေးတာလည်း ရှိနိုင်တာပေါ့ ဆရာ”

 “ဟုတ်ပါတယ်။ သေတမ်းစာဆိုတာက ပစ္စည်းပိုင်ရှင်နဲ့ ဆွေမျိုးနီးစပ် မဟုတ်သူ၊ သူစိမ်းတစ်ယောက်ကိုလည်း ပစ္စည်းပိုင်ရှင်က မိမိပိုင်ပစ္စည်းကို အပြီးအပိုင်လွှဲပြောင်းပေးခွင့်ရှိတာမို့ ဥပဒေနဲ့အညီ ပိုင်ဆိုင်ခွင့်က အဓိကဖြစ် လာတယ်။ ဒါကြောင့် တရားရုံးမှာ သေတမ်းစာအတည်ပြု လက်မှတ် လျှောက်ထားရယူရမှာဖြစ်တယ်”

 “ဘယ်သူက သေတမ်းစာ အတည်ပြုလက်မှတ်လျှောက်ထားရမှာလဲ ဆရာ”

 “အဲဒါကတော့ သေတမ်းစာထဲမှာ သေတမ်းစာအတည်ပြုသူအဖြစ် ပစ္စည်းပိုင်ရှင်ရဲ့ ခန့်အပ်ခံရသူက တရားရုံး ထံ လျှောက်ထားရမှာဖြစ်ပါတယ်”

 “သေတမ်းစာ အတည်ပြုလက်မှတ်ရမှ ပစ္စည်းခွဲဝေခြင်းဆက်လုပ်ရမှာလား ဆရာ”

“မှန်ပါတယ်။ သေတမ်းစာထဲမှာ သူပိုင် အိမ်မြေကို ရောင်းချပြီး သားသမီးများကို ဒါမှမဟုတ် အခြားသူများကို မည်သို့ခွဲဝေပေးပါလို့ပါရှိတယ်ဆိုပါတော့”

“ဟုတ်ကဲ့ ဆရာ”

“အဲဒီလို အခြေအနေမျိုးဆိုရင် အဆိုပါ အိမ်နဲ့မြေကို ရောင်းချခွင့်ပြုရန် သေတမ်းစာအတည်ပြု လက်မှတ် ရရှိထားတဲ့ သေတမ်းစာ အတည်ပြုသူက တရားရုံးမှာ ခွင့်ပြုချက် လျှောက်ထားရပါမယ်။ တရားရုံးက ခွင့်ပြုရင် ဝယ်သူနဲ့ အရောင်း အဝယ် မှတ်ပုံတင်စာချုပ် ချုပ်ဆိုပြီး ရောင်းဖိုးငွေကို ခွဲဝေပေးရမှာ ဖြစ်ပါတယ်”

“တကယ်လို့ ကွယ်လွန်သူက သူပိုင်ပစ္စည်းတစ်ခုခုကို တစ်ဦးတစ်ယောက်အား အပြီးအပိုင်ပေးတယ်လို့ သေ တမ်းစာမှာ ရေးထားရင် ဘာဖြစ်နိုင်သလဲ ဆရာ”

 “အဲဒီလို အခြေအနေဆိုရင်တော့ တရားရုံးမှာ ပေးကမ်းခြင်း စာ ချုပ်ချုပ်ဆိုရန် ခွင့်ပြုချက်တောင်းခံပြီး ပေး ကမ်းခြင်း မှတ်ပုံတင်စာချုပ် ချုပ်ဆိုဆောင်ရွက်နိုင်မှာ ဖြစ်ပါတယ်”

“ဆရာပြောတဲ့ သေတမ်းစာ အတည်ပြုသူက တရားရုံးမှာ လျှောက်ထားဆောင်ရွက်မပေးရင် ဘယ်လို ဆောင်ရွက်နိုင်ပါသလဲ ဆရာ”

“သေတမ်းစာအရ အမွေဆက်ခံ သူတစ်ဦးဦးကဖြစ်စေ၊ အားလုံးကဖြစ်စေ၊ သေတမ်းစာပါအတိုင်း ဆောင်ရွက် ပေးရန် သေတမ်းစာအတည်ပြုခွင့်ရသူကို တရားစွဲဆိုဆောင်ရွက်ခွင့်ရှိပါတယ်”

“ကျွန်တော် အခုဝယ်မယ့် အိမ်က သေတမ်းစာနဲ့ ပေးသွားတဲ့ အိမ်ဖြစ်နေတယ် ဆရာ။ အဲဒါကြောင့် တရားဝင် အောင် ဘယ်လို ဆောင်ရွက်ရမလဲဆိုတာ သိချင်လို့ပါ”

“အစောကပြောသလို သေတမ်းစာထဲမှာ သေတမ်းစာအတည်ပြုသူအဖြစ် ဘယ်သူ့ကို ခန့်ထားခဲ့သလဲဆိုတာ ကြည့်ရမယ်။ သေတမ်းစာ အတည်ပြုသူအဖြစ် တိတိကျကျ ဖော်ပြခန့်ထားခဲ့ရင်တော့ သူကပဲ တရားရုံးမှာ သေ တမ်းစာအတည်ပြု လက်မှတ်လျှောက်ထားပြီး အရောင်းအဝယ်ကို ဆက်လက်ဆောင်ရွက်သွားရမှာ ဖြစ်ပါ တယ်”

“ဟုတ်ကဲ့ ဆရာ၊ ဒါပေမယ့် သေတမ်းစာမှာက သေတမ်းစာ အတည်ပြုသူအဖြစ် ခန့်ထားတာ မတွေ့ရဘူး ဆရာ။ အချို့ကပြောတော့ အမွေထိန်းလျှောက်ရမယ်လို့ ပြောပြန်တယ်”

“ဒီလိုပါ။ သေတမ်းစာထဲမှာ သေတမ်းစာအတည်ပြုသူအဖြစ် တိတိကျကျ ဖော်ပြမထားဘူးဆိုရင် သေတမ်း စာပူးတွဲပါရှိသည့် အမွေထိန်းစာကို လျှောက်ထားရမှာ ဖြစ်ပါတယ်”

“အဲဒါကတော့ ဘယ်သူက လျှောက်ထားရပါသလဲ ဆရာ”

“ဒါကတော့ ပစ္စည်းရပိုင်ခွင့်ရှိသူက တရားရုံးမှာ တိုက်ရိုက်လျှောက်ထားခွင့်ရှိပါတယ်”

“ဆရာ ပြောစကားအရဆိုရင် သေတမ်းစာအရ အဲဒီအိမ်မြေကို ရပိုင်ခွင့်ရှိသူက တရားရုံးမှာ အမွေထိန်းစာ လျှောက်ရမယ်ပေါ့”

“ဟုတ်ပါတယ်၊ ဒါပေမယ့် ရိုးရိုးအမွေထိန်းစာမဟုတ်ဘူး။ သေတမ်းစာအရ လုပ်ပိုင်ခွင့်ရရှိတဲ့ အမွေထိန်း စာဖြစ်တယ်”

 “ရိုးရိုး အမွေထိန်းစာနဲ့ ဘယ်လိုကွာပါသလဲ ဆရာ”

“ရိုးရိုးအမွေထိန်းစာဆိုတာက ဥပဒေနဲ့အညီ သားစဉ်မြေးဆက် အမွေဆက်ခံသူက လျှောက်ထားတာ ဖြစ်တယ်။ သေတမ်းစာပူးတွဲပါရှိသည့် အမွေထိန်းစာကတော့ သေတမ်းစာအရ ပိုင်ဆိုင်ခွင့်ရှိသူက လျှောက်ထားရတာဖြစ် တဲ့အတွက် အခြားသူတစ်ဦးဦးက ပြိုင်ဆိုင်လျှောက်ထားဖို့ ခက်ခဲမှာ ဖြစ်ပါတယ်”

“ဒါဆိုရင် သေတမ်းစာအရ ပိုင်ဆိုင်ခွင့်ရမယ့်သူက လျှောက်ထားရမှာဆိုတော့ အခုရောင်းမယ့်သူ ဟုတ် မဟုတ် စုံစမ်းဖို့လိုမယ်ထင်တယ်”

“ဒါတော့ မှန်တယ်။ အခုလက်ရှိနေသူက ရောင်းမယ်လို့ ပြောတာလား”

“ရောင်းသူပြောတာကတော့ မြန်မာကရင်လူမျိုး၊ ခရစ်ယာန်ကိုးကွယ်သူတွေလို့ ပြောပါတယ်။ သူ့ကို အမေက သေတမ်းစာနဲ့ ပေးသွားတဲ့ အိမ်ဖြစ်လို့ ရောင်းပိုင်ခွင့်ရှိတယ်လို့ ပြောတယ်။ ကျန်တဲ့ မောင်နှမတွေကလည်း ကန့်ကွက်မှာ မဟုတ်ဘူးလို့ ပြောပါတယ်”

“ဒါဆိုရင်တော့ ရှင်းပါတယ်။ သူကိုယ်တိုင်လည်း လက်ရှိရောင်းမယ့် အိမ်မှာနေတယ်ဆိုတော့ အဆင်ပြေမှာပါ”

“သေတမ်းစာကို တင်ပြပြီး အရောင်းအဝယ်မှတ်ပုံတင် စာချုပ် ချုပ်ဆိုလို့ မရဘူးလား။ တရားရုံးမှာ မဖြစ်မနေ လျှောက်ထားရမှာလား ဆရာ”

“ဟုတ်ပါတယ်။ ရှင်းအောင်ပြောရရင် တရားရုံးချုပ်က ဆုံးဖြတ်ထားတဲ့ ဦးစမ်းမောင်ပါ ၅ နှင့် ဒေါ်ခင်မြယု-၂၀၁၇ ခုနှစ်၊ မြန်မာနိုင်ငံ တရားစီရင်ထုံး၊ စာမျက်နှာ - ၁၅ အမှုမှာ သေတမ်းစာတွင် သေတမ်းစာအတည်ပြုသူ ခန့်ထားခြင်းမရှိပါက သေတမ်းစာပူးတွဲပါရှိသော အမွေထိန်းစာလျှောက်ထားရမယ်လို့ အတိအကျဆုံးဖြတ်ထား တာလည်း ရှိပါတယ်။ ဒါကြောင့် ယခုကိစ္စမှာ သေတမ်းစာပူးတွဲပါရှိသော အမွေထိန်းစာကို တရားရုံးမှာ ဦးစွာလျှောက်ထား ဆောင်ရွက်ရပါမယ်”

“တရားရုံးလျှောက်ထားတဲ့ ကုန်ကျစရိတ်ကို ထုံးစံအတိုင်း ရောင်းသူက ကျခံရသလား ဆရာ”

“အတိအကျတော့ သတ်မှတ်ချက်မရှိပေမယ့် နှစ်ဖက်ညှိနှိုင်း ဆောင်ရွက်ကြတာဖြစ်ပါတယ်”

“ဟုတ်ကဲ့ ဆရာ။ စရန်ပေးရင် ဆရာနဲ့ ဆက်သွယ်လိုက်ပါမယ်”ဟုပြောပြီး ဆွေးနွေးခကို ကန်တော့သွား ပါသည်။

Ref : Zaygwet Journal - ထီယု (ဥပဒေအတိုင်ပင်ခံ)

Photo Credit : timeaharisova

Posted By : Sint Sint (ShweProperty.com)