ရန်ကုန်တိုင်းဒေသကြီး အစိုးရအဖွဲ့မှ ရောင်းချမည့် တန်ဖိုးနည်း၊ တန်ဖိုးသင့်တိုက်ခန်း အခန်းများကို ဝယ်ယူရန်အတွက် ကနဦးပေးသွင်းငွေ (Down Payment) ကို ယခင်က ရာခိုင်နှုန်း ၃၀ ပေးသွင်းရန် သတ်မှတ်ထားခဲ့သော်လည်း လက်ရှိတွင်
ကနဦးပေးသွင်းငွေအား ရာခိုင်နှုန်း ၂၀ သာ ပေးသွင်းပြီး ဘဏ်တိုးနှုန်း ၈ ဒသမ ၅ ရာခိုင်နှုန်း၊ ချေးငွေကာလ ၁၅ နှစ်ဖြင့် ဝယ်ယူနိုင်ရန် ဗဟိုဘဏ်က ဖြေလျှော့ပေးလိုက်ကြောင်း ဆောက်လုပ်ရေးဝန်ကြီးဌာနမှ သိရသည်။
“ဗဟိုဘဏ်က ပြည်သူတွေစုထားတဲ့ပိုက်ဆံမဆုံးရှုံးအောင် အဲဒီပိုက်ဆံတွေနဲ့ ပြန်ချေးတဲ့ မည်သည့်အိမ်ရာမဆို ရာခိုင်နှုန်း ၃၀ ထားတယ်။ အခုက ဂျပန်ချေးငွေ၊ နိုင်ငံတကာဖွံ့ဖြိုးမှုချေးငွေဖြစ်နေလို့ ပြည်သူပိုက်ဆံမဟုတ်လို့ နိုင်ငံတကာဖွံ့ဖြိုးမှုချေးငွေ အစီအစဉ်နဲ့ ပတ်သက်လို့ ဒါကိုပေးဖို့ ဗဟိုဘဏ်က ဖြေလျှော့ပေးတာဖြစ်ပါတယ်” ဟု ဆောက်လုပ်ရေးဝန်ကြီးဌာန၊ မြို့ပြနှင့်အိမ်ရာဖွံ့ဖြိုးရေးဦးစီးဌာနမှ တာဝန်ရှိသူတစ်ဦးက မတ်လ ၆ ရက်က ပြောကြားထားသည်။
ရန်ကုန်တိုင်းဒေသကြီးအစိုးရအဖွဲ့၊ အိမ်ရာစီမံကိန်းများရောင်းချရေးကြီးကြပ်မှုကော်မတီမှ ပြည်သူ့အိမ်ရာ တိုက်ခန်းများ ရောင်းချနိုင်ရေးအတွက် မိသားစုဝင်ငွေ ငါးသိန်းနှင့်အောက်ကို ပထမအုပ်စုအဖြစ်လည်းကောင်း၊ မိသားစုဝင်ငွေ ငါးသိန်းအထက်ကို ဒုတိယအုပ်စုအဖြစ်လည်းကောင်း၊ အုပ်စုနှစ်ခုခွဲခဲ့ပြီး ၎င်းအုပ်စုနှစ်စုကို အများပြည်သူ၊ နိုင်ငံ့ဝန်ထမ်း၊ ကုမ္ပဏီဝန်ထမ်း၊ အငြိမ်းစားဝန်ထမ်းဟူ၍ ရည်မှန်းအုပ်စုလေးစု ထပ်မံခွဲခြားခဲ့ပြီး လျှောက်ထားလာသူ ၆၀၂၇ ဦးအနက် ပထမသုတ်အဖြစ် ၇၂၂ ဦးကိုရောင်းချခဲ့ရာ စုစုပေါင်း လျှောက်ထားသူ ၄၈၆ ဦးမှ ဆက်သွယ်ဝယ်ယူခဲ့ကြောင်း၊ ၎င်းတို့အနက် ငွေအကြေပေးသွင်းသူ ၄၁ ဦးနှင့် အိမ်ပေါင်ချေးငွေစနစ်ဖြင့် ဝယ်ယူလိုကြောင်း ဆန္ဒပြုသူ ၄၄၅ ဦးရှိခဲ့ကြောင်း သိရသည်။
အိမ်ပေါင်ချေးငွေစနစ်ဖြင့် ဝယ်ယူနိုင်ရန်အတွက် အသိပေးကြေငြာထားသည့်အတိုင်း ဝယ်ယူခွင့်ရရှိနိုင်ရေး ညှိနှိုင်းခဲ့ရာ လုပ်ငန်းစဉ်များကြောင့် အနည်းငယ်ကြန့်ကြာခဲ့ရပြီး ယခုအခါ သက်ဆိုင်ရာအဖွဲ့အစည်းများမှ ခွင့်ပြုပြီးဖြစ်ပါသဖြင့် ကနဦးပေးသွင်းငွေ ရာခိုင်နှုန်း ၂၀၊ ဘဏ်တိုးနှုန်း ၈ ဒသမ ၅ ရာခိုင်နှုန်းနှင့် ချေးငွေကာလကို ၁၅ နှစ်အထိ ချေးယူခွင့်ရရှိခဲ့ပြီးဖြစ်သည်ဟု သိရသည်။
သို့ဖြစ်ရာ ပထမအသုတ်ဝယ်ယူခွင့်ရရှိပြီး အိမ်ပေါင်ချေးငွေစနစ်ဖြင့် ဝယ်ယူမည့်ပြည်သူများအနေဖြင့် ကနဦးပေးသွင်းငွေ ပေးသွင်းရန်နှင့် အိမ်ပေါင်ချေးငွေဆိုင်ရာကိစ္စရပ်များ ဆက်လက်ဆောင်ရွက်နိုင်ရန်အတွက် ၂၀၁၉ ခုနှစ် မတ်လ ၈ ရက်မှစတင်၍ ၂၀၁၉ ခုနှစ် ဧပြီလကုန်အတွင်း ဆောက်လုပ်ရေး၊ အိမ်ရာနှင့် အခြေခံအဆောက်အအုံဖွံ့ဖြိုးရေးဘဏ် (CHID Bank) သို့မဟုတ် မြို့ပြနှင့်အိမ်ရာဖွံ့ဖြိုးရေးဦးစီးဌာနသို့ ဆက်သွယ်ဆောင်ရွက်သွားရန် အကြောင်းကြားထားကြောင်း သိရသည်။
တိုင်းဒေသကြီးအစိုးရအစီအစဉ်ဖြင့် တန်ဖိုးနည်းနှင့် တန်ဖိုးသင့်တိုက်ခန်း ၈၆၀ ကျော်ကို ရောင်းချပေးတော့မည်ဖြစ်ရာ ရန်ကုန်မြို့ရှိ ပြည်သူများအတွက် ၃၅ ရာခိုင်နှုန်း၊ နိုင်ငံဝန်ထမ်းနှင့် ကုမ္ပဏီဝန်ထမ်းများ အတွက် ၂၅ ရာခိုင်နှုန်းစီနှင့် အငြိမ်းစား ဝန်ထမ်းများအတွက် ၁၅ ရာခိုင်နှုန်းဖြင့် ၂၀၁၈ ခုနှစ် အတွင်းက မဲနှိုက်ရောင်းချပေးခဲ့ကြောင်း သိရသည်။
ပြည်သူ့အရောင်းအိမ်ရာ ဝယ်ယူခွင့် တန်းစီဇယားသည် လူမှုရေးအုပ်စု (ပြည်သူ၊ နိုင်ငံဝန်ထမ်း၊ ပုဂ္ဂလိကဝန်ထမ်း၊ အငြိမ်းစား)၊ ဝင်ငွေအုပ်စု (ပထမအုပ်စု ငါးသိန်းနှင့်အောက်၊ ဒုတိယအုပ်စု ငါးသိန်းအထက်) ဖြင့် ခွဲခြားဖော်ပြထားကြောင်း သိရသည်။
ထုတ်ပြန်ထားသည့် ဇယားများတွင် အရောင်ဖြင့် ဖော်ပြထားသော လျှောက်ထားသူများသည် ပထမအသုတ်ဝယ်ယူခွင့်ရရှိသူများဖြစ်ကြောင်း၊ ကျန်ရှိသော တန်းစီဇယားပါ လျှောက်ထားသူများကို နောင်တွင်ထပ်မံထုတ်လုပ်မည့် တိုက်ခန်းများအား တန်းစီဇယားအတိုင်း ဆက်လက်ရောင်းချပေးသွားမည်ဖြစ်ကြောင်း သိရသည်။
Ref & Photo Credit : Myanmar Builders Guide
Posted By : Sint Sint (ShweProperty.com)
အိမ်ခြံမြေပြပွဲများ
နောက်ဆုံးရ သတင်းများ
3.png)
2.png)
ဝယ်ရန်
ငှားရန်
စီမံကိန်း အသစ်များ
အခြားအိမ်ခြံမြေများ
