မြန်မာနိုင်ငံအတွင်းရှိ ရောင်းရန်နှင့် ငှားရန်ရှိသော အိမ်ခြံမြေများ

Property Titles

အိမ်ခြံမြေများ ဝယ်ယူပြီး ပိုင်ရှင်အမည်ပေါက် ပြောင်းလဲလိုလျှင်

By Union House Myanmar, Shweproperty.com

Updated at 19 August 2019

အိမ်ခြံမြေဝယ်ပြီးတဲ့နောက်မှာ သူများ အမည်ပေါက်နဲ့ ရှိနေတဲ့ အိမ်ခြံမြေကို မိမိ အမည်ပေါက် ဖြစ်အောင်ဘယ်လိုနည်းနဲ့ လုပ်လို့ရလဲ ဆိုတဲ့ လုပ်ထုံးလုပ်နည်းတွေကို သိဖို့ အရေးကြီးပါတယ်။

ပထမဆုံးလုပ်ဆောင်ရမယ့် အချက်က ကိုယ်ဝယ်လိုက်တဲ့ အိမ်ခြံမြေဟာ

- မြေချ ပါမစ် လား?

- အနှစ် ၆၀ ဂရန် လား?

- ဘိုးဘွားပိုင်မြေ လား?

- လယ်ယာမြေလား? ဆိုတာ သိရှိဖို့လိုအပ်ပါတယ်။

တကယ့်လို့ မြေချ ပါမစ်ကို ဝယ်ယူခဲ့ရင်

မိမိ အမည်ပေါက်နဲ့ အနှစ်(၆၀) ဂရန် လုပ်လို့ရပါတယ်။(အခွန်ပေးဆောင်စရာ မလိုအပ်ပါ။)

ရန်ကုန်မြို့တော် စည်ပင်သာယာရေးကော်မတီက ၁၉၈၇ မရွှေ့ပစ္စည်းကန့်သတ် ဥပဒေနှင့်ငြိစွန်းမှုရှိ/မရှိ စစ်ဆေးပါလိမ့်မယ်။ အားလုံးပြည့်စုံမှန်ကန်တဲ့အပြင် သတင်းစာထဲကလည်း ကန့်ကွက်သူမရှိမှသာ ပိုင်ရှင်အမည်ကို ပြောင်းလဲခွင့်ပြုပါတယ်။

- အမည်ပေါက် အနှစ် ၆၀ ဂရန်ကိုဝယ်ရင်တော့ အခွန်ဆောင်ပြီးမှ မိမိအမည်ပေါက် ပြောင်းလဲနိုင်မှာပါ။

- ဘိုးဘွားပိုင်မြေဝယ်ရင်လည်း အခွန်ဆောင်ပြီးမှ မိမိ အမည်ပေါက် ပြောင်းလဲနိုင်မှာပါ။

- လယ်ယာမြေကတော့ကို ဝယ်ယူမယ်ဆိုရင်တော့ အနည်းငယ် ပြောစရာများပါတယ်။ အောက်မှာဖတ်ကြည့်လိုက်ပါဦးနော်…..

လယ်ယာမြေကို မှတ်ပုံတင်မယ်ဆိုရင် အရင်ဆုံး

- လယ်ယာမြေလုပ်ပိုင်ခွင့်လက်မှတ် (ပုံစံ-၇) ကိုဝယ်ယူပြီး ကိုယ်ပြောင်းလိုသော လယ်ယာမြေရှိတဲ့ ကြေးတိုင်နှင့်မြေစာရင်းဦးစီး ဌာန မြို့နယ် ရုံး မှာပဲ မှတ်ပုံတင်စာချုပ်ချုပ်ဆိုရပါမယ်။အဲဒီမြို့နယ် အခွန်ဦးစီးဌာန ရုံးက တန်ဖိုးဖြတ်ပေးတဲ့အတိုင်း အခွန်ပေးဆောင်ရပါမယ်။

- အကယ်၍ လယ်ယာမြေပိုင်ဆိုင်ခွင့်/လုပ်ပိုင်ခွင့် လက်မှတ် ပုံစံ(၇) ကို အမည်မပြောင်းချင်သေးပဲ အိမ်ခြံမြေလိုပဲ ဝယ်ရောင်းလုပ်ချင်သေးတယ်ဆိုရင်တော့ ရောင်းသူထံကနေ " အထွေထွေ ကိုယ်စားလှယ်လွှဲစာ ( General Power )" ကို ယူထားလို့ရပါတယ်။

- အဲဒီလို လယ်ယာမြေအမည်ပေါက်သူထံကနေ General Power (အထွေထွေ ကိုယ်စားလှယ်လွှဲစာ) ယူထားပြီးပြီဆိုရင်တော့အခြားဝယ်သူတွေကို ပြန်ရောင်းချလို့ ရပါပြီ။

နယ်မြို့တွေမှာတော့ အထွေထွေ ကိုယ်စားလှယ် လွှဲစာတို့၊အထူးကိုယ်စားလှယ် လွှဲစာတို့ကို တံဆိပ်ခေါင်းကပ်ပြီး အဆင်သင့်ရောင်းတာမျိုးတော့သိပ်မရှိကြတဲ့အတွက် ရန်ကုန်မြို့ဘားလမ်း (မဟာဗန္ဓုလ ပန်းခြံလမ်း)က အဆင့်သင့်ရောင်းတဲ့General Power စာချုပ်တွေ ဝယ်သုံးဖို့ အကြံပြုလိုပါတယ်။

ပိုင်ရှင်အမည်ပေါက် ပြောင်းရာတွင် လိုအပ်သော အချက်များ

လျှောက်ထားသူ၏ မှတ်ပုံတင်မိတ္တူ ၊ ပိုင်ဆိုင်ကြောင်း အထောက်အထားစာချုပ်မူရင်းများ၊ မြေခွန်ကြွေးကျန် ကင်းရှင်းကြောင်း အထောက်အထား စတဲ့အရာတွေ လိုအပ်ကြောင်းပါ ခင်ဗျာ။

Ref : Union House Myanmar

Photo Credit : Proptiger

Posted By : Sint Sint (ShweProperty.com)

Follow Us On