ဆောက်လုပ်ရေးနှင့် အိမ်ရာဖွံ့ဖြိုးရေးဘဏ် (CHD) တွင် ကျပ်သိန်း ၂၀ နှင့်အထက် စုဆောင်းထားသူများအနေဖြင့် လှိုင်သာယာမြို့နယ်ရှိ ရွှေလင်ပန်းတန်ဖိုးနည်း အိမ်ရာနှင့် ဒဂုံဆိပ်ကမ်းမြို့နယ်ရှိ ကနောင် တန်ဖိုးနည်းအိမ်ရာများ ဝယ်ယူရန် ဇန်နဝါရီ ၈ ရက်မှ စတင်လျှောက်ထားနိုင်မည်ဖြစ်ကြောင်း မြို့ပြနှင့်အိမ်ရာဖွံ့ဖြိုးရေးဦးစီးဌာနမှ သတင်းထုတ်ပြန်ထားသည်။
မြို့ပြနှင့်အိမ်ရာဖွံ့ဖြိုးရေးဦးစီးဌာနမှ လှိုင်သာယာမြို့နယ်ရှိ ရွှေလင်ပန်း တန်ဖိုးနည်းအိမ်ရာနှင့် ဒဂုံဆိပ်ကမ်းမြို့နယ်ရှိ ကနောင်တန်ဖိုးနည်းအိမ်ရာတို့ကို ဆောက်လုပ်ရေးနှင့် အိမ်ရာဖွံ့ဖြိုးရေးဘဏ်တွင် အိမ်ရာစုဆောင်းငွေစာရင်း (Housing Savings Deposit) ဖွင့်လှစ်စုဆောင်းထားရှိသူများအနက် ကျပ်သိန်း ၂၀ နှင့် အထက် စုဆောင်းငွေရှိသူများကို ရောင်းချပေးသွားမည်ဖြစ်သည့်အတွက် တိုက်ခန်းဝယ်ယူလိုသူများအနေဖြင့် မြို့ပြနှင့့်အိမ်ရာဖွံ့ဖြိုးရေး ဦးစီးဌာန (ရန်ကုန်) တွင် ဇန်နဝါရီ ၈ ရက်မှ စတင်၍ လျှောက်လွှာများရယူကာ စတင်လျှောက်ထားနိုင်ပြီဖြစ်ကြောင်း သိရသည်။
အသေးစိတ်သိရှိလိုပါက မြို့ပြနှင့်အိမ်ရာ ဖွံ့ဖြိုးရေးဦးစီးဌာနဖုန်း ၀၁-၃၉၂၅၂၄၊ ဆောက်လုပ်ရေးနှင့် အိမ်ရာဖွံ့ဖြိုးရေးဘဏ် ဖုန်း ၀၉၇၇၁၀၄၉၆၂၇၊ ၀၁-၃၇၁၈၅၆၊ ၀၁- ၃၇၁၂၅၄ သို့ ရုံးချိန်အတွင်း ဆက်သွယ်စုံစမ်းနိုင်ကြောင်း သိရသည်။
တန်ဖိုးနည်းအိမ်ရာများ ဝယ်ယူရန်အတွက် တိုက်ခန်းတန်ဖိုး၏ ကနဦးပေးသွင်းငွေကို ယခင် ရာခိုင်နှုန်း ၃၀ မှ လက်ရှိအချိန်တွင် ရာခိုင်နှုန်း ၂၀ အထိ လျှော့ချပြီး ကျန်သည့် ရာခိုင်နှုန်း ၈၀ ကို နှစ်ရှည်ချေးငွေဖြင့် ရောင်းချသွားမည်ဖြစ်ကြောင်း မြို့ပြနှင့် အိမ်ရာဖွံ့ ဖြိုးရေးဦးစီးဌာနမှ သိရသည်။
မြို့ပြနှင့်အိမ်ရာဖွံ့ဖြိုးရေးဦးစီးဌာနမှ ရောင်းချမည့် တန်ဖိုးနည်း၊ တန်ဖိုးသင့်နှင့် တန်ဖိုးမျှတအိမ်ရာများကို နှစ်ရည်အရစ်ကျစနစ်ဖြင့် ဝယ်ယူနိုင်ရန်အတွက် ဆောက်လုပ်ရေးနှင့် အိမ်ရာဖွံ့ဖြိုးရေးဘဏ်၏ မည်သည့် ဘဏ်ခွဲတွင်မဆို အိမ်ရာစုဆောင်းငွေစာရင်း (Housing Savings Deposit) ကို ကျပ် ငွေ ၁၀,၀၀၀ နှင့် စတင်၍ဖွင့်လှစ်ပြီး မိမိဝယ်ယူလိုသော တိုက်ခန်းတန်ဖိုး၏ ရာခိုင်နှုန်း ၃၀ ကိုပြည့်မီအောင် CHD ဘဏ်တွင် စုဆောင်းထားရမည် ဖြစ်သည်။
လက်ရှိအချိန်တွင်မူ အဆိုပါတိုက်ခန်း တန်ဖိုး၏ ရာခိုင်နှုန်း ၃၀ ကိုပြည့်မီရန် အချို့သော ပြည်သူများမှာ အခက်အခဲအချို့ရှိနေသည်ဟု သိရသဖြင့် ရာခိုင်နှုန်း ၃၀ မှ ရာခိုင်နှုန်း ၂၀ အထိ လျှော့ချပေးထားခြင်း ဖြစ်သည်။
လစဉ်စုဆောင်းရမည့် ငွေပမာဏကို သတ်မှတ်ထားခြင်းမရှိဘဲ မိမိဝင်ငွေပေါ်မူတည်၍ လစဉ်ပုံမှန် စုဆောင်းရမည်ဖြစ်ကြောင်း၊ စုဆောင်းထားစဉ်တွင်လည်း မိမိစုဆောင်းငွေအပေါ် တစ်နှစ်လျှင် ၈ ဒသမ ၅ ရာခိုင်နှုန်း အတိုးရရှိမည် ဖြစ်သည်။
အစိုးရနှင့် ဆောက်လုပ်ရေးလုပ်ငန်းရှင်များအသင်းတို့ ပူးပေါင်းကာ ဝန်ထမ်းများအတွက် အငှားအိမ်ရာနှင့် အခြားအရောင်းအိမ်ရာများပါဝင်ပြီး အိမ်အခန်းပေါင်း ၇၀၀ ခန့်ရှိသည့် ကနဦးတန်ဖိုးနည်းအိမ်ရာ စီမံကိန်း (Pilot Project) ကို မြို့ကြီးသုံးခုတွင် စတင်ဆောင်ရွက်နေပြီး စီမံကိန်းလျာထားချက် ရာခိုင်နှုန်း ၅၀ သည် ၂၀၁၈ ခုနှစ် အတွင်းပြီးစီးမည်ဖြစ်ကြောင်း မြို့ပြနှင့် အိမ်ရာဖွံ့ဖြိုးရေး ဦးစီးဌာနမှ သိရသည်။
Ref & Photo Credit : Eleven Media
Posted By : Ra Wai (ShweProperty.com)
အိမ်ခြံမြေပြပွဲများ
နောက်ဆုံးရ သတင်းများ
.png)
5.png)
4.png)
ဝယ်ရန်
ငှားရန်
စီမံကိန်း အသစ်များ
အခြားအိမ်ခြံမြေများ
