ရန်ကုန်တိုင်းဒေသကြီး မြောက်ဥက္ကလာပမြို့နယ်အတွင်းရှိ ဟိုတယ်အချို့တို့မှ ရွှေလှေချောင်းပေါ်သို့ ကျူးကျော် တည်ဆောက်ထားမှုများကို သတ်မှတ်ချိန်အတွင်း မဖျက်သိမ်းပေးပါက အရေးယူသွားမည်ဖြစ်ကြောင်း ရန်ကုန်မြို့တော်ဝန် ဦးမောင်မောင်စိုးက ယခုလ ၁၈ ရက်ကကျင်းပသော လွှတ်တော်အစည်းအဝေးတွင် ပြောသည်။
ရွှေလှေချောင်းပေါ်တွင် ဟိုတယ်များက ကျူးကျော် တည်ဆောက်ထားမှုများနှင့် စပ်လျဉ်း၍ ကျူးကျော်ဆောက်လုပ်မှုများသည် မည်သည့်ခွင့်ပြုချက်ဖြင့် ဆောင်ရွက်ခြင်းဖြစ်သည်၊ ထိုသို့ဆောင်ရွက်ထားခြင်း ကြောင့် ရေစီးရေလာကောင်းမွန်စေရန် လုပ်ဆောင်ရာ တွင် အခက်အခဲများဖြစ်ပေါ်နေသဖြင့် မည်ကဲ့သို့ အရေးယူဆောင်ရွက်မည်ကိုသိရှိလိုကြောင်း မြောက်ဥက္ကလာပမြို့နယ်မှ တိုင်းဒေသကြီးလွှတ်တော်ကိုယ်စားလှယ် ဦးမြင့်လွင်က တိုင်းဒေသကြီးလွှတ်တော်တွင် ကြယ်ပွင့်ပြ မေးခွန်းမေးမြန်းခဲ့သည်။
ကျောက်စိမ်းဟိုတယ်၊ ချမ်းမြေ့ဟိုတယ်High Five Hotel, Hi Star Hotel များမှာ ရွှေလှေချောင်းပေါ်သို့ ကွန်ကရစ်အခိုင်အမာခင်းပြီး ဟိုတယ်နယ်နိမိတ် ကျူးကျော်တည်ဆောက်ထားမှုများကို ဖျက်သိမ်းပေးရန် ရန်ကုန်မြို့တော်စည်ပင်သာယာရေးကော်မတီမှ အကြောင်းကြားထားပြီးဖြစ်သည်။
"ရွှေလှေချောင်းပေါ်မှာ ခွင့်ပြုချက်မဲ့ ဆောက်လုပ် ထားရှိတာတွေကို ၂၆“၂“၂၀၁၉ ရက်မှာ နောက်ဆုံး ထားပြီး ဖျက်သိမ်းဖို့နဲ့ လိုက်နာဆောင်ရွက်ခြင်းမရှိရင် စည်ပင်သာယာတည်ဆဲဥပဒေတွေနဲ့အညီ အရေးယူမှာဖြစ်ကြောင်း သက်ဆိုင်ရာဟိုတယ်တွေကို အကြောင်း ကြားထားပြီးပါပြီ"ဟု ဦးမောင်မောင်စိုးက ပြောသည်။
လက်ရှိ ချောင်းပေါ်တွင် ကျူးကျော်ထားသော အရာများအားလုံးကို ဖျက်သိမ်းပေးရန် မြို့နယ်ရုံးတွင် ခံဝန်လက်မှတ်ရေးထိုးခိုင်းထားပြီးဖြစ်ကြောင်း၊ ချောင်းပေါ်တွင် တည်ဆောက်ထားသော အဖီများ၊ ကားပါကင်များ၊ မီးစက်များကိုလည်း ဖယ်ရှားပြီးဖြစ်ကာ မြောင်းဖုံးများ ဖယ်ရှားရန်သာ ကျန်ရှိတော့သည်ဟုဆိုသည်။ ဖျက်သိမ်းရန် ကျန်ရှိသည်များအားလုံးကို အပြီးသတ်ဖျက်သိမ်းပေး ရမည့် ရက်သတ်မှတ်ထားပြီး သတ်မှတ်ရက်အတွင်း မဖျက် သိမ်းပါက တရားစွဲဆိုသွားရန်ရှိကြောင်း ၎င်းကဆိုသည်။
ယခင်က ရွှေလှေချောင်းသည် ပေ ၂၀ ကျော်ကျယ်ဝန်းပြီး စပါးစက်လှေများ၊ ဝါး၊ ဓနိစက်လှေများ မင်္ဂလာဒုံမြို့နယ်အထိ ဝင်ရောက်သွားလာနိုင်သော ချောင်းဖြစ်သော်လည်း ယခုအခါချောင်းတည်ရှိရာ မြောက်ဥက္ကလာပမြို့နယ်၊ (ဃ) ရပ်ကွက်တွင် ဟိုတယ်ဇုန်တည်ဆောက်လိုက်သောကြောင့် ချောင်းအကျယ်မှာ ငါးပေခန့်သာရှိတော့ကြောင်း ဦးမြင့်လွင်ကဆိုသည်။
"ချောင်းက ကျဉ်းသွားတဲ့အတွက် ရေစီးရေလာပိတ် ဆို့တဲ့အခါ ချောင်းထဲကရေတွေက ရပ်ကွက်ထဲမှာ ရေကြီးရေလျှံမှုတွေ ဖြစ်ပေါ်နေရပါတယ်"ဟု ဦးမြင့်လွင် က ပြောသည်။
အဆိုပါဟိုတယ်များသည် ချောင်းမြေကို ကျူးကျော်ထားသည့်အပြင် ကွန်ကရစ်ခင်းကာ ကားပါကင်များ၊ မီးစက်များထားရှိခြင်းနှင့် အဖီများ ချထားခြင်းကြောင့်ရေစီးရေလာအတွက် ချောင်း၊ မြောင်းများ တူးဖော်သည့်အခါ စက်များဝင်ရောက်၍မရနိုင်သော အခြေအနေများ ဖြစ်ပေါ်နေကြောင်းလည်း ဦးမြင့်လွင်က ဆိုသည်။
ရွှေလှေချောင်းသည် မြောက်ဥက္ကလာပမြို့နယ်အပါ အဝင်၊ မရမ်းကုန်းမြို့နယ်၊ မင်္ဂလာဒုံမြို့နယ်တို့ကို ဖြတ် သန်းစီးဆင်းနေပြီး ငမိုးရိပ်ချောင်းထဲသို့ စီးဝင်နေသော ချောင်းမကြီးတစ်ခုလည်းဖြစ်သောကြောင့် ရေစီးရေလာကို အဓိကအားထားသုံးပြုနေရသော ချောင်းတစ်ခုဖြစ်သည်။
ချောင်း၏အစအဆုံးအရှည်မှာ ပေ ၄၆၅၀ ရှိပြီး ချောင်း၏ အထက်ပိုင်း ဖောင်တော်ဦးဘုရားလမ်းမှ ရထားလမ်းအထိ အရှည် ပေ ၉၀ဝ နှင့် အကျယ် ၁၄ ပေ၊ ချောင်း၏အလယ်ပိုင်း ရထားလမ်းမှ သုဓမ္မာလမ်းထိ အရှည် ပေ ၁၆၅၀ နှင့် အကျယ် ၁၆ ပေခန့်ရှိကာ လက်ရှိကျူးကျော်မှုများရှိနေသော ဟိုတယ်ဇုန်အပိုင်းတွင် အရှည် ၈၀ဝ ခန့်ရှိပြီး အကျယ်မှာ ကိုးပေခန့်သို့ ကျဉ်းမြောင်းသွားကြောင်း၊ ချောင်း၏ အောက်ပိုင်း သုဓမ္မာလမ်းမှ ငမိုးရိပ်ချောင်းထိ အရှည် ပေ ၂၁၁၀ နှင့် အကျယ် ၁၅ ပေခန့် တည်ရှိနေကြောင်း မြို့တော်ဝန်က ပြောသည်။
Ref : Myanmar Times
Photo Credit : Mmtimes
Posted By : Sint Sint (ShweProperty.com)
အိမ်ခြံမြေပြပွဲများ
နောက်ဆုံးရ သတင်းများ
.png)
5.png)
4.png)
ဝယ်ရန်
ငှားရန်
စီမံကိန်း အသစ်များ
အခြားအိမ်ခြံမြေများ
