ရန်ကုန်တဖက်ကမ်းရှိ ဒေါ်လာဘီလီယံချီကုန်ကျမည့် တရုတ်စီမံကိန်းကြီးဖြစ်သော ရန်ကုန်မြို့သစ်စီမံကိန်းကို အပိုင်းလိုက်ဆောင်ရွက်ရန် ပြည်ထောင်စုအစိုးရက ဆုံးဖြတ်လိုက်ပြီး ထိုအပိုင်းလိုက်လုပ်ဆောင်မည့် စီမံကိန်းကို အကောင်အထည်ဖော်မည့် ကုမ္ပဏီကို ရွေးချယ်ရေး ပြည်ပ အတိုင်ပင်ခံကုမ္ပဏီတခုကို ငှားရန် ပြင်ဆင်နေသည်။

ရန်ကုန်မြို့သစ် စီမံကိန်းသည် တရုတ်-မြန်မာ စီးပွားရေး စင်္ကြန် (CMEC) ၏ အစိတ်အပိုင်းဖြစ်ပြီး တရုတ်နိုင်ငံ၏ ရပ်ဝန်းနှင့် လမ်းအစီအစဉ် (BRI) အောက်တွင် အကျုံးဝင်သည်။ CMEC သည် တရုတ်နိုင်ငံ ယူနန်ပြည်နယ်နှင့် မြန်မာနိုင်ငံအလယ်ပိုင်း မန္တလေးမှ တောင်ဖက် ရန်ကုန်မြို့သစ် စီမံကိန်းနှင့် အနောက်ဖက်တွင် ကျောက်ဖြူအထူး စီးပွားရေးဇုန်တို့ကို ဆက်သွယ်မည်ဖြစ်သည်။

ရန်ကုန်တိုင်းအစိုးရပိုင် ရန်ကုန်မြို့သစ် ဖွံ့ဖြိုးတိုးတက်ရေး ကုမ္ပဏီ (NYDC) သည် ရန်ကုန်မြို့သစ် စီမံကိန်းအတွက် အခြေခံအဆောက်အအုံများ တည်ဆောက်ရန် ဘေဂျင်းအခြေစိုက် China Communications Construction Company, Ltd. (CCCC) နှင့်  အမေရိကန်ဒေါ်လာ ၁.၅ ဘီလျံ (ကျပ် ၂.၀၃ ထရီလျံ) တန် မူဘောင်သဘောတူညီချက်ကို ၂၀၁၈ ခုနှစ်က လက်မှတ်ရေးထိုးခဲ့သည်။ ဧက ၂ သောင်း (၈၁၀၀ ဟက်တာ) ကျယ်သော ရန်ကုန်မြို့သစ် စီမံကိန်းတွင် ဒေသခံများအတွက်လူနေ ဧရိယာ ၅ ခု၊ တံတား နှစ်စင်း၊ စက်မှုဇုန်တခုနှင့်  စီးပွားရေးနှင့် တခြား လူနေဧရိယာများနှင့် ဆက်စပ် အခြေခံအဆောက်အအုံများ ပါဝင်သည်။

ရန်ကုန်မြို့သစ် စီမံကိန်း (အပိုင်း ၁) ၏ စုစုပေါင်း ကုန်ကျစရိတ်မှာ အမေရိကန် ဒေါ်လာ ၈ ဘီလီယံရှိမည်ဟု ရန်ကုန်တိုင်းအစိုးရ၏ ၂၀၁၉ ခုနှစ် စီမံကိန်း လမ်းညွှန်ဖြစ်သည့် Yangon Project Bank က ခန့်မှန်းထားသည်။

သို့သော် ထိုစီမံကိန်းသည် ရေလွှမ်းမိုးမှု ခံရနိုင်သော နေရာတွင် တည်ရှိခြင်းနှင့် CCCC ပါဝင်ပတ်သက်ခြင်းကြောင့် ဝေဖန်စရာ ဖြစ်နေသည်။ ဟောင်ကောင် စတော့အိတ်ချိန်းစာရင်းဝင် တရုတ်နိုင်ငံပိုင် ထိုကုမ္ပဏီသည် အာရှနှင့် အာဖရိက ၁၀ နိုင်ငံထက်မနည်း တည်ဆောက်ရေးလုပ်ငန်းများတွင် အဂတိလိုက်စားမှု၊ လာဘ်ပေးလာဘ်ယူမှုများနှင့် ပါဝင်ပတ်သက်နေသည်။

CCCC သည် ရန်ကုန်မြို့သစ် စီမံကိန်းတွင် အဦးဆုံးပါဝင်ပတ်သက်နေသော်လည်း  စီမံကိန်း အကောက်အထည်ဖော်မည့် ကုမ္မဏီကို ရွေးချယ်ရာတွင် Swiss Challenge ပုံစံ ဖြင့် ရွေးချယ်မည်ဖြစ်ကြောင်း စတင်ဖွဲ့စည်းစဉ်ကပင် NYDC ကပြောကြားခဲ့သည်။ Swiss Challenge ဆိုသည်မှာ CCCC ၏ စီမံကိန်းနှင့် ပတ်သက်သည့် အဆိုပြုချက်များကို ဝင်ရောက်ယှဉ်ပြိုင်နိုင်ရန် တခြား ကုမ္ပဏီများကို ဖိတ်ခေါ်မည့် ပုံစံဖြစ်သည်။ သို့သော် ရန်ကုန်မြို့သစ် စီမံကိန်းအတွက်  လိုအပ်သည့် ကနဦး ရင်းနှီးမြှုပ်နှံမှုသည် လွန်စွာ များပြားသောကြောင့် အခြားရင်းနှီးမြှုပ်နှံသူများအတွက် အဟန့်အတားကဲ့သို့ဖြစ်နေသည်။

ထိုသ်ို့ ကနဦးရင်းနှီးမြှုပ်နှံမှု များစွာလိုအပ်သည့်အတွက် ရန်ကုန်မြို့သစ် စီမံကိန်းကို ပြည်ထောင်စုအစိုးရက အပိုင်းလိုက်ခွဲထုတ်ပြီး ဆောင်ရွက်မည်ဖြစ်ပြီး ထိုသို့ ဆောင်ရွက်ခြင်းဖြင့် အခြား ကုမ္မဏီများလည်း Swiss Challenge တွင် ပါဝင်လာနိုင်မည်ဖြစ်ကြောင်း စီမံကိန်းနှင့် နီးစပ်သည့် အဆင့်မြင့်အရာရှိတဦးက ဧရာဝတီ သတင်းဌာနကို  ဗုဒ္ဓဟူးနေ့တွင်ပြောသည်။

ယခု ခွဲထုတ်ထားသည့် စီမံကိန်းသစ်တွင် ၃ စတုရန်းကီလိုမီတာကျယ်သည့် စက်မှုဇုန်တခု၊ ရန်ကုန်ဖက်ကမ်း ကြည့်မြင်တိုင်နှင့် ရန်ကုန်မြို့သစ်ကို ဆက်သွယ်မည့် တံတားတခုနှင့် ဒေသခံများအတွက် လူနေဧရိယာ ၅ ခု၊ ၉ စတုရန်း ကီလိုမီတာကျယ်သော လူနေနှင့် စီးပွားရေး ဧရိယာများ ပါဝင်မည်ဖြစ်သည်။ ထိုစက်မှုဇုန်သည် မူလက ရည်ရွယ်ထားသည့် ၁၃ စတုရန်းကီလိုမီတာအကျယ် ရှိသည့် စက်မှုဇုန်၏ အစိတ်အပိုင်းဖြစ်သည်။ သို့သော် ထိုနယ်မြေအကျယ်အဝန်းများကို ပြန်ညှိကြရဦးမည်ဖြစ်ကြောင်း အထက်ပါ အရာရှိပြောသည်။

ယခု ၃ စတုရန်းကီလိုမီတာကျယ်သော စက်မှုဇုန်သည် ကိုဗစ်-၁၉ ဖြစ်ပွားမှုကြောင့် ပြည်ပမှ ပြန်လည်ရောက်ရှိလာသော ရွှေ့ပြောင်းလုပ်သားများအတွက် အလုပ်အကိုင်အခွင့်အလမ်းများ ဖန်တီးပေးရန် အစိုးရ၏ အရေးပေါ် စီမံကိန်းဖြစ်သည်။

“ဒီစီမံကိန်းကို ဒီနှစ်အတွင်း စတင်ဖို့မျှော်မှန်းထားတယ်” ဟု ထိုအရာရှိပြောပြီး လုပ်ငန်းဆောင်ရွက်မည့် ကုမ္မဏီကို Swiss Challenge ဖြင့် ရွေးချယ်ပြီးမှသာ စတင်နိုင်မည်ဟု ရှင်းပြသည်။

Swiss Challenge တွင် ပွင့်လင်းမြင်သာမှုရှိစေရန်နှင့် ဝင်ရောက်ယှဉ်ပြိုင်မည့် ကုမ္ပဏီများက တင်သွင်းသည့် အဆိုပြုချက်များကို စနစ်တကျ စစ်ဆေးရန်အတွက် ပြည်ပမှ အတိုင်ပင်ခံ ကုမ္မဏီ ငှားရန် ပြည်ထောင်စုအဆင့် တင်ဒါကော်မတီမှ နိုင်ငံတကာအတိုင်ပင်ခံလုပ်ငန်း ၆ ခု ကို ဖိတ်ခေါ်စုံစမ်းခဲ့ကြောင်း သိရသည်။

“ကုမ္မဏီ ၃ ခုက အကြောင်းပြန်ထားပြီးပြီ။ အဲဒီ အထဲက တခုကို ရွေးဖို့ လုပ်နေပါပြီ” ဟု အထက်ပါ အရာရှိကပြောသည်။

ယခုနှစ်အစောပိုင်းက တရုတ်သမ္မတ ရှီကျင့်ဖျင် မြန်မာနိုင်ငံသို့ လာရောက်လည်ပတ်စဉ် ရန်ကုန်မြို့ဖွံဖြိုးတိုးတက်ရေး (မြို့သစ်စီမံကိန်းအပါအဝင်) နှင့် အခြားကိစ္စရပ်များအတွက် စာချုပ်နှင့် စာချွန်လွှာများ နှစ်ဖက် လက်မှတ်ရေးထိုးခဲ့သည်။ CMEC ၏ မဏ္ဍိုင်သုံးခုလုံးတွင် တိုးတက်မှုအသစ်များရှိကြောင်းနှင့် ရန်ကုန်မြို့သစ် စီမံကိန်း၏ ကနဦးအစမ်း တည်ဆောက်ခြင်းကို မကြာမီ စတင်နိုင်မည်ဟု မျှော်လင့်ကြောင်း မြန်မာနိုင်ငံဆိုင်ရာ တရုတ် သံအမတ် ချန်ဟိုင်က မကြာသေးမီက ပြောသည်။

စီမံကိန်းကို ထိုသို့ အဆင့်လိုက်ဆောင်ရွက်ခြင်းကို Sandhi Governance Institute မှ အမှုဆောင်ဒါရိုက်တာ ဦးခိုင်ဝင်းက ကြိုဆိုလိုက်ပြီး ထိုသို့လုပ်ဆောင်ခြင်းကြောင့် မြန်မာနိုင်ငံအတွက် နစ်နာနိုင်ခြေ နည်းသွားကြောင်း ဆိုသည်။ အနည်းဆုံးတော့ တရုတ် ကုမ္ပဏီတခုတည်းက စီမံကိန်းတခုလုံးကို လက်ဝါးကြီးအုပ်ထားနိုင်ခြေကို လျှော့ချနိုင်ကြောင်း သူပြောသည်။

“BRI စီမံကိန်းတွေနဲ့ပတ်သက်ရင် ပွင့်လင်းမြင်သာမှုရှိအောင်လုပ်မယ်လို့ အစိုးရကပြောထားတော့ ဒေါ်အောင်ဆန်းစုကြည်ဦးဆောင်တဲ့ BRI လမ်းညွှန်ကော်မတီလို သက်ဆိုင်ရာ ကော်မတီတချို့က အခု ကိစ္စနဲ့ ပတ်သက်တာတွေကို အများပြည်သူသိနိုင်အောင် ချပြရင် ပိုကောင်းမယ်” ဟုလည်း သူပြောသည်။

Credit By: Burma Irrawaddy

Posted By: Ra Wai (ShweProperty.com)