အိမ်ခြံမြေဝန်ဆောင်မှု ဥပဒေကြမ်းအရ အိမ်ခြံမြေဝန်ဆောင်မှုလုပ်ငန်းများတွင် နိုင်ငံခြားသားများ ရာနှုန်းပြည့် ရင်းနှီးမြှုပ်နှံလုပ်ကိုင်ခွင့်ပြုမထားကြောင်း မြန်မာနိုင်ငံ အိမ်ခြံမြေလုပ်ငန်း ဖွံ့ဖြိုးတိုးတက်ရေးအသင်း၏ ဒုတိယဥက္ကဌ ဦးအောင်ထွန်းက သြဂုတ် ၃ ရက်က ပြုလုပ်ခဲ့သော ဥပဒေကြမ်းနှင့် ပတ်သက်သည့် သတင်းစာရှင်းလင်းပွဲတွင် ပြောသည်။
အဆိုပါဥပဒေမူကြမ်းကို ပြည်ထောင်စုလွှတ်တော်ဥပဒေရေးရာနှင့် အထူးကိစ္စရပ်များ လေ့လာဆန်းစစ်သုံးသပ်ရေးကော်မရှင်နှင့် မြန်မာနိုင်ငံ အိမ်ခြံမြေဖွံ့ဖြိုးတိုးတက်ရေးအသင်းတို့က ဦးဆောင်ကာ ၂ဝ၁၆ ခုနှစ်တွင် စတင်ရေးဆွဲခဲ့သည်။ အဆိုပါဥပဒေကြမ်းအရ အိမ်ခြံမြေဝန်ဆောင်မှုလုပ်ငန်းများတွင် နိုင်ငံခြားသားများကို ဖက်စပ်လုပ်ကိုင်ရန် ခွင့်ပြုထားသော်လည်း ရာနှုန်းပြည့် ရင်းနှီးမြှုပ်နှံမှုကိုမူ ခွင့်ပြုမထားကြောင်း သိရသည်။
နိုင်ငံသားလုပ်ငန်းရှင်များသည် နိုင်ငံခြားသားကုမ္ပဏီများနှင့် နည်းပညာ၊ ငွေကြေးရင်းနှီးမြှုပ်နှံနိုင်မှု၊ စီမံခန့်ခွဲမှုစသည်တို့တွင် အားနည်းနေသောကြောင့် ထိုကန့်သတ်ချက်များကို ထည့်သွင်းထားခြင်းဖြစ်သည်ဟု ဆိုသည်။
''တကယ်လို့သာ နိုင်ငံခြားသားတွေကို လုပ်ကိုင်ခွင့်ပြုလိုက်မယ်ဆိုရင် သေချာတာက လက်ရှိလုပ်ကိုင်နေတဲ့ အကျိုးဆောင်လုပ်ငန်းတွေ တော်တော်များများက လုပ်ပိုင်ခွင့် အရမ်းနည်းသွားမှာဖြစ်ပါတယ်။ ဒါပေမဲ့ နိုင်ငံခြားသားတွေက မြန်မာနိုင်ငံသားတွေနဲ့ ဖက်စပ်လုပ်ကိုင်မယ်ဆိုရင်တော့ အမ်အိုင်စီ (မြန်မာနိုင်ငံ ရင်းနှီးမြှုပ်နှံမှုကော်မရှင်) ခွင့်ပြုချက်ယူပါ''ဟု ဦးအောင်ထွန်းက ပြောသည်။
အမ်အိုင်စီမှ ခွင့်ပြုချက်ရရှိပါက ဥပဒေအရ ပေါ်ပေါက်လာမည့် ဗဟိုကော်မတီထံတွင် လိုင်စင်လျှောက်ထားပြီး ခွင့်ပြုချက်ရရှိပါက လုပ်ကိုင်နိုင်မည်ဖြစ်သည်။ သို့သော်လက်ရှိတွင်မူ နိုင်ငံခြားသားများသည် နိုင်ငံခြားသားချင်း ချိတ်ဆက်ကာ အိမ်ခြံမြေဝန်ဆောင်မှုလုပ်ငန်းကို လုပ်ကိုင်နေကြကြောင်း အသင်းဥက္ကဌဦးတင်အောင်က ပြောသည်။
''ဒီကနေ နိုင်ငံခြားသားတွေက အသီးသီးကြေညာနေကြတယ်။ ဘာအခွန်မှလည်း မရဘူး။ နိုင်ငံသားတွေရဲ့အခွင့်အရေးကို လုယူနေတယ်။ နိုင်ငံခြားသားတွေ ဒီလိုလုပ်နေပေမဲ့ ဥပေဒမရှိသေးတဲ့အတွက် သူတို့ကို တားမြစ်လို့မရဘူး''ဟု ဦးတင်အောင်က ပြောသည်။
ထို့ပြင် ယခုဥပဒေကြမ်းကို ရေးဆွဲရန် အစိုးရဌာနများနှင့် ဆက်သွယ်ရာတွင် ဌာနအချို့က ၎င်းတို့နှင့် မဆိုင်ကြောင်း ငြင်းဆန်မှုများရှိခဲ့ပြီး ထိုကဲ့သို့ ငြင်းပယ်ခြင်းသည် နိုင်ငံတော်အတွက် အခွန်ရရှိမှုကို ငြင်းပယ်ခြင်းနှင့် အတူတူပင်ဖြစ်သည်ဟု ၎င်းအမြင်ကို ပြောသည်။
အဆိုပါ ဥပဒေနှင့်ပတ်သက်ပြီး အမြင်ကွဲလွဲမှုများလည်းရှိနေကာ လက်ရှိတွင် မည်သူမဆို လိုင်စင်မရှိဘဲ အကျိုးဆောင်လုပ်ငန်းကို လုပ်ကိုင်နိုင်သော်လည်း ဥပဒေအတည်ဖြစ်လျှင်မူ ယာယီလိုင်စင်၊ သို့မဟုတ် လိုင်စင်လိုအပ်မည်ဖြစ်သည်။ ထိုကဲ့သို့ လိုင်စင်မရှိဘဲ အကျိုးဆောင်လုပ်ငန်းကို စီးပွားရေးဆန်ဆန် လုပ်ကိုင်မည်ဆိုပါက ထောင်ဒဏ်ခြောက်လဖြစ်စေ၊ ငွေဒဏ်ကျပ်သိန်း ၃ဝ ဖြစ်စေ၊ နှစ်မျိုးစလုံးဖြစ်စေ ကျခံရနိုင်ကြောင်း ဥပဒေကြမ်းတွင် ဖော်ပြထားသည်။ သို့သော် အသက် ၁၈ နှစ်ပြည့်ပြီးသူ မည်သူမဆို လိုင်စင်လျှောက်ထားပြီး လုပ်ကိုင်နိုင်မည်ဖြစ်သောကြောင့် မည်သူ့အတွက်မျှ အခက်အခဲရှိမည်မဟုတ်ကြောင်း သိရသည်။
''ဥပဒေပြဌာန်းဖို့ လုပ်တယ်ဆိုတာ အကျိုးဆောင်တွေကို ချုပ်ချယ်ဖို့၊ အပြစ်ပေးဖို့ မဟုတ်ဘူး။ စည်းကမ်းနဲ့လုပ်တဲ့ အကျိုးဆောင်တွေအတွက် ဂုဏ်သရေရှိရှိနဲ့ လုပ်ကိုင်နိုင်အောင် လိုင်စင်ကို ယူခိုင်းခြင်းဖြစ်ပါတယ်။ အာဆီယံနိုင်ငံတွေနဲ့ တခြားနိုင်ငံတွေမှာပါ အိမ်ခြံမြေဝန်ဆောင်မှု ဥပဒေရှိပေမဲ့ မြန်မာနိုင်ငံမှာ မရှိသေးတာကြောင့် ပြဌာန်းချင်တာဖြစ်ပါတယ်''ဟု ဦးတင်အောင်က ပြောသည်။
ထို့ပြင် အကျိုးဆောင်လုပ်ငန်းကို စီးပွားရေးတစ်ခုအနေဖြင့်လုပ်ကိုင်ပါက တာဝန်ယူမှု၊ တာဝန်ခံမှုများ ပါဝင်လာစေရန်နှင့် ဝန်ဆောင်မှုပေးသူနှင့် ရယူသူပါ ရသင့်ရထိုက်သည့် အခွင့်အရေးများ မဆုံးရှုံးစေရန်အတွက် ရည်ရွယ်ထားခြင်းဖြစ်သည်ဟုလည်း ဆိုသည်။
ယခုလို ဥပဒေပြဌာန်းပြီး တရားဝင် လုပ်ကိုင်စေခြင်းဖြင့် အိမ်ခြံမြေရောင်းဝယ်ငှားလုပ်ငန်းတွင် ရောင်းမှား၊ ဝယ်မှားဖြစ်မှုများနှင့် နှစ်ဦးနှစ်ဖက် ဆုံးရှုံးနစ်နာမှုများလည်း နည်းပါးလာမည်ဖြစ်ကြောင်း သိရသည်။ ၎င်းအပြင်အကျိုးဆောင်လုပ်ငန်းများသည် အခွန်ပေးဆောင်ရမည်ဖြစ်သောကြောင့် နိုင်ငံတော်အနေဖြင့်လည်း အခွန်အခများ ပိုမိုရရှိလာစေမည်ဖြစ်ကြောင်း အသင်းမှ တာဝန်ရှိသူများက ပြောသည်။
ဥပဒေကြမ်းသည် အပြီးသတ်အဆင့်သို့ ရောက်ရှိနေပြီဖြစ်ကာ လွှတ်တော်သို့ မကြာခင်တင်ပြမည်ဖြစ်သော်လည်း လွှတ်တော်တွင် မည်မျှကြာမြင့်မည်ကိုမူ မသိရသေးပေ။
Ref : Myanmar Time
Photo Credit : Mmbiztoday
Posted By : Sint Sint (ShweProperty.com)
အိမ်ခြံမြေပြပွဲများ
နောက်ဆုံးရ သတင်းများ
.png)
.png)
ဝယ်ရန်
ငှားရန်
စီမံကိန်း အသစ်များ
အခြားအိမ်ခြံမြေများ
