တစ်သက်မှာတစ်ခါနေဖူးရင် လူဖြစ်ရကျိုးနပ်သွားမယ့်အိမ်ကြီးတွေ ကမ္ဘာပေါ်မှာတည်ရှိနေတယ်ဆိုတာ သင်သိပါသလား? နန်းတော်တမျှ ခမ်းနားကြီးကျယ်တဲ့အိမ်ကြီးတွေဆိုတာ ပုံပြင်မဟုတ်ပါဘူး။ လက်တွေ့ကမ္ဘာမှာလည်းရှိပါတယ်။ အဲ့ဒီလို ခမ်းနားပြီး တန်ဖိုးကြီးမားတဲ့ ဇိမ်ခံအိမ်ကြီးတွေကို ဘယ်သူတွေက ဘယ်နေရာတွေမှာပိုင်ဆိုင်ထားလဲဆိုတာ ကြည့်လိုက်ပါဦးနော်…

(၁) Michael Jordan ရဲ့ ဒေါ်လာ ၁၅ သန်းတန်အိမ်ကြီး



နာမည်ကျော်ဘတ်စကတ်ဘောကစားသမားဟောင်း Michael Jordan ရဲ့ ခမ်းနားတဲ့ဇိမ်ခံအိမ်ကြီးဟာ  Illinois ပြည်နယ် Highland Park  မြို့မှာ တည်ရှိပါတယ်။ ထိုအိမ်ကြီးရဲ့ တန်ဖိုးဟာ နဂိုပေါက်ဈေး  ဒေါ်လာ ၂၉ သန်းကနေ ထက်ဝက်နီးပါးကျဆင်းသွားခဲ့ပြီး လက်ရှိမှာဆိုရင်တော့ ဒေါ်လာ ၁၄.၉ သန်းတန်ဖိုးရှိတယ်လို့သိရပါတယ်။ Michael Jordan ရဲ့ ဇိမ်ခံအိမ်ကြီးထဲမှာဆိုရင် စတုရန်းပေ ၅၀၀၀၀ ကျယ်ဝန်းတဲ့ဧည့်ခန်း ၊ ဘတ်စကတ်ဘောကစားကွင်း၊ ကား ၁၄ စီးဆန့် ကားပါကင်ပါရှိပြီး အိမ်ရဲ့စုစုပေါင်းအကျယ်အဝန်းဟာ ၇ဧက ရှိတယ်လို့သိရပါတယ်။

(၂) Kim Kardashian နဲ့ Kanye West တို့ရဲ့ ဒေါ်လာသန်း ၆၀ တန်အိမ်ကြီး



Kim Kardashian နဲ့ Kanye West  တို့ဟာ သူတို့ရဲ့တန်ဖိုးကြီးမားတဲ့ဇိမ်ခံအိမ်ကြီးကို ၂၀၁၄ တုန်းက ဒေါ်လာ သန်း ၂၀ နဲ့ဝယ်ယူခဲ့တာဖြစ်ပြီး လက်ရှိပေါက်ဈေးကတော့ ဒေါ်လာ သန်း၆၀ နီးပါးဖြစ်နေပြီပဲဖြစ်ပါတယ်။ သူတို့နှစ်ဦးဟာ ဒီဇိုင်နာ  Axel Vervoordt နဲ့ ပူးပေါင်းပြီး အိမ်တစ်အိမ်လုံးနီးပါးကို အဖြူရောင်ဆေးခြယ်ကာ ခမ်းနားကြီးကျယ်တဲ့နန်းတော်ကြီးသဖွယ်ဖန်တီးတည်ဆောက်ခဲ့ကြတာဖြစ်ပါတယ်။ အိမ်ကြီးထဲမှာ  Isabel Rower ရဲ့အနုပညာလက်ရာတွေ၊ သူတို့နှစ်ယောက်ရဲ့စုစည်းထားတဲ့အနုပညာလက်ရာတွေနဲ့ပြည့်နှက်နေတာဖြစ်တယ်လို့သိရပါတယ်။

(၃) Oprah Winfrey ရဲ့ ဒေါ်လာ ၈၈ သန်းတန်အိမ်ကြီး 



Oprah Winfrey ရဲ့ ဒေါ်လာ ၈၈ သန်းတန်အိမ်ကြီးဟာ ကယ်လီဖိုးနီးယားပြည်နယ် Montecito ဆိုတဲ့ အလှအပတွေ၊ ယဉ်ကျေးမှုအမွေအနှစ်တွေစုဝေးနေတဲ့ မြို့လေးမှာ တည်ရှိပါတယ်။ အမြဲတမ်းတသီးတသန့်နေတတ်တယ်လို့နာမည်ကြီးတဲ့ Oprah Winfrey ဟာ သူမရဲ့ နှင်းဆီဥယျာဉ်ကြီးကိုတော့ ဂုဏ်ယူစွာထုတ်ပြခဲ့ပါတယ်။ တန်ဖိုးကြီးနှင်းဆီဥယျာဉ်ခြံကြီးကို နှင်းဆီပညာရှင် Dan Bifano နဲ့ တွဲဖက်ပြီး ဖန်တီးထားခဲ့တာဖြစ်တယ်လို့သိရပါတယ်။ Oprah Winfrey ဟာ သူမရဲ့ စတုရန်းပေ ၂၃၀၀၀ ကျယ်ဝန်းတဲ့ ဇိမ်ခံအိမ်ကြီးကိုလည်း နာမည်ကြီးဒီဇိုင်နာ Rose Tarlow နဲ့ တွဲဖက်ပြီး ပြန်လည်ဒီဇိုင်းဆွဲဖန်တီးထားတာဖြစ်ပါတယ်။



(၄) Jay-Z နဲ့ Beyoncé တို့ရဲ့ဒေါ်လာ ၈၈ သန်းတန် ဇိမ်ခံအိမ်ကြီး



Jay-Z နဲ့ Beyoncé တို့ရဲ့ဒေါ်လာ ၈၈ သန်းတန် ဇိမ်ခံအိမ်ကြီးဟာဆိုရင် Los Angeles မြို့နဲ့အိမ်နီးချင်းဒေသဖြစ်တဲ့ Bel Air မှာတည်ရှိပြီး အိမ်ကြီးထဲမှာ စတုရန်းပေ ၃၀၀၀၀ ကျယ်ဝန်းတဲ့ ဧည့်ခန်းဖွဲ့စည်းထားတဲ့အပြင် အပြင်ဘက်ခြံဝန်းအကျယ်အဝန်းဟာလည်း စတုရန်းပေ ၁၀၀၀၀ ကျယ်ဝန်းပြီး ရေကူးကန် လေးကန် ၊ ဘတ်စကတ်ဘောကွင်းလည်း ပါရှိပါတယ်။ အိမ်ကြီးထဲမှာဆိုရင် ကျယ်ဝန်းလှပတဲ့ အိပ်ခန်း ၈ ခန်း ၊ရေချိုးခန်း ၁၁ ခန်း နဲ့ ရုပ်ရှင်ရုံအသေးစားလည်းရှိပါတယ်။  Jay-Z နဲ့ Beyoncé တို့ဟာ ဒီအိမ်ကြီးကို ၂၀၁၇ တုန်းက ဒေါ်လာ ၈၈ သန်းနဲ့ဝယ်ယူခဲ့တာဖြစ်ပြီး  Bel Air မှာ တန်ဖိုးအကြီးဆုံးအိမ်အဖြစ်စံချိန်တင်ခဲ့ပါတယ်။

(၅) Taylor Swift ရဲ့ ဒေါ်လာ ၁၇.၇၅ သန်းတန် ဇိမ်ခံအိမ်ကြီး 



Taylor Swift  ရဲ့ ၂၀၂၀ ထွက် အယ်လ်ဘမ် Folklore ထဲက သီချင်းတစ်ပုဒ်မှာ ပါဝင်တဲ့အိမ်ကြီးဟာ သူမရဲ့တန်ဖိုးကြီးဇိမ်ခံအိမ်ကြီးဖြစ်ပြီး Rhode Island ပြည်နယ်ထဲမှာတည်ရှိတယ်လို့သိရပါတယ်။ ဒီအိမ်ကြီးကို Taylor Swift ဟာ ၂၀၁၃ တုန်းက ဒေါ်လာ ၁၇.၇၅ သန်းနဲ့ဝယ်ယူခဲ့တာဖြစ်ပြီး စုစုပေါင်း ၅.၂၃ ဧကကျယ်ဝန်းတယ်လို့လည်းသိရပါတယ်။ Taylor Swift  ဟာ အားလပ်ရက်တိုင်း ဒီဇိမ်ခံအိမ်ကြီးကိုလာရောက်အပန်းဖြေအနားယူလေ့ရှိပြီး သူမရဲ့အိမ်ကြီးဟာ Rhode Island မှာ တန်ဖိုးအကြီးဆုံး ဇိမ်ခံအိမ်ဖြစ်တယ်လို့လည်းဆိုထားပါတယ်။ Holiday House လို့အသိများတဲ့ Taylor Swift ရဲ့အိမ်ကြီးကို ၁၉၃၀ ခုနှစ်က ဆောက်ခဲ့တာဖြစ်ပြီး အိမ်ကြီးထဲမှာ အိပ်ခန်း ၈ ခန်း ၊ ၃၆ ပေရှည်လျားတဲ့ ဧည့်ခန်း ၊ ၄၅ ပေရှည်လျားတဲ့ နေပူဆာလှုံခန်းတွေရှိတဲ့အပြင် ဒုတိယထပ်မှာလည်း ကြီးမားကျယ်ဝန်းတဲ့ ရေချိုးခန်းအပါ အိပ်ခန်း လေးခန်းနဲ့ ရေချိုးခန်းနှစ်ခန်းပါ အိပ်ခန်းကျယ်ကြီးတစ်ခန်းရှိတယ်လို့သိရပါတယ်။

(၆) Playboy ရဲ့ ဒေါ်လာ သန်း ၁၀၀ တန် ဇိမ်ခံအိမ်ကြီး



တစ်ချိန်တုန်းက Playboy magazine ပိုင်ရှင် Hugh Hefner ရဲ့ဇိမ်ခံအိမ်ကြီးဖြစ်ခဲ့တဲ့ တန်ဖိုးကြီးအိမ်ခြံဝန်းကြီးဟာ Los Angeles မြို့မှာတည်ရှိပြီး တန်ဖိုးငွေ ဒေါ်လာသန်း ၁၀၀ ရှိတယ်လို့သိရပါတယ်။ ဒီအိမ်ကြီးထဲမှာ အိပ်ခန်း ၆ ခန်း ၊ ရေချိုးခန်းအိမ်သာ ၆ ခန်း ၊တင်းနစ်စ်ရိုက်ကွင်း၊ ရေကူးကန်၊ ဧည့်သည်တွေအတွက် အိပ်ခန်းလေးခန်းပါ တည်းခိုအိမ်တို့ပါဝင်ပါတယ်။ ဒီတန်ဖိုးကြီးဇိမ်ခံအိမ်ကြီးဟာ ၂၀၁၆ တုန်းကဆိုရင်‌ ဒေါ်လာသန်း ၂၀၀ နီးပါးပေါက်ခဲ့ပြီး အမေရိကန်အိမ်ခြံမြေဈေးကွက်မှာ တန်ဖိုးအကြီးဆုံးအိမ်ဖြစ်ခဲ့ပါတယ်။

ဒါတွေကတော့ တစ်သက်မှာတစ်ခါနေဖူးရင်တောင် ကျေနပ်စရာကောင်းနေမယ့် တန်ဖိုးကြီးဇိမ်ခံအိမ်တွေအကြောင်းပဲဖြစ်ပါတယ်။ မိတ်ဆွေတို့ရော ဒီလိုအိမ်ကြီးထဲမှာ နေခွင့်ရရင် ဘယ်လိုများဖန်တီးပြောင်းလဲချင်လဲ စိတ်ကူးလေးတွေမျှဝေပေးခဲ့ပါဦးနော်။ 

ဖတ်ရှုမှုအများအဆုံး အိမ်ခြံမြေဗဟုသုတများ

ဘာကြီးလဲဟလို့ ရေရွတ်မိစေမယ့် ဆန်းဆန်းပြားပြား အိမ်များ

JOHNNY DEPP နဲ့ AMBER HEARD ရဲ့ အခင်းဖြစ်ပွားစဉ်က အိမ်ကြီးအကြောင်း

အိမ်ကို လာဘ်လာဘပေါများပြီး ငွေရွှင်စေမယ့် ဖုန်းရွှေနည်းလမ်းများ

မသိသူကျော်သွား၊ သိသူဖော်စား အိမ်တန်ဖိုး ပိုမြင့်စေမယ့် လျို့ဝှက်ချက်များ

Posted By : Ra Wai (ShweProperty.com)