မိုးရာသီရောက်လာပြီဆိုတာနဲ့ အိမ်ရှင်များ၊ အိမ်ငှားများအတွက် ကြုံတွေ့ရလေ့ရှိတဲ့ ပြဿနာတစ်ခုကတော့ အိမ်နံရံများ၊ မျက်နှာကြက်များ၊ ဗီရိုများနဲ့ ပရိဘောဂများပေါ်မှာ မှိုစွဲလာခြင်းပဲ ဖြစ်ပါတယ်။ 

မှိုစွဲခြင်းဟာ အိမ်ရဲ့အလှအပကိုသာမက မိသားစုကျန်းမာရေးကိုပါ ထိခိုက်စေနိုင်တာကြောင့် မိုးတွင်းမတိုင်ခင်ကတည်းက ကြိုတင်ဂရုစိုက်ထားဖို့ လိုအပ်ပါတယ်။
မိုးရာသီအတွင်း သင့်အိမ်ကို သန့်ရှင်းပြီး စိုထိုင်းဆကင်းကင်းနဲ့ ထိန်းသိမ်းနိုင်ဖို့ ဒီနည်းလမ်းလေးတွေကို လိုက်နာကြည့်ပါ။

၁။ လေဝင်လေထွက် ကောင်းမွန်အောင် ထားပါ

မှိုပေါက်ပွားမှုကို ကာကွယ်ဖို့ အရေးကြီးဆုံးအချက်က လေဝင်လေထွက်ကောင်းဖို့ ဖြစ်ပါတယ်။ မိုးမရွာတဲ့အချိန်များမှာ ပြတင်းပေါက်များနဲ့ တံခါးများကို ဖွင့်ထားပေးပြီး အိမ်အတွင်း လေဝင်လေထွက်ကောင်းအောင် ပြုလုပ်ပေးပါ။ နေရောင်ခြည်ဝင်ရောက်နိုင်ရင် ပိုကောင်းပါတယ်။

၂။ ရေယိုစိမ့်မှုများကို အမြန်ဆုံး ပြင်ဆင်ပါ

အိမ်ခေါင်မိုး၊ နံရံအက်ကွဲကြောင်းများ၊ ပြတင်းပေါက်ဘောင်များနဲ့ ရေပိုက်လိုင်းများမှာ ရေယိုစိမ့်မှု ရှိ/မရှိကို ပုံမှန်စစ်ဆေးပေးပါ။ ရေစိမ့်ဝင်တဲ့နေရာတွေက မှိုပေါက်ပွားဖို့ အလွယ်ဆုံးနေရာဖြစ်တာကြောင့် ပြဿနာတွေ့တာနဲ့ ချက်ချင်းပြင်ဆင်သင့်ပါတယ်။



၃။ ပရိဘောဂများကို နံရံနှင့် အနည်းငယ်ခွာထားပါ

ဆိုဖာ၊ ကုတင်၊ ဗီရို စတဲ့ ပရိဘောဂကြီးတွေကို နံရံနဲ့ တိုက်ရိုက်ကပ်မထားဘဲ အနည်းဆုံး ၂ လက်မမှ ၃ လက်မခန့် ခွာထားပေးပါ။ ဒီလိုထားပေးခြင်းက လေစီးဆင်းမှု ကောင်းစေပြီး အစိုဓာတ်အောင်းကာ မှိုတက်ခြင်းကို လျော့နည်းစေပါတယ်။

၄။ အိမ်တွင်းမှာ အဝတ်မလှန်းပါနဲ့

မိုးရာသီမှာ အဝတ်တွေကို အိမ်ထဲလှန်းခြင်းက အိမ်အတွင်း စိုထိုင်းဆကို မြင့်တက်စေပါတယ်။ တတ်နိုင်သမျှ လေဝင်လေထွက်ကောင်းတဲ့ ဝရန်တာ (သို့မဟုတ်) အမိုးအောက်နေရာတွေမှာ လှန်းပေးပါ။ မလွှဲမရှောင်သာ အိမ်ထဲလှန်းရမယ်ဆိုရင် ပန်ကာဖွင့်ထားပေးဖို့ လိုပါတယ်။

၅။ မှိုကာကွယ်ပေးနိုင်တဲ့ ဆေးများ အသုံးပြုပါ

အိမ်နံရံတွေကို ဆေးသစ်သုတ်မယ်ဆိုရင် မှိုစွဲခြင်းနဲ့ ရေညှိတက်ခြင်းကို ကာကွယ်ပေးနိုင်တဲ့ Anti-fungal Paint မျိုးကို ရွေးချယ်အသုံးပြုပါ။ ဒါက မိုးရာသီအတွင်း နံရံများကို ပိုမိုကြာရှည်ခံစေပါတယ်။

မိုးရာသီအတွင်း အိမ်ကို သန့်ရှင်းပြီး ကျန်းမာရေးနဲ့ညီညွတ်တဲ့ အိမ်လေးဖြစ်အောင် ထိန်းသိမ်းနိုင်ဖို့ အထက်ပါနည်းလမ်းလေးတွေကို လက်တွေ့အသုံးချကြည့်ပါ