Leonardo လို့ပြောလိုက်တာနဲ့ Titanic မင်းသားချောလေးမှန်း သိပြီးဖြစ်ကြမှာပါနော်။ Leonardo ဟာ လက်ရှိအချိန်မှာတော့ အသက် (၄၇) နှစ်အရွယ်ရှိနေပြီး ဟောလိဝုဒ်ရဲ့ A-List စာရင်းဝင် အနုပညာရှင်တစ်ယောက်လည်းဖြစ်ပါတယ်။ သူ့ရဲ့ တစ်နှစ်စာအနုပညာကြေးက မြင့်မားသလို Leonardo ဟာ တန်ဖိုးကြီးဇိမ်ခံအိမ်တွေလည်း များစွာပိုင်ဆိုင်ထားပါတယ်။

Leonardo ဟာ သူ့ရဲ့ပထမဆုံးဇိမ်ခံအိမ်ကို Titanic ထုတ်လွှင့်ပြသပြီး တစ်နှစ်အကြာမှာ ဝယ်ယူခဲ့တာဖြစ်ပြီး အိမ်ကြီးဟာ စတုရန်းပေ (၃၅၆၀) အကျယ်အဝန်းရှိကာ ဒေါ်လာ (၇၇၀၀၀၀) နီးပါး ကုန်ကျခဲ့တာဖြစ်တယ်လို့သိရပါတယ်။ ဒါပေမယ့် Leonardo ဟာ (၂၀၁၈) ခုနှစ်ထဲမှာတော့ အဲဒီအိမ်ကြီးကို ဒေါ်လာ (၁.၇) သန်းနဲ့ပြန်လည်ရောင်းချခဲ့ပါတယ်။ လေ့လာဖော်ပြချက်တွေအရ Leonardo မှာ ဇိမ်ခံအိမ် (၆) လုံးရှိတယ်လို့သိရတဲ့အတွက် သူ့ရဲ့အဖိုးတန်အိမ် (၆) လုံးက ဘယ်နေရာတွေမှာလဲ၊ ဘယ်လောက်ခမ်းနားကြီးကျယ်လဲဆိုတာ တွေကို Leo ပရိသတ်တွေအတွက် ဝေမျှပေးလိုက်ပါတယ်။

ဒေါ်လာ (၄.၉) သန်းတန် ဇိမ်ခံအိမ်ကြီး 



ကယ်လီဖိုးနီးယားပြည်နယ်၊ Los Feliz မြို့လေးမှာ ဝယ်ယူထားတဲ့ဇိမ်ခံအိမ်ကြီးဟာဆိုရင် စတုရန်းပေ (၄၆၄၄) အကျယ်အဝန်းရှိပြီး အိပ်ခန်းကျယ် (၅) ခန်း၊ ရေချိုးခန်း (၇) ခန်းပါဝင်တယ်လို့သိရပါတယ်။ အိမ်ကြီးကို ဒေါ်လာ (၄.၉) သန်းနဲ့ဝယ်ယူခဲ့ရတာဖြစ်ပြီး ထိုအိမ်ကြီးကို Leonardo က သူ့ရဲ့မိသားစုဝင်တစ်ယောက်အတွက်ဝယ်ယူခဲ့တာပဲဖြစ်ပါတယ်။

ဒေါ်လာ (၂၃) သန်းတန် ဇိမ်ခံအိမ်ကြီး 



Leonardo  ရဲ့နောက်ထပ်ဇိမ်ခံအိမ်ကြီးဟာတော့ ကယ်လီဖိုးနီးယားပြည်နယ် Malibu မြို့မှာတည်ရှိပြီး  (၂၀၁၇) တုန်းက ဝယ်ယူခဲ့တာဖြစ်ပါတယ်။ထိုအိမ်ကြီးရဲ့အကျယ်အဝန်းက စတုရန်းပေ (၆၀၀) အကျယ်အဝန်းသာရှိပေမဲ့ Leonardo ဟာ ထိုအိမ်ကြီးအတွက်ဒေါ်လာ (၂၃) သန်းတောင်ပေးချေခဲ့ရတာဖြစ်ပါတယ်။ အိမ်ကြီးရဲ့အကျယ်အဝန်းက အနည်းငယ်သေးပေမယ့် အိမ်ခြံဝန်းနဲ့ဆို (၁.၇၆) ဧကနီးပါး ကျယ်ဝန်းတဲ့မြေနေရာဖြစ်တယ်လို့သိရပါတယ်။

ဒေါ်လာ (၂) သန်းတန်ဇိမ်ခံအိမ်ကြီး 



ဒီအိမ်ကြီးကိုတော့ Leonardo ဟာ Madonna ဆီကနေ ဒေါ်လာ (၂) သန်းနဲ့ ဝယ်ယူခဲ့တာဖြစ်ပြီး သူ့ရဲ့အနုပညာရှင်မိတ်ဆွေတစ်ချို့ကိုငှားရမ်းထားတယ်လို့လည်းသိရပါတယ်။သူ့ရဲ့ဇိမ်ခံအိမ်ကြီးဟာ Hollywood Hills မှာတည်ရှိပြီး စတုရန်းပေ (၁၂၅၃၀) ကျယ်ဝန်းကာ အိပ်ခန်းကျယ် (၅) ခန်း ၊ ရေချိုးခန်း (၈) ခန်းပါဝင်ပါတယ်။ ဒါ့အပြင် အနုပညာရှင်တွေရဲ့ တန်ဖိုးကြီးမားတဲ့ဇိမ်ခံအိမ်ဆိုတဲ့အတိုင်း ဝိုင်သိုလှောင်ခန်း ၊ Spa ၊ အမိုက်စားရေကူးကန်ကျယ်ကြီးနဲ့ တစ်ခြားဇိမ်ခံပစ္စည်းအသုံးအဆောင်တွေနဲ့ ဖွဲ့စည်းတည်ဆောက်ထားသလို ကျယ်ဝန်းတဲ့ကားပါကင်လည်း ပါဝင်တဲ့ ဇိမ်ခံအိမ်ဝင်းကြီးလည်းဖြစ်ပါတယ်။

ကယ်လီဖိုးနီးယားပြည်နယ် Palm Springs မြို့က သမိုင်းဝင်တန်ဖိုးကြီးဇိမ်ခံအိမ်ကြီး



ကယ်လီဖိုးနီးယားပြည်နယ် Palm Springs မြို့မှာရှိတဲ့ ရှေးခေတ်စတိုင်လ်ဇိမ်ခံအိမ်ကြီးဟာဆိုရင် အိပ်ခန်းကျယ် (၆) ခန်း ၊ ရေချိုးခန်း (၇) ခန်းပါဝင်တဲ့ အိမ်ကြီးအိမ်ကောင်းတစ်လုံးဖြစ်တဲ့အပြင် ဧည့်သည်တွေအတွက်နေထိုင်ဖို့ တည်းခိုဆောင်တစ်လုံးလည်း ခြံဝင်းထဲမှာပါ ပါရှိတယ်လို့သိရပါတယ်။ ဒါ့အပြင် ရေကူးကန်၊အားကစားခန်းမ၊တင်းနစ်စ်ကွင်းလည်းပါဝင်ပြီး ထိုအိမ်ကြီးကိုတစ်ချိန်က Dinah Shore ဆိုတဲ့အဆိုတော် ပိုင်ဆိုင်ခဲ့တာပဲဖြစ်ပါတယ်။ ထိုဇိမ်ခံအိမ်ကြီးကို ခရီးသွားလှည့်လည်သူအတွက် ပြသလေ့ရှိပြီး ထိုအိမ်ကြီးမှာတည်းခိုမယ်ဆိုရင် တစ်ညကို ဒေါ်လာ (၃၇၅၀) ပေးချေရမှာဖြစ်တယ်လို့သိရပါတယ်။

ဒေါ်လာ (၁.၇) သန်းကျော်တန် ဇိမ်ခံအိမ်ကြီး



Leonardo ဟာ Malibu မှာလည်း ၂ထပ် ဘန်ဂလိုတစ်လုံး ဝယ်ယူခဲ့ပြီး ထိုဇိမ်ခံအိမ်ကြီးမှာဆိုရင် အိပ်ခန်းကျယ် (၃) ခန်း ၊ ရေချိုးခန်း(၂) ခန်း ပါဝင်ပြီး စတုရန်းပေ (၁၇၆၅) ကျယ်ဝန်းတဲ့အိမ်ကြီးဖြစ်ပါတယ်။ အိမ်ကြီးကနေတစ်ဆင့် ပစိဖိတ်သမုဒ္ဒရာကို လှမ်းမျှော်ကြည့်ရှုနိုင်ပြီး အပန်းဖြေဖို့နေရာကောင်းကိုပိုင်ဆိုင်ထားတာပါ။ ဒါပေမဲ့ Leonardo ဟာ ထိုအိမ်ကြီးကို (၂၀၁၆) ခုနှစ်တုန်းက ဒေါ်လာ (၁၁) သန်းဝန်းကျင်နဲ့ရောင်းချဖို့ကြိုးစားခဲ့ပေမယ့် မရောင်းဖြစ်ခဲ့ပါဘူး ။လက်ရှိချိန်မှာတော့ ဒေါ်လာ (၂.၁) သန်းခန့်ထိ ကျဆင်းသွားပြီဖြစ်တယ်လို့သိရပါတယ်။

ဒေါ်လာ (၃.၆၇) သန်းတန် ဇိမ်ခံအိမ်ကြီး



Leonardo ဟာ နယူးယော့ခ်မှာလည်း ဇိမ်ခံအိမ်ကြီးတစ်လုံးပိုင်ဆိုင်ထားပါသေးတယ်။ Leonardo ဟာ (၂၀၀၈) ခုနှစ်တုန်းက (၃၂) ထပ်အမြင့်ရှိတဲ့တိုက်ကနေ တိုက်ခန်းကျယ်တစ်ခန်းကို ဒေါ်လာ (၃.၆၇) သန်းနဲ့ဝယ်ယူခဲ့သလို (၂၀၁၄)  ခုနှစ်မှာလည်း ဒေါ်လာ (၈) သန်းတန် တိုက်ခန်းတစ်ခန်းကိုထပ်ပြီးဝယ်ယူခဲ့ပါသေးတယ်။ထိုတိုက်ခန်းဟာဆိုရင် စတုရန်းပေ (၁၀၀၀) ကျယ်ဝန်းပြီး Hudson မြစ်ရဲ့ရှုခင်းကိုလည်းလှမ်းမျှော်ကြည့်ရှုနိုင်တယ်လို့သိရပါတယ်။

ဒီလိုခမ်းနားကြီးကျယ်လှတဲ့ဇိမ်ခံအိမ်ကြီးတွေအပြင် Leonardo ဟာ ဒေါ်လာ (၁.၇၅) သန်းတန်ဖိုးရှိ ကျွန်းတစ်ကျွန်းကို လွန်ခဲ့တဲ့ ၁၄နှစ်ကဝယ်ယူခဲ့သေးတယ်လို့သိရပါတယ်။ အဲဒီကျွန်းဟာ (၁၀၄) ဧကအကျယ်အဝန်းရှိပြီး Blackadore Caye လို့အမည်ရတဲ့ Resort တစ်ခုအဖြစ် ပြောင်းလဲဖန်တီးခဲ့တာဖြစ်ပါတယ်။ အဲဒီ Resort မှာ ဘန်ဂလို (၃၆) လုံး ၊အိမ် (၃၆) လုံးဖွဲ့စည်းထားပြီး (၂၀၂၀) ခုနှစ်ကဖွင့်လှစ်ခဲ့ပြီးဖြစ်တယ်လို့ သိရပါတယ်။

အခုပြောပြခဲ့တာတွေကတော့ Leonardo ရဲ့ခမ်းနားကြီးကျယ်လှတဲ့ဇိမ်ခံအိမ်ကြီးတွေ၊ ပိုင်ဆိုင်မှုတွေအကြောင်းပဲဖြစ်ပါတယ်။ မိတ်ဆွေတို့ရော Leonardo ရဲ့အိမ်ကြီးတွေထဲက တစ်အိမ်ကိုသာပိုင်ဆိုင်ရမယ်ဆိုရင် ဘယ်အိမ်ကြီးကိုပိုင်ဆိုင်ချင်လဲ။ ပိုင်ဆိုင်ရရင် ဘယ်လိုမျိုးဖွဲ့စည်းတည်ဆောက်ပုံမျိုးလုပ်ချင်လဲ၊ မှတ်ချက်မှာ ပြောပြခဲ့ကြပါဦး။ 

နောက်တစ်ပတ်တွေမှာလည်း ကမ္ဘာတစ်ဝှမ်းက ထူးထူးခြားခြားအိမ်ကြီးတွေနဲ့ စိတ်ဝင်စားစရာကောင်းတဲ့ဗဟုသုတွေကို ပြောပြပေးသွားဦးမှာမို့ Shwe Property Website ထဲကိုလာရောက်လည်ပတ်ဖတ်ရှု့ပေးကြပါဦးလို့ ဖိတ်ခေါ်လိုက်ပါရစေနော်။

Posted By : Ra Wai (ShweProperty.com)