ရန်ကုန်မြို့သစ်၏ Master Plan သည် Hong Kong Institute of Urban Design ၏ Urban Design Awards တွင် Best Planning Project အဖြစ် ဆန်ကာတင်စာရင်းဝင်ခဲ့ကြောင်း သိရသည်။
" AECOM ၊ အကြံပေးအဖွဲ့တွေနဲ့ NYDC Planning and Development အဖွဲ့သားတွေရဲ့ မနားတမ်းကြိုးပမ်းအားထုတ် မှုတွေကြောင့် ရန်ကုန်မြို့သစ်ရဲ့ Master Plan ဟာ Hong Kong Institute of Urban Design ရဲ့ Urban Design Awards မှာ Best Planning Project အဖြစ် ဆန်ကာတင်စာရင်းဝင်ခဲ့ပါတယ်" ဟု ရန်ကုန်မြို့သစ်ဖွံ့ဖြိုးရေးကုမ္ပဏီလီမိတက် (NYDC)၏ ဒုတိယဥက္ကဋ္ဌနှင့် CEO ဦးသိမ်းဝေက CEO အပတ်စဉ် စာမျက်နှာတွင် ပြောကြားထားသည်။
AECOM အဖွဲ့က စည်းစနစ်အကျဆုံး၊ ထိရောက်မှုအရှိဆုံး၊ အလေအလွင့်အနည်းဆုံး မြေကို အသုံးချနိုင်ရန် တည်ဆောက်အကောင်အထည်ဖော်မည့် လိုအပ်နေသည့် အခြေခံအဆောက်အဦများ၊ စီးပွားရေးဖွံ့ဖြိုးတိုးတက်မှု၊ ပတ်ဝန်းကျင် စီမံခန့်ခွဲနိုင်မှု၊ သယ်ယူပို့ဆောင်ရေး၊ လူမှုရေးနှင့် ယဉ်ကျေးမှုတို့နှင့် သက်ဆိုင်သော အဆောက်အအုံစီမံကိန်းများအား မြို့သစ်တစ်ခု အား စဉ်ဆက်မပြတ်ဟန်ချက်ညီညီနှင့် ရေရှည်ဖွံ့ဖြိုးတိုးတက်ရန် ရည်ရွယ်ကာ စေ့စေ့စပ်စပ်ဖြင့် ဘက်ပေါင်းစုံမှ စဉ်းစားကာ ရန်ကုန် မြို့သစ်အတွက် Master Plan ကို ရေးဆွဲခဲ့ခြင်းဖြစ်သည်ဟု NYDC က ဆိုသည်။
AECOM ၏ သိပ္ပံနည်းကျတိုင်းတာမှု Sustainable Systems Integration Model (SSIM TM) စနစ်ကြောင့် ရွေးချယ်စရာ Master Plan (၃)မျိုးအနက် အသင့်တော်ဆုံး Master Plan ကို ရွေးချယ်နိုင်ခဲ့ပြီး SSIM TM သည် ဆက်စပ်နေသည့် ပတ်ဝန်း ကျင်၊ အလုပ်သမားအင်အား၊ ရေရှည်ထိန်းသိမ်းထားနိုင်မည့် မြို့ပြဖွဲ့စည်းတည်ဆောက်ပုံနှင့် စိမ်းလန်းစိုပြေမှုဆိုသည့် ကဏ္ဍ (၄) ခုအား အဓိက စွမ်းဆောင်မှုအညွှန်းကိန်း (KPIs) များအား တိုင်းတာခြင်းဖြစ်သည်။
ရန်ကုန်မြို့သစ်အတွက် Master Plan သည် လူဦးရေ (၁ ဒသမ ၂)သန်းအတွက် လုံခြုံမှုရှိကာ နေချင်စဖွယ်အပြည့်ရှိတဲ့ မြို့ပြ စီမံကိန်းတစ်ခုအဖြစ် ရေးဆွဲထားသည့်အပြင် ရန်ကုန်မြို့သစ်အတွက် စစ်တမ်းကောက်ယူခဲ့သည့် လူမှု-စီးပွားပင်မစီမံချက် (Socio Economic Master Plan) တွင် ဖော်ပြထားသည့် ၂၀၅၀ ပြည့်နှစ်တွင် အလုပ်အကိုင်ပေါင်း (၉)သိန်း ဖန်တီးနိုင်ရေး ရည်ရွယ်ချက်ကိုပါ ထည့်တွက်ပြီးရေးဆွဲထားကြောင်း သိရသည်။
ရန်ကုန်မြို့သစ်၏ Master Plan ရေးဆွဲရာတွင် ရေလွှမ်းမိုးမှုအန္တရာယ်နှင့် စပ်လျဉ်း၍အကြံပေး Royal HaskoningDHV Myanmar ၏ ရေလွှမ်းမိုးမှုကာကွယ်ရေးဒီဇိုင်းကို ပေါင်းစပ်ရေးဆွဲခဲ့ကာ ရေလွှမ်းမိုးမှု လျှော့ချနိုင်ရန်အတွက် ရှိရင်းစွဲချောင်း ငယ်များကို အသုံးပြုခြင်း၊ ရေတားတမံများ တည်ဆောက်ခြင်းနှင့် အများပြည်သူ နားနေသည့် နေရာများအဖြစ်လည်း အသုံးပြုနိုင်မည့် ရေထိန်းသိမ်းရန် ဧရိယာများကို ထားရှိသွားမည်ဖြစ်ကြောင်း သိရသည်။
"မြို့သစ်ရဲ့ Smart City မူဘောင်ကို မြို့ပြနဲ့ လူမှုရေးဆိုင်ရာ အခြေခံအဆောက်အဦတွေ နည်းပညာကနေ ဘယ်လောက်အထိ အကျိုးအမြတ်ရရှိနိုမလဲအပေါ်မှာ အခြေခံပြီး ချမှတ်ထားပါတယ်။ ဒီလိုနည်းပညာကို အခြေခံထားတဲ့ဖွဲ့တည်မှုစနစ်ဟာ မြို့သစ်ရဲ့ သယ်ယူပို့ဆောင်ရေး၊ ကျန်းမာရေး၊ စီးပွားရေး၊ ပညာရေးနဲ့ သဘာဝပတ်ဝန်းကျင် အစရှိတဲ့ ကဏ္ဍတွေမှာ စဉ်ဆက် မပြတ် ဟန်ချက်ညီညီနဲ့ ရေရှည်ဖွံ့ဖြိုးတိုးတက်စေမှာပါ" ဟု ဦးသိမ်းဝေက ပြောကြားထားသည်။
Master Plan ရေးဆွဲရာတွင် ယာဉ်အသွားအလာနှင့် သယ်ယူပို့ဆောင်ရေးဆိုင်ရာစိစစ်အကဲဖြတ်မှုအား Oriental Consultants Consortium က တာဝန်ယူဆောင်ရွက်ခဲ့ပြီး ယာဉ်အသွားအလာနှင့် သယ်ယူပို့ဆောင်ရေးကဏ္ဍမှ မြို့သစ်တစ်ခုထဲအတွက် မဟုတ်ဘဲ ဝန်းကျင်ဧရိယာများနှင့် အလွယ်တကူချိတ်ဆက်သွားလာနိုင်ရေးကိုပါ ထည့်သွင်းရေးဆွဲထားကြောင်း NYDC ၏ အပတ်စဉ် CEO စာမျက်နှာမှ သိရသည်။
Ref & Photo Credit : Myanmar Builders Guide
Posted By : Sint Sint (ShweProperty.com)
အိမ်ခြံမြေပြပွဲများ
နောက်ဆုံးရ သတင်းများ
3.png)
2.png)
ဝယ်ရန်
ငှားရန်
စီမံကိန်း အသစ်များ
အခြားအိမ်ခြံမြေများ
