ရန်ကုန်တိုင်းဒေသကြီးအတွင်းရှိ ဆောက်လုပ်ရေးလုပ်ငန်းခွင်များ ဆောက်လုပ်ရေးကြီးကြပ်မှုကော်မတီထံ လျှောက်ထားပြီး တိုင်းအစိုးရ၏ ခွင့်ပြုချက်ဖြင့် ပြန်လည် လုပ်ကိုင်ခွင့်ပြုမည်ဖြစ်၍ လုပ်ငန်းအချို့ ပြန်လည် လည်ပတ်လျက်ရှိကြောင်း အောက်တိုဘာ ၁၃ ရက်တွင် ရန်ကုန်တိုင်းဒေသကြီး ဆောက်လုပ်ရေးကြီးကြပ်မှုကော်မတီ အတွင်းရေးမှူး ဦးမျိုးမြင့်က ပြောကြားသည်။
ဆောက်လုပ်ရေးလုပ်ငန်းများ ပြန်လည် လည်ပတ်နိုင်ရန်အတွက် လုပ်ငန်းခွင်အတွင်း ကျန်းမာရေးနှင့် အားကစားဝန်ကြီးဌာနက ထုတ်ပြန်ထားသည့် စည်းကမ်းချက်များနှင့်အညီ ရန်ကုန်တိုင်းဒေသကြီး ဆောက်လုပ်ရေးကြီးကြပ်မှု ကော်မတီထံသို့ လျှောက်ထားနိုင်ကြောင်း၊ ထိုမှတစ်ဆင့် ကော်မတီက စိစစ်မှုများပြုလုပ်ပြီး ရန်ကုန်တိုင်းဒေသကြီးအစိုးရအဖွဲ့က ခွင့်ပြုပါက ပြန်လည် လုပ်ကိုင်ခွင့်ပြုမည် ဖြစ်ကြောင်း သိရသည်။
ဆောက်လုပ်ရေးလုပ်ငန်း သဘာဝအရ ခေတ္တရပ်ဆိုင်း၍မရဘဲ အဆုံးအထိ တစ်ဆက်တစ်စပ်တည်း လုပ်ကိုင်ဆောင်ရွက်ရသော သဘာဝရှိသဖြင့် ရန်ကုန်တိုင်းအတွင်းရှိ ဆောက်လုပ်ရေးလုပ်ငန်းအားလုံး၏ ၁၀ ရာခိုင်နှုန်းခန့်ကို ရန်ကုန်တိုင်းဒေသကြီး အစိုးရအဖွဲ့၏ စိစစ်ကြီးကြပ်မှုအောက်တွင် ဆက်လက် ဆောင်ရွက်ခွင့်ပြုသင့်ကြောင်း COVID-19 ကာကွယ် ထိန်းချုပ် ကုသရေး အမျိုးသားအဆင့် ဗဟိုကော်မတီက အောက်တိုဘာ ၄ ရက်တွင် ဆောက်လုပ်ရေးဝန်ကြီးဌာန (ရန်ကုန်တိုင်းဒေသကြီးအစိုးရအဖွဲ့) သို့ အကြောင်းကြားခဲ့ကြောင်း သိရသည်။
ထိုသို့ အကြောင်းကြားပြီးနောက် ရန်ကုန်တိုင်းအတွင်းရှိ ဆောက်လုပ်ရေး လုပ်ငန်းကြီးအချို့ ပြန်လည် လည်ပတ်ခဲ့ကြောင်း၊ အောက်တိုဘာ ၁၀ ရက် ကျန်းမာရေးနှင့် အားကစားဝန်ကြီးဌာန၏ ထုတ်ပြန်ချက်၌ ဆောက်လုပ်ရေးလုပ်ငန်းများ ပြန်လည်ပါဝင်လာသည့်အတွက် အောက်တိုဘာ ၁၂ ရက်တွင် ရန်ကုန်တိုင်းအတွင်းရှိ ဆောက်လုပ်ရေး လုပ်ငန်းအချို့ လုပ်ငန်းပြန်လည် လည်ပတ်လျက်ရှိကြောင်း သိရသည်။
“၁၀ ရာခိုင်နှုန်းက ပထမအဆင့်တုန်းက ပြောတာ။ အောက်တိုဘာ ၁၀ ရက်နေ့ကျတော့ တစ်ခါပြန် ထုတ်ပြန်ထားတယ်။ ၁၀ ရာခိုင်နှုန်း မဟုတ်တော့ဘဲ ရန်ကုန်တိုင်းဒေသကြီး ဆောက်လုပ်ရေး ကြီးကြပ်မှုကော်မတီကို လျှောက်ပြီးတော့၊ အစိုးရအဖွဲ့ကိုတင်ပြီးတော့ ခွင့်ပြုမှာပေါ့။ ကျန်းမာရေးဝန်ကြီးဌာန က ထုတ်ပြန်ထားတဲ့ စည်းမျဉ်းစည်းကမ်းတွေ ရှိတယ်။ အဲဒါတွေ လိုက်နာပြီးရင် စိစစ်ပြီးတော့ ရန်ကုန်တိုင်းဒေသကြီး အစိုးရအဖွဲ့ကို တင်လိုက်ရင် ခွင့်ပြုရင် ဆက်လုပ်လို့ ရပါတယ်။ ၁၀ ရက်နေ့မှာ ထုတ်တဲ့အမိန့်မှာ ဆောက်လုပ်ရေးလုပ်ငန်းခွင်တွေ ပြန်ပါလာတာပါ။ ပထမ ၁၀ ရာခိုင်နှုန်း ခွင့်ပြုတယ်ဆိုတဲ့ အချိန်မှာတင်တဲ့ လုပ်ငန်းကြီး လေးငါးခု လောက်ကတော့ လည်ပတ်နေပြီ။ အောက်တိုဘာ ၁၂ ရက်နေ့မှာ စလည်ပတ်နိုင်ပြီဆိုလို့ နည်းနည်းပါးပါးတော့ စလည်ပတ်နေပါပြီ။ တင်ပြီးတော့ စစ်ပြီးတော့ ခွင့်ပြုရင် လုပ်လို့ရပြီပေါ့။ တင်ပြဖို့တော့ လိုသေးတာပေါ့။ ရန်ကုန်တိုင်းဒေသကြီး ဆောက်လုပ်ရေးကြီးကြပ်မှုကော်မတီကို တင်ရမှာပါ။ အဲဒီကိုတင်ပြီးရင် ကျွန်တော်တို့ စာရင်းစစ်မယ်။ ပြီးမှ အစိုးရအဖွဲ့ကို တင်ရမှာပါ” ဟု ရန်ကုန်တိုင်းဒေသကြီး ဆောက်လုပ်ရေးကြီးကြပ်မှုကော်မတီ အတွင်းရေးမှူး ဦးမျိုးမြင့်က ပြောကြားသည်။
ကျန်းမာရေးနှင့် အားကစားဝန်ကြီးဌာန၏ စက်တင်ဘာ ၂၀ ရက်က ထုတ်ပြန်ခဲ့သည့် အမိန့်ညွှန်ကြား ထုတ်ပြန်ချက်အရ ရန်ကုန်တိုင်းဒေသကြီးအတွင်းရှိ တည်ဆောက်ရေး လုပ်ငန်းအားလုံးကို ညွှန်ကြားချက်နှင့်အညီ ရပ်ဆိုင်းထားပြီး ဖြစ်သော်လည်း ဆောက်လုပ်ရေးလုပ်ငန်းများ၏ သဘောသဘာဝအရ Bored Pile တူးခြင်းလုပ်ငန်း၊ Girder Launching လုပ်ငန်း၊ အမိုးမိုးခြင်းလုပ်ငန်း ကဲ့သို့သော အချို့သော လုပ်ငန်းများသည် ခေတ္တရပ်ဆိုင်း၍မရဘဲ အဆုံးအထိ တစ်ဆက်တစ်စပ်တည်း လုပ်ကိုင်ရသည့် သဘောသဘာဝရှိကြောင်း၊ အချို့သောလုပ်ငန်းများမှာ ရေတက်ရေကျ အခြေအနေအပေါ် မူတည်၍ ဆောင်ရွက်ရသော သဘောသဘာဝ ရှိကြောင်း၊ ထို့ပြင် အချို့သော လုပ်ငန်းများမှ လုပ်ငန်းခွင်ခြံဝင်း တစ်ခုအတွင်းတွင် အင်ဂျင်နီယာ၊ ပန်းရံမိသားစုတစ်ဖွဲ့မှ လုပ်ငန်းခွင် အပြင်မထွက်ဘဲ အဆိုပါနေရာ၌ပင် နေထိုင်စားသောက်ပြီး အပြီးသတ် ဆောင်ရွက်နေသည့် လုပ်ငန်းအချို့ ရှိပါသဖြင့် အဆိုပါ ဆောက်လုပ်ရေးလုပ်ငန်း အားလုံး၏ (၁၀ ရာခိုင်နှုန်းခန့်) ကို ရန်ကုန်တိုင်းဒေသကြီး အစိုးရအဖွဲ့၏ စိစစ်ကြီးကြပ်မှုအောက်တွင် ဆက်လက် ဆောင်ရွက်ခွင့်ပြု နိုင်ပါရန် ဆောက်လုပ်ရေး လုပ်ငန်းရှင်များအသင်းက တင်ပြခဲ့ခြင်းဖြစ်ကြောင်း သိရသည်။
နောက်ဆုံးရ သတင်းများ
Credit : Eleven Media Group
Posted By : Sint Sint (ShweProperty.com)
အိမ်ခြံမြေပြပွဲများ
နောက်ဆုံးရ သတင်းများ
.png)
5.png)
4.png)
ဝယ်ရန်
ငှားရန်
စီမံကိန်း အသစ်များ
အခြားအိမ်ခြံမြေများ
