လှိုင်သာယာမြို့နယ် ရွှေလင်ဗန်း စက်မှုဇုန်အတွင်း ကျူးကျော်များနှင့် ပတ်သက်၍ အစိုးရအဖွဲ့အနေဖြင့် အမြန်ဆုံး ကိုင်တွယ်ဖြေရှင်းပေးရန် ယမန်နေ့က UMFCCI တွင် ပြုလုပ်သည့် စက်ရုံးလုပ်ငန်းရှင်များနှင့် တိုင်းဒေသကြီး လွှတ်တော် ကော်မတီ အဖွဲ့ဝင်များ တွေ့ဆုံပွဲတွင် လုပ်ငန်းရှင်များက တောင်းဆိုလိုက်သည်။
ရွှေလင်ဗန်းဇုန် စီမံကော်မတီ အတွင်းရေးမှူး ဦးနေလင်းဇင်က “အထောက်အထား မရှိတဲ့ လယ်သမားဆိုသူတွေက အုပ်ချုပ်ရေးမှူး ထောက်ခံစာနဲ့ လုပ်နေတာတွေ ရှိတယ်၊ ခြိမ်းခြောက် ငွေတောင်းမှုကိုလည်း အမှုဖွင့်မရတဲ့ အခြေအနေတွေ ဖြစ်နေတယ်၊ ဒါတွေကို ထိရောက်တဲ့ ဥပဒေနဲ့ အကာအကွယ် ပေးစေလိုပါတယ်” ဟု ပြောသည်။
ကျူးကျော်တချို့က လယ်သမားဟုဆိုကာ လုပ်ငန်းရှင်များကို ဟန့်တားမှုများနှင့် ခြိမ်းခြောက် ငွေတောင်းမှုများ ကြုံတွေ့နေရပြီး တရားဥပဒေ စိုးမိုးရန် လိုအပ်နေကြောင်း ရွှေလင်ဗန်းစက်မှုဇုန် စီမံကော်မတီ ဥက္ကဋ္ဌ ဦးအေးသောင်းက ပြောသည်။
တိုင်းလွှတ်တော် ဘဏ္ဍာရေး၊ စီမံကိန်းနှင့် စီးပွားရေး ကော်မတီ အတွင်းရေးမှူး ဦးကျော်ဇေယျကမူ လယ်သမားများနှင့် ပတ်သက်၍ အငြင်းပွားမှုများ ဖြစ်ပွားလျက်ရှိရာတွင် ၎င်းတို့ အနေဖြင့် လယ်သမား ဟုတ်သည် ဖြစ်စေ၊ မဟုတ်သည် ဖြစ်စေ ခေါ်ယူ ညှိနှိုင်းမှုများ ဆောင်ရွက်ရာတွင် စက်မှုဇုန် ရုံးခန်းသို့ လာရောက်သည့် အချက်ကပင် ရိုးသားမှုကို ပြနေကြောင်း ပြောဆိုသည်။
သို့သော် စက်ရုံများရှေ့တွင် တဲထိုးပိတ်ဆို့ကာ လယ်ယာမြေ အငြင်းပွားမှုဖြင့် ငွေတောင်းခံမှုများတွင် သက်ဆိုင်ရာ ဌာနဆိုင်ရာများက ဖြေရှင်း မပေးနိုင်သည့်အတွက် နှစ်ဖက်ညှိနှိုင်းကာ ကျပ် ၂၅ သိန်းမှ ကျပ်သိန်း ၁၂၀ဝ အထိ ပေးခဲ့ရမှုများ ရှိကြောင်း လုပ်ငန်းရှင်များက ပြောသည်။
ရန်ကုန်တိုင်းဒေသကြီး လွှတ်တော် ဥပဒေကြမ်းကော်မတီ အတွင်းရေးမှူး ဦးဝင်းမောင် “ကျူးကျော်တွေနဲ့ ပတ်သက်လို့ ဌာနဆိုင်ရာ လုပ်ထုံးလုပ်နည်းတွေက အရမ်းအားနည်းပါတယ်၊ ဥပဒေအရလည်း အားနည်းမှုတွေက ကျူးလွန်သူတွေကို ထပ်ပြီး လုပ်နိုင်ဖို့ တွန်းအားပေးနေသလိုပါပဲ” ဟု ပြောသည်။
ကျူးကျော်များနှင့် ပတ်သက်၍ လက်ရှိအစိုးရ၏ ကိုင်တွယ်ဖြေရှင်းပုံကို လုပ်ငန်းရှင်တဦးက ဝေဖန်ခဲ့ရာ ဆွေးနွေးပွဲအတွင်း သဘောထား ကွဲလွဲမှုဖြစ်ပေါ်ခဲ့ပြီး တိုင်းလွှတ်တော် ဘဏ္ဍာရေး၊ စီမံကိန်းနှင့် စီးပွားရေးကော်မတီ အတွင်းရေးမှူး ဦးကျော်ဇေယျက လုပ်ငန်းရှင်များ အနေဖြင့် တဖက်သတ် ပြောကြားနေသည်ဟုဆိုကာ ဆွေးနွေးပွဲမှ ထွက်ခွာသွားခဲ့သည်။
လုပ်ငန်းရှင်များ အနေဖြင့် ခြိမ်းခြောက် ငွေတောင်းခံရမှုများ ရှိပါက တိကျစွာ စာရေးသား တိုင်ကြားစေလိုကြောင်းနှင့် ထိရောက်သော ဥပဒေများနှင့် ကိုင်တွယ်မှသာ ဖြေရှင်းနိုင်မည်ဖြစ်သည့်အတွက် အားလုံး ပူးပေါင်းဆောင်ရွက်ကြရန် ရန်ကုန်တိုင်း ရဲတပ်ဖွဲ့မှ ရဲမှူးကြီး မျိုးဆွေက အကြံပြု တိုက်တွန်း ခဲ့သည်။
တိုင်းလွှတ်တော် ဘဏ္ဍာရေး၊ စီမံကိန်းနှင့် စီးပွားရေးကော်မတီ ဥက္ကဋ္ဌ ဒေါ်စန္ဒာမင်းက ဆွေးနွေးချက်များအပေါ် လွှတ်တော် ကော်မတီ အနေဖြင့် ဆုံးဖြတ်၍မရဘဲ အစီအရင်ခံစာ ရေးကာ လွှတ်တော်မှတဆင့် တိုင်းဒေသကြီး အစိုးရအဖွဲ့ထံ တင်ပြသွားမည် ဖြစ်ကြောင်း ပြောသည်။
Ref & Photo Credit : Irrawaddy
Posted By : Myat Minn
အိမ်ခြံမြေပြပွဲများ
နောက်ဆုံးရ သတင်းများ
ဝယ်ရန်
ငှားရန်
စီမံကိန်း အသစ်များ
အခြားအိမ်ခြံမြေများ
