မြန်မာနိုင်ငံအတွင်းရှိ ရောင်းရန်နှင့် ငှားရန်ရှိသော အိမ်ခြံမြေများ

Property Titles

ခုံးကျော်တံတား ဆောက်လုပ်ရေး စီမံကိန်းများ၌ ကရိန်း၊ မြေတူးစက် စသည့် စက်ယန္တရားကြီးများ အသုံးပြုရာတွင် ယာဉ်များ၊ လမ်းသွားလမ်းလာ ပြည်သူများနှင့် များစွာ နီးကပ်နေ၍ စိုးရိမ်နေရ

By Eleven Medai Group, Shweproperty.com

Updated at 18 October 2015

ခုံးကျော်တံတား ဆောက်လုပ်ရေး စီမံကိန်းများ၌ ကရိန်း၊ မြေတူးစက် စသည့် စက်ယန္တရားကြီးများ အသုံးပြုရာတွင် ယာဉ်များ၊ လမ်းသွားလမ်းလာ ပြည်သူများနှင့် များစွာ နီးကပ်နေ၍ စိုးရိမ်နေရ

ခုံးကျော်တံတား ဆောက်လုပ်ရေး စီမံကိန်းများ၌ ကရိန်း၊ မြေတူးစက် စသည့် စက်ယန္တရားကြီးများ အသုံးပြုရာတွင် ယာဉ်များ၊ လမ်းသွားလမ်းလာ ပြည်သူများနှင့် များစွာ နီးကပ်နေ၍ စိုးရိမ်နေရ

By Eleven Medai Group, Shweproperty.com

Updated at 18 October 2015

ရန်ကုန်မြို့ရှိ ခုံးကျော်တံတား ဆောက်လုပ်ရေး စီမံကိန်းများ၌ ကရိန်း (ဝန်ချီစက်)၊ မြေတူးစက်၊ ပိုင်ရိုက်စသည့် စက်ယန္တရားကြီးများ အသုံးပြုရာတွင် လမ်းနံဘေး သွားလာနေသော ယာဉ်များ၊ လမ်းသွားလမ်းလာ ပြည်သူ များနှင့် များစွာ နီးကပ်နေ၍ စိုးရိမ်နေရ ကြောင်း အဆိုပါနေရာ စီမံကိန်းများ အနီးတွင် နေထိုင်သူများက ပြောကြားသည်။

ရန်ကုန်မြို့တွင် လက်ရှိဘဏ္ဍာနှစ်အတွင်း ခုံးကျော်တံတား သုံးစင်းကို တာမွေအဝိုင်း လမ်းငါးခွဆုံ၊ ကုက္ကိုင်းလမ်းဆုံနှင့် ရှစ်မိုင်လမ်းဆုံတို့တွင် ဆောက်လုပ် နေကြခြင်း ဖြစ်ကြောင်း၊ လက်ရှိ ဆောက်လုပ်ရေး လုပ်ငန်းများ အရှိန်အဟုန်မြှင့် လုပ်ဆောင်နေချိန်ဖြစ်ရာ ယင်းလုပ်ငန်းများတွင် အသုံးပြုနေသော ကရိန်းယာဉ်များ၊ မြေတူးစက်များကြောင့် ဘေးပတ်ဝန်းကျင်တွင် သွားလာနေသော ယာဉ်များ၊ လမ်းသွားလမ်းလာ ပြည်သူများအတွက် စိုးရိမ်ထိတ်လန့်မှုများ ဖြစ်ပေါ်နေရသည်ဟု ဆိုကြသည်။

တာမွေအဝိုင်း လမ်းငါးခွဆုံ ခုံးကျော်တံတား ဆောက်လုပ်ရန် လက်ရှိ ဦးချစ်မောင် လမ်းပေါ်တွင် စီမံကိန်း လုပ်ငန်းများ စတင် နေရာ ယခင် ခြောက်လမ်းသွားမှ ယခု နှစ်လမ်းသာ သွားလာနိုင်ပြီး ကျန်သည့် လေး လမ်းကို စီမံကိန်းလုပ်ငန်းများ လုပ်ဆောင်ရန် ကာရံထားခြင်း ဖြစ်ကြောင်း သိရသည်။အနောက် မြင်းပြိုင်ကွင်းလမ်း၏ မူလလမ်း အနေအထားအရ ကျဉ်းမြောင်းသည့် အပြင် လက်ရှိ နှစ်လမ်းသွားသာ သွားလာခွင့်ပေးထားသည့် အခြေအနေကြောင့် ယာဉ်များ ပိတ်ဆို့နေချိန်တွင် စီမံကိန်း လုပ်ငန်းများမှ ကရိန်းများဖြင့် လုပ်ဆောင်နေမှုမှာ များစွာ နီးကပ်နေခြင်းကြောင့် အန္တရာယ်ရှိနိုင်သည့် အနေအထား ဖြစ်နေသည်။

“ခုံးကျော်တံတား ဆောက်လုပ်တဲ့နေရာတွေမှာ ယာဉ်ကြောပိတ်ဆို့မှုတွေ ဖြစ်ပေါ်နေပါတယ်။ အခု တာမွေအဝိုင်း ခုံးကျော်တံတားစီမံကိန်းက ဦးချစ်မောင်လမ်းပေါ်မှာ ကရိန်း၊ မြေတူး ပိုင်ရိုက်စတဲ့ ယန္တရားကြီးတွေနဲ့ လုပ်နေတယ်။ အဲဒီလို လုပ်ဆောင်တဲ့နေရာမှာ အရမ်း နီးကပ်နေတဲ့အတွက် လမ်းသွား လမ်းလာများနဲ့ ဖြတ်သန်း သွားလာတဲ့ ယာဉ်များအတွက် အန္တရာယ် ကြုံနိုင်တဲ့ အနေအထားတွေ ဖြစ်နေပါတယ်”ဟု ဦးချစ်မောင်လမ်းပေါ်တွင် နေထိုင်သူ ဦးကောင်းမြတ်က ပြောကြားသည်။

“ကျွန်တော်က ဦးချစ်မောင်လမ်းပေါ်က ဖြတ်ပြီး အလုပ်ကိုလာရတာ။ ခုံးကျော်တံတား ဆောက်တဲ့ လုပ်ငန်းခွင်ရှိတယ်။ မီးပွိုင့်လည်းရှိတော့ မီးပွိုင့်မိနေတယ်။ အဲဒီအချိန်မှာ တံတား စီမံကိန်း လုပ်ငန်းက ကရိန်းတွေနဲ့ ကွန်ကရစ်တုံးတွေကို ဟိုအမြင့်ကြီးကနေ သယ်နေတာ။ မတော်တဆ ပြုတ်ကျသွားရင် အောက်က သွားနေတဲ့ ကားတွေလူတွေအတွက် အန္တရာယ် အရမ်းကြီးပါတယ်။ မြေပြင်မှာတော့ စက်တွေက စီမံကိန်း ဧရိယာထဲမှာပဲဆိုပေမယ့် အမြင့်ပိုင်းမှာတော့ လမ်းဘက်ကို ရောက်နေတယ်။ တိုက်တွေလည်း ရှိတော့ သွားထိခိုက်မှာ စိုးရိမ်ရပါတယ်”ဟု ဦးချစ်မောင်လမ်းအား ဖြတ်သန်း၍ နေ့စဉ် အလုပ်သွားလာနေသူတစ်ဦးက ပြောကြားသည်။

တာမွေအဝိုင်း လမ်းငါးခွဆုံ ခုံးကျော်တံတား စီမံကိန်းအတွက် ဦးချစ်မောင်လမ်းပေါ်တွင် ကာရံပိတ်ဆို့ လုပ်ဆောင်နေသည့် နေရာအတွင်းမှ လမ်းသွားလမ်းလာများ လမ်းဖြတ်ကူးနိုင်အောင် တောင်မြင်းပြိုင်ကွင်း လမ်းထိပ်တွင် အပေါက်ဖောက်၍ စီစဉ်ပေးထားသော်လည်း စီမံကိန်း လုပ်ဆောင်နေသည့် စက်ယန္တရားကြီးများ နံဘေးမှ သွားလာနေရခြင်းကြောင့် လမ်းကူးသူများ စိုးရိမ် ထိတ်လန့်စွာ သွားလာနေရကြောင်း သိရသည်။

ရန်ကုန်မြို့တွင်း ပုံမှန်ဆောက်လုပ်နေသည့် ဆောက်လုပ်ရေး လုပ်ငန်းခွင်များတွင်ပင် ဆောက်လုပ်သည့် အထပ်အလိုက် လုံခြုံရေး ပိုက်ကွန် အကာအရံများ စနစ်တကျ လုပ် ဆောင်နေချိန်တွင် ယခုဆောက်လုပ်နေ သည့် ခုံးကျော်တံတား စီမံကိန်းများတွင် ထိုကဲ့သို့ လုံခြုံစိတ်ချရသည့် မြင့်မားသော အကာအရံများ မရှိသေးဘဲ ရွှေတောင်ကုမ္ပဏီမှ ဆောက်လုပ်နေသည့် တာမွေအဝိုင်း လမ်းငါးခွဆုံ ခုံးကျော်တံတား လုပ်ငန်းခွင်အား နိုင်လွန်ပိုက်ကွန် စကာများဖြင့် ကာရံသာထားပြီး အန္တရာယ်များကြောင်း ရန်ကုန်မြို့တွင်း သွားလာနေသူများက ဆိုသည်။ အလားတူ Capital Development က တာဝန်ယူ ဆောက်လုပ်နေသည့် ကုက္ကိုင်း ခုံးကျော်တံတားသည် ယင်းကဲ့သို့ နိုင်လွန်ပိုက်ကွန်စကာများ၊ လူတစ်ရပ်ကျော်သာ ရှိသည့် အပြာရောင် အပြားများဖြင့် ကာရံထား သည်ကိုတွေ့ရသည်။

“ခုံးကျော်တံတားဆိုတာ စီမံကိန်းကြီးပဲ။ ဒီလိုစီမံကိန်းကြီးမျိုးဆိုရင် စီမံကိန်း လုပ်ငန်းခွင့်ကို သေချာ ကာရံထားရမှာ။ ဘေးပတ်ဝန်းကျင် မထိခိုက်အောင် တော်တော်မြင့်မြင့်ကို ကာရံထားရမှာ။ ဒါပေမဲ့ အခု ဆောက်နေတဲ့ လုပ်ငန်းခွင်တွေကတော့ လူတစ်ရပ်စာ ကျော်ကျော်လောက်ပဲ ကာရံထားတာရှိတယ်။ ဒါ လုံးဝကို အန္တရာယ်ရှိတယ်”ဟု အငှားယာဉ် မောင်းနှင်သူ ကိုထွန်းကျော်ကလည်း ပြောကြားသည်။

လက်ရှိ ဆောက်လုပ်နေသည့် တံတားများအား လာမည့် ၂၀၁၆ မတ်လကုန်တွင် အပြီးဆောက်လုပ်ရန် ညွှန်ကြားထားပြီး ဆောက်လုပ်ချိန် ခြောက်လခန့် ပေးထားကြောင်း၊ တာမွေအဝိုင်း လမ်းငါးခွဆုံခုံးကျော် တံတားမှာမူ ထုထည်ကြီးမား၍ ခြောက်လနှင့် မလုံလောက်ခြင်းကြောင့် အချိန်ပို ပေးခဲ့ရပြီး တံတားစီမံကိန်းများအား အမြန်ပြီးစီးအောင် ညပိုင်းအချိန်၌ပင် ပိုင်ရိုက်သည့် လုပ် ငန်းများ လုပ်ဆောင်နေခြင်းကြောင့် အနီးပတ်ဝန်းကျင်တွင် ဆူညံမှု၊ တုန်ခါမှုများ ဖြစ်ပေါ်နေကြောင်းလည်း စုံစမ်းသိရသည်။

“တံတားစီမံကိန်းက ည ၂ နာရီအချိန်လောက် ပိုင်ရိုက်တဲ့ အရှိန်ကြောင့် တုန်ခါမှုတွေ ရှိပါတယ်။ အမှန်ဆို အိပ်တဲ့အချိန် အဲဒီလို လုပ်ငန်းတွေ မလုပ်သင့်ဘူး”ဟု တာမွေ အဝိုင်း လမ်းငါးခွဆုံ ခုံးကျော်တံတား စီမံကိန်း အနီး နေထိုင်သူတစ်ဦးက ဆိုသည်။

အငှားယာဉ်မောင်း ကိုထွဋ်က “အခု ဆောက်လုပ်နေတဲ့ ခုံးကျော်တံတား စီမံကိန်း အနီးမှာလည်း ကားတွေသွားဖို့အတွက် တစ်စီးသာ နေရာပေးထားတယ်။ လမ်းကလည်း ကျဉ်း၊ ကားတွေကပိတ်၊ ဒါ့အပြင် စီမံ ကိန်းထဲက စက်ယန္တရား လှုပ်ရှားမှုတွေကြောင့် အန္တရာယ်ဖြစ်မှာကို စိုးရိမ်နေရတယ်”ဟု ပြောကြားသည်။

အလားတူ ကမ္ဘာအေးစေတီလမ်းပေါ်တွင် လုပ်ဆောင်နေသည့် ကုက္ကိုင်းခုံးကျော် တံတား ဆောက်လုပ်ရေး လုပ်ငန်းခွင်အနီး၌လည်း နံဘေးတစ်ဖက်တစ်ချက်တွင် ကားတစ်စီးစာသာ သွားလာ၍ရပြီး မြေကျင်းနက်များ တူးထားသဖြင့် တံတား စီမံကိန်းအတွက် ကာရံထားသည့် ခြံစည်းရိုးနှင့် နီးကပ်စွာ မောင်းနှင်ခြင်း မပြုရန်လည်း သတိပေးထားသည်ဟု ယာဉ်မောင်းများ၏ ပြောကြားချက်အရ သိရသည်။

ထိုသို့ ခုံးကျော်တံတား စီမံကိန်းကြီးမျိုး လုပ်ဆောင်မည်ဆိုပါက တံတားစီမံကိန်း လုပ်ငန်းခွင် အန္တရာယ်ကင်းရှင်းရေး သာမက ဘေးပတ်ဝန်းကျင်တွင် သွားလာနေသူများ၏ အန္တရာယ် ကင်းရှင်းရေး အတွက်ကိုလည်း ထည့်သွင်းစဉ်းစားသည့် အစီအစဉ်များ ရှိသင့်ကြောင်း ရန်ကုန်မြို့ပြဆိုင်ရာ လေ့လာသူ တစ်ဦးက သုံးသပ်သည်။

ယင်းသို့သော အခြေအနေများ ရှိနေခြင်းကြောင့် ရန်ကုန်မြို့တွင်း လုပ်ဆောင်နေသည့် ခုံးကျော်တံတား စီမံကိန်းများအပါအဝင် အခြား ဆောက်လုပ်ရေး လုပ်ငန်းကြီးများတွင်လည်း ယင်းသို့ကရိန်းကြီး၊ စက်ယန္တ ရားကြီးများ စနစ်တကျ လုပ်ဆောင်နိုင်စေရန်အတွက် မြန်မာနိုင်ငံ အင်ဂျင်နီယာ ကောင်စီနှင့် ညှိနှိုင်း၍ စည်းမျဉ်းများ သတ်မှတ်ပေးသွားမည် ဖြစ်ကြောင်း ရန်ကုန်မြို့တော် စည်ပင်သာယာရေး ကော်မတီ၊ အဆောက်အအုံဌာနမှ သိရသည်။

လက်ရှိ ဆောက်လုပ်နေသည့် ခုံးကျော်တံတား လုပ်ငန်းခွင်များကြောင့် အနီးပတ်ဝန်းကျင်တွင် လမ်းတစ်လမ်းစာသာ သွားလာရ၍ ပိတ်ဆို့နေသော်လည်း အဆိုပါနေရာများတွင် ပိတ်ဆို့မှုကို ရှင်းလင်းရန် ယာဉ်ထိန်းရဲ အလုံအလောက် မရှိသည်ကိုလည်း တွေ့မြင်နေရသည်။ ပုံမှန်လောက်သာ ယာဉ်ကြောပိတ်ဆို့ သည့်နေရာများတွင် ယာဉ်ထိန်းရဲ ထားရှိသော်လည်း ယခုယာဉ်ကြော ပိတ်ဆို့မှုများ ပြားသည့် ခုံးကျော်တံတား စီမံကိန်းအနီးတွင် ယာဉ်ထိန်းရဲ မရှိသည့်အတွက်လည်း သွားလာနေသူ ပြည်သူများက ထောက်ပြမှုများ ရှိနေသည်။

လက်ရှိ ဘဏ္ဍာရေးနှစ်အတွင်း အဆိုပါ တံတားသုံးစင်းကို ဘဏ္ဍာငွေကျပ် ကျပ် ၅၄ ဒသမ ၃၅ ဘီလျံအကုန်အကျခံ၍ တည်ဆောက်မည်ဖြစ်ပြီး ယခင်တည်ဆောက်ခဲ့သည့် လှည်းတန်း၊ ရွှေဂုံတိုင်၊ဘုရင့်နောင်၊ မြေနီကုန်းစသည့် တံတားလေးစင်းမှာ ယာဉ်ကြောပိတ်ဆို့မှုအား ဖြေရှင်းနိုင်ခြင်း မရှိခဲ့ပေ။ ယင်းခုံးကျော်တံတားလေးစင်းအတွက် ငွေကျပ် ၇၀ ဘီလျံနီးပါး အသုံးပြုခဲ့သည်။

“ခုံးကျော်တံတား စီမံကိန်းက ဒီဘတ်ဂျက်နှစ် အကုန်မပြီးနိုင်ဘူး။ ဒါပေမဲ့ ဘဏ္ဍာငွေကတော့ ကျပြီးသား။ ပိုရင်လည်း ပြန်အပ်ရမှာဆိုတော့ ဒီဘက်ဂျက်အတွင်းမှာ ကုန်အောင်သုံးမယ့် သဘောရှိတယ်။ ဒီစီမံကိန်း တွေကြောင့် ကားတွေလည်း အရမ်းပိတ်တယ်။ နောက်ပြီး အခြား နောက်ဆက်တွဲ ပြဿနာ တွေလည်း ရှိသေးတယ်။ လုံခြုံရေးကာရံမှု အပိုင်းမှာ အားနည်းတာတို့ ဘာတို့လည်း ပြည်သူလူထုအချို့ တင်ပြလာတာ ရှိတယ်။ ဒါကြောင့် ဒီကိစ္စကို နီးစပ်ရာ လွှွတ်တော်မှာ တင်ပြသွားမှာပါ”ဟု ရန်ကုန်တိုင်းဒေသကြီး လွှတ်တော် ကိုယ်စားလှယ်တစ်ဦးက ပြောကြားသည်။

ထို့သို့ ခုံးကျော်တံတားများက ယာဉ်ကြော ပိတ်ဆို့မှုကို ဖြေရှင်းနိုင်ခဲ့ခြင်း မရှိ၍ ဒုံရင်းမှ ဒုံရင်းပင် ဖြစ်ခဲ့ပြီး ဆောက်လုပ်ခွင့်ရရှိခဲ့သည့် နာမည်ကြီး ခရိုနီကုမ္ပဏီများ၏ အကျိုးစီးပွားအတွက်သာ ဖြစ်ခဲ့ကြသည်။

ယခုဆောက်လုပ်နေသည့် ခုံးကျော်တံတားသုံးစင်းအား ဆောက်လုပ်ခွင့် တင်ဒါခေါ်ယူခဲ့ရာတွင် တာမွေအဝိုင်း လမ်းငါးခွဆုံ ခုံးကျော်တံတားကို အစိုးရနှင့် နီးစပ်သည့် နာမည်ကြီး ရွှေတောင်ကုမ္ပဏီ၊ ကုက္ကိုင်း လမ်းဆုံခုံးကျော်တံတားအား Capital Development ကုမ္ပဏီနှင့် ရှစ်မိုင်လမ်းဆုံ ခုံးကျော်တံတားအား Crown Advanced ကုမ္ပဏီတို့က ဆောက်လုပ်ခွင့် ရရှိခဲ့ကြခြင်း ဖြစ်သည်။ ယင်းအထဲမှ ရွှေတောင်ကုမ္ပဏီသည် ယခင် လှည်းတန် ခုံးကျော်တံတားကို ဆောက်လုပ်ခွင့် ရရှိခဲ့သော ကုမ္ပဏီဖြစ်ပြီး Capital Development ကုမ္ပဏီသည်လည်း ရွှေဂုံတိုင်နှင့် မြေနီကုန်း ခုံးကျော်တံတား နှစ်စင်းကို ဆောက်လုပ်ခွင့် ရရှိခဲ့ပြီးဖြစ်သည်။

Ref : Eleven Media Group

Photo Credit : Eleven Media Group

Posted By : Myat Minn

Follow Us On