ရန်ကုန်တိုင်းဒေသကြီးအတွင်း အမှန်တကယ် နေထိုင်စရာမရှိ၍ ကျူးကျော်ခြင်း မဟုတ်ဘဲ စီးပွားရေးအတွက် ကျူးကျော်မှုများအား ကျူးကျော်ထားသည့် သတ်မှတ်မြေအလိုက် ဥပဒေအရ ရင်ဆိုင် ဆောင်ရွက်သွားရမည်ဟု နိုဝင်ဘာ ၁၆ ရက်က ပြုလုပ်သည့် ရန်ကုန်တိုင်းဒေသကြီး လွှတ်တော် အစည်းအဝေးတွင် ရန်ကုန်တိုင်းဒေသကြီး လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး တင်အောင်ထွန်းက ပြောကြားသည်။
“ရန်ကုန်တိုင်းဒေသကြီး အစိုးရအဖွဲ့ အနေဖြင့် ကျူးကျော်အဆောက်အအုံနေ ပြည်သူများ၏ ကိစ္စရပ်များနှင့် ပတ်သက်၍ မည်သို့သော အစီ အစဉ်ဖြင့် ဆက်လက် စီမံဆောင်ရွက်မည်ကို သိရှိလိုကြောင်း” ဒဂုံမြို့နယ် မဲဆန္ဒနယ် အမှတ် (၂) လွှတ်တော်ကိုယ်စားလှယ် ဦးကျော်ဇေယျ၏ မေးမြန်းမှုအပေါ် ရန်ကုန်တိုင်းဒေသကြီး လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးတင်အောင်ထွန်းက ပြန်လည်ဖြေကြား ရာတွင် ယခုလို ထည့်သွင်း ပြောကြားခဲ့ခြင်းဖြစ်သည်။
“ကျူးကျော်နေ ပြည်သူလူထုကလည်း ဒီအစိုးရဟာ ဘူဒိုဇာအစိုးရ မဟုတ်ဘူးလို့ ပြောခဲ့တဲ့အတွက် အိပ်မက်လှလှမက်ခဲ့တာ ဒီနေ့အထိ ဖြစ်ပါ တယ်။ ကျူးကျော်စာရင်းတွေကို မေ ၂၅ ရက်အထိ ကောက်ပြီး မေ ၂၆ ရက် ထပ်မံတွေ့ရှိတဲ့ ကျူးကျော်တွေကို ဥပဒေကြောင်းအရ အရေးယူ မယ်လို့ ပြတ်ပြတ်သားသား ပြောခဲ့တာရှိပါတယ်။ တောင်ဒဂုံမှာ စက်တင်ဘာ ၂၀ ရက် အထိ ထပ်မံ စာရင်းကောက်တာကို တွေ့ခဲ့ရပါတယ်။
ဒါကြောင့် ရှေ့ကပြောပြီး နောက်က ဘယ်လိုများ ဖြစ်သွားပါလိမ့်ဆိုပြီး ဒီမေးခွန်းကို မေးမြန်းရခြင်း ဖြစ်ပါတယ်” ဟု ဒဂုံမြို့နယ် မဲဆန္ဒနယ် အမှတ် (၂) လွှတ်တော်ကိုယ်စားလှယ် ဦးကျော်ဇေယျက ပြောကြားသည်။ ရန်ကုန်တိုင်းဒေသကြီး အတွင်းရှိ ကျူးကျော်များတွင် အစစ်အမှန် ကျူးကျော်သူများနှင့် စီးပွားဖြစ် ကျူးကျော်သူများဟူ၍ တွေ့ရှိခဲ့ကြောင်း၊ အစစ်အမှန် ကျူးကျော်သူများမှာ အမှန်တကယ် နေစရာမရှိဘဲ စာရင်းကောက် ယူထားသည့် အထဲတွင် ပါဝင်သည့်သူများဖြစ်ကြောင်း၊ ယင်းကျူးကျော်သူများကို ရန်ကုန်တိုင်းဒေသကြီး အစိုးရအဖွဲ့က ထောက်ပံ့သည့် အကူအညီများကို ဦးစားပေး ဆောင်ရွက်သွားမည် ဖြစ်ကြောင်းနှင့် အိမ်ရာများ အကောင်အထည်ဖော်ပါက ယင်းအဖွဲ့ကို ဦးစားပေးသွားမည်ဖြစ်ကြောင်း ရန်ကုန်တိုင်းဒေသကြီး လုံခြုံရေးနှင့် နယ်စပ်ရေးရာ ဝန်ကြီး ဗိုလ်မှူးကြီးတင်အောင်ထွန်းက ပြောကြားသည်။
“စီးပွားဖြစ် ကျူးကျော်သူတွေအဖွဲ့က တတ်နိုင်တဲ့သူက ဝယ်ပြီးတော့ ထပ်ရောက်လာတဲ့ ကျူးကျော်တွေကို ပြန်လည် ရောင်းချတာတွေ၊ ငှားရမ်းတာတွေ လုပ်ဆောင်တာ ဖြစ်ပါတယ်။ နောက်တစ်ခုကတော့ ကိုယ်တိုင် ကျူးကျော်သူတွေပါ။ အချို့လည်း မိမိမြေကွက်အနီးမှာ အဖီတွေထုတ်ပြီးတော့ အခန်းဖွဲ့ပြီး နေစရာမရှိသူတွေကို ငှားရမ်းတာတွေ၊ ရောင်းချတာတွေ လုပ်နေတာ ဖြစ်ပါတယ်။ နောက်တစ်ချက်က အချို့က ရပ်ကွက်ထဲမှာ နေစရာအိမ် ရှိပါတယ်။ သို့သော်လည်း လမ်းကိုထွက်ပြီးတော့ ကျူးကျော်တဲတွေ ဆောက်ပြီးတော့ ဈေးဆိုင်၊ စတိုးဆိုင်၊ အသုတ်ဆိုင်၊ မုန့်ဟင်းခါးဆိုင် စသည်ဖြင့် ဖွင့်ပြီးတော့ ကိုယ်ပိုင်စီးပွားရေးအတွက် ဆောင်ရွက်တဲ့ ကျူးကျော်တွေ ဖြစ်ပါတယ်။ အချို့က လယ်ပိုင်ရှင်တွေဖြစ်ပြီး အဲဒီလယ်ကို စိတ်ပိုင်းရောင်းချပြီးတော့ ဝယ်တဲ့သူကလည်း အဲဒီအပေါ်မှာ လူနေအိမ်တွေဆောက်ပြီး ကျူးကျော်တဲ့သူတွေ ဖြစ်ပါတယ်။ အဲဒီလို ကျူးကျော်သူတွေဟာ အမှန်တကယ် နေစရာမရှိလို့ ကျူးကျော်တာမဟုတ်ဘဲ ကိုယ်ရဲ့စီးပွားရေးအတွက် ကျူးကျော်တာဖြစ်တဲ့အတွက် သတ်မှတ်တဲ့ မြေအလိုက် ဥပဒေအရ ရင်ဆိုင် ဆောင်ရွက်သွားရမှာ ဖြစ်ပါတယ်” ဟု ဗိုလ်မှူးကြီး တင်အောင်ထွန်းက ပြောကြားသည်။
ရန်ကုန်တိုင်းဒေသကြီးအတွင်း ကောက်ယူခဲ့သော ကျူးကျော် ခန့်မှန်းစာရင်းအရ ပထမပိုင်းတွင် အိမ်ထောင်စု ၁၁၆၉၇၅ စုရှိပြီး လူဦးရေအနေဖြင့် ၄၄၁၆၄၆ ဦးဖြစ်ကြောင်း ၎င်းက ဆက်လက်ပြောကြားသည်။ ရန်ကုန်တိုင်းဒေသကြီး အတွင်းရှိ ကျူးကျော်များကို စနစ်တကျ စာရင်းကောက်ယူ မည်ဖြစ်ပြီး ၎င်းတို့၏ ဘဝပြန်လည် ထူထောင်ရေးအတွက် အကူအညီပေးမည်ဟု ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်းက မေ ၂၅ ရက်က ပြုလုပ်သည့် ကျူးကျော်စာရင်း ကောက်ယူရေးဆိုင်ရာ ရှင်းလင်းပွဲတွင် ပြောကြားပြီးနောက် ကျူးကျော်အသစ်များ တိုးလာခြင်းဖြစ်သည်။
သို့ဖြစ်ရာ ကျူးကျော်စာရင်း ကောက်ယူမှု၏ Pilot Project အနေဖြင့် ဒဂုံမြို့သစ် တောင်ပိုင်းမြို့နယ်တွင် စက်တင်ဘာ ၂ ရက် မှ စတင်ကောက်ယူရာတွင် နည်းပညာပိုင်းဆိုင်ရာ အခက်အခဲများအပြင် ယင်းသို့ ကျူးကျော်စာရင်း ကောက်ယူသည်ဟု အသံကြားသည်နှင့် အသစ်ကျူးကျော်လာသူများ ထပ်တိုးလာကြောင်း ဒဂုံမြို့သစ် တောင်ပိုင်းမြို့နယ် မဲဆန္ဒနယ် အမှတ် (၁) လွှတ်တော်ကိုယ်စားလှယ် ဦးညီညီ၏ ပြောကြားချက်အရ သိရသည်။
Ref & Photo Credit : Eleven Media Group
Posted By : Myat Minn
အိမ်ခြံမြေပြပွဲများ
နောက်ဆုံးရ သတင်းများ
.png)
5.png)
4.png)
ဝယ်ရန်
ငှားရန်
စီမံကိန်း အသစ်များ
အခြားအိမ်ခြံမြေများ
