ငွေမည်းများစွာဖြင့် ဝင်ရောက်ဈေး ကစားနေသည့် အတွက် အိမ်ခြံမြေ ဈေးနှုန်းများ အဆမ တန်မြင့်တက်လာ၍ ဝင်ငွေရလမ်း မဖော်ပြနိုင်သော ငွေမည်းသမားများကို အိမ်၊ ခြံ မြေခွန်များ တိုးမြှင့်ကောက်ခံရန် ပြည်သူ့လွှတ်တော် ကိုယ်စားလှယ် ဦးဝင်းဦးက လွှတ်တော်သို့ တင်ပြမေးမြန်းခဲ့သည်။
သြဂုတ် ၁၉ ရက်တွင် ကျင်းပသည့် ပြည်သူ့လွှတ်တော် အစည်းအဝေးတွင် တနင်္သာရီတိုင်း၊ ရေဖြူမဲဆန္ဒနယ်မှ ပြည်သူ့လွှတ်တော် ကိုယ်စားလှယ် ဦးဝင်းဦး တင်ပြ မေးမြန်းသည့် ''အိမ်ရာမြေများ ဝယ်ယူ ရောင်းချခြင်း အပေါ်တွင် ပြန်လည်တိုးမြှင့် ကောက်ခံနေသော အခွန် ၃၇ ရာခိုင်နှုန်းကို ခွဲခြားရှင်းလင်း ပြပါရန်၊ ယခင်ကာလတွင် ကာလတို အိမ်ခြံမြေ ရောင်းဝယ်ခွန်အား ၁၅ ရာခိုင်နှုန်း လျော့ချပေးခဲ့စဉ်က ရရှိခဲ့သော အခွန်ငွေများနှင့် ယခု ၃၇ ရာခိုင်နှုန်း တိုးမြှင့် ကောက်ခံရာတွင် ရရှိသော အခွန်ငွေနှုန်းများ နှိုင်းယှဉ်ပြရန်၊ ငွေဖြူရှိသူ နိုင်ငံသားများ အတွက် အခွန်နှုန်းများ လျော့ချပေးရန်၊ ငွေဖြူလုံလောက်အောင် မပြနိုင်သော သာမန် နိုင်ငံသားများအား တိုးမြှင့်ကောက်ခံရန် လိုအပ်သော ဥပဒေ၊ နည်းဥပဒေ၊ အမိန့်ကြော်ငြာ စာများဖြင့် ရေတိုမဟုတ်ဘဲ ရေရှည် တည်တံ့နိုင်ရေးအတွက် လုပ်ဆောင်ပေးရန် အစီအစဉ် ရှိ၊ မရှိ'' မေးခွန်းကို လွှတ်တော်သို့ တင်ပြမေးမြန်းရာတွင် ယခုကဲ့သို့ ထည့်သွင်း ပြောကြားခဲ့ခြင်း ဖြစ်သည်။
''နိုင်ငံတော်က ရသင့်ရထိုက်တဲ့ အခွန်ဖြစ်ရမယ်။ နိုင်ငံသားများကလည်း ပေးဆောင်ရန် တာဝန်ရှိတဲ့ အခွန်များကို ဝန်ထုပ်ဝန်ပိုး မဖြစ်စေဘဲ မှန်မှန်ကန်ကန် ပေးသွင်းနိုင်ဖို့ ရည်ရွယ်ပါတယ်။ အမိန့်ကြော်ငြာ စာများနဲ့ မဟုတ်ဘဲ ဥပဒေ၊ နည်းဥပဒေတွေနဲ့ စည်းရုံးပြီးတော့ နိုင်ငံသားတိုင်းဟာ အခွန်ပေးဆောင် တယ်ဆိုတဲ့ ယဉ်ကျေးမှုတစ်ခု ဖြစ်စေလိုတဲ့ အတွက် ကျွန်တော် မေးမြန်းရခြင်း ဖြစ်ပါတယ်'' ဟု ဦးဝင်းဦးက ပြောကြားသည်။
ဦးဝင်းဦးက ဝင်ငွေရလမ်း ဖော်ပြနိုင်သော ငွေဖြူနှင့် ဝင်ငွေရလမ်း မဖော်ပြနိုင်သော ငွေမည်းများသည် ၁၅ ရာခိုင်နှုန်းတွင် တန်းတူသာဖြစ်ခြင်း (သို့မဟုတ်) ၂၅ ရာခိုင်နှုန်းအထိ အခွန်ဆောင်နေ သူများအတွက် မတရားဘဲ အိမ်ခြံမြေတွင် ငွေမည်းများစွာဖြင့် တစ်နည်းအားဖြင့် အခွန်ရှောင်သော ငွေများဖြင့် ရောင်းဝယ် နေကြကြောင်း၊ တရားဝင် ဖော်ပြခြင်း မရှိသည့်အတွက် နိုင်ငံအတွက် နစ်နာပြီး အိမ်ခြံမြေ ဈေးများလည်း မတရားသဖြင့် တက်နေသဖြင့် ဥပဒေနှင့်အညီ လုပ်ဆောင်ပါက ဈေးပြန်ကျမည် ဖြစ်ကြောင်း လွှတ်တော်သို့ တင်ပြခဲ့သည်။
Ref : EMG
အိမ်ခြံမြေပြပွဲများ
နောက်ဆုံးရ သတင်းများ
ဝယ်ရန်
ငှားရန်
စီမံကိန်း အသစ်များ
အခြားအိမ်ခြံမြေများ
