ရန်ကုန်မြို့လယ်ရှိ ကာလအတန်ကြာရပ်နားထားသည့် Yoma Central(ရိုးမစင်ထရယ်) စီမံကိန်း၏ ဆောက်လုပ်ရေးလုပ်ငန်းများကို အဆင့်လိုက် အကောင်အထည်ဖော်ရန် လက်မှတ်ရေးထိုးခဲ့ ကြသည်ဟု ပထမမြန်မာရင်းနှီးမြှုပ်နှံမှုအများပိုင်ကုမ္ပဏီလီမိတက်(FMI) က ထုတ်  ပြန်သည်။

စီမံကိန်းရင်းနှီးမြှုပ်နံမှုနှင့် ပါတ်သက်သည့် သဘောတူညီမှုစာချုပ်ကို အောက်တိုဘာလ (၃) ရက်နေ့က လက်မှတ်ရေးထိုးခဲ့ ကြပြီး ၎င်းကို FMI လီမိတက်နှင့် မိတ်ဖက်ကုမ္ပဏီ Yoma Strategic Holdings Limited (YSH) တို့က ဆောင်ရွက်ခဲ့ကြသည်။

စာချုပ်အရ ရန်ကုန်မြို့၏ အထင်ကရ ဘက်စုံအသုံးပြု ဖွံ့ဖြိုး ရေးစီမံကိန်းတစ်ခုဖြစ်သည့် Yoma Central(ရိုးမစင်ထရယ်) စီမံကိန်းတွင် FMI ကုမ္ပဏီ၏ ရင်းနှီးမြှုပ်နှံမှုအစုရှယ်ယာပိုင်ဆိုင်မှုကို ၁၂ % မှ ၂၀ % အထိ တိုးမြှင့်သွားမည်လည်း ဖြစ်သည်။ သို့ဖြစ်ရာ FMI ၏ မိတ်ဖက်ကုမ္ပဏီ YSH က ကျန်ရှိသည့် အစုရှယ်ယာ ၈၀ % ကို ဆက်လက်ပိုင်ဆိုင်မည်ဖြစ်သည်။

ရင်းနှီးမြှုပ်နှံမှုတိုးမြှင့်ခြင်းနှင့် ပါတ်သက်ပြီး FMI ၏ အမှုဆောင်အရာရှိချုပ်နှင့် အမှုဆောင်ဒါရိုက်တာ ဦးထွန်းထွန်းက 

“ရေရှည်မိတ်ဖက်ဖြစ်တဲ့ Yoma Strategic နဲ့အတူ ဆောက်လုပ်ရေးလုပ်ငန်းများကို အဆင့်ဆင့် ပြန်လည်စတင်နိုင်ရန်   မျှော်လင့်ထားပါတယ်။

Yoma Central မှာ ကျွန်တော်တို့ရဲ့ အစုရှယ်ယာပိုင်ဆိုင်မှု တိုးမြှင့်ခြင်းဟာ စီမံကိန်းအပေါ် ကျွန်တော်တို့ရဲ့ ယုံကြည်မှုနဲ့ Yoma Group ရဲ့ မြန်မာနိုင်ငံအပေါ်ထားရှိတဲ့ ရေရှည်ကတိကဝတ်ကို ထင်ဟပ်စေပါတယ်” ဟု   ဆိုသည်။ 

စီမံကိန်း၏ အခြားအစုရှယ်ယာရှင်များသည် ၎င်းတို့အစုရှယ်ယာများကို FMI နှင့် YSH တို့ထံသို့ သက်ဆိုင်ရာပိုင်ဆိုင်မှုအချိုးအစားအရ စတိတန်ဖိုး(Norminal Amount) ဖြင့် လွှဲပြောင်းပေးသွားမည်ဖြစ်ပြီး ကုမ္ပဏီနှစ်ခုအနေနှင့် စီမံကိန်း၏ လက်ရှိ Commercial Loans တို့အား လျှော့ဈေး  တန်ဖိုးဖြင့် ဝယ်ယူသွားမည်  ဖြစ်သည်ဟု သိရှိရပါသည်။
အဆိုပါချေးငွေများသည် ၂၀၂၆ ခုနှစ်၊ မတ်လ ၃၁ ရက်နေ့အထိ အမေရိကန်ဒေါ်လာ ၆၁.၇ သန်းခန့်ရှိရာ အမေရိကန်ဒေါ်လာ ၅၅ သန်းဖြင့် ဝယ်ယူမည်ဖြစ်သည်ဟု FMI က ဆိုသည်။

ထို့ကြောင့် FMI နှင့် YSH တို့သည် အထက်ပါလုပ်ငန်းစဉ်၏ ကုန်ကျစရိတ်များနှင့် အကျိုးစီးပွားများကိုလည်း ၎င်းတို့၏ အစုရှယ်ယာပိုင်ဆိုင်မှုအချိုးဖြစ်သည့် ၂၀:၈၀ အတိုင်း ခွဲဝေတာဝန်ယူ/ခံစားမည်ဖြစ်သည်ဟု သိရှိရပါသည်။ 

စာချုပ်ပါ အဓိက သဘောတူညီမှုများအရ FMI နှင့် YSH တို့သည် Yoma Central စီမံကိန်းအား ဖော်ဆောင်လျက်ရှိသော Meeyahta Development Limited တွင် လက်ရှိမိတ်ဖက်များ ပိုင်ဆိုင်ထားသည့် စုစုပေါင်း အစုရှယ်ယာ ၄၀ % ကို စတိတန်ဖိုးဖြင့် ဝယ်ယူရရှိမည်ဖြစ်သည်။

ထိုဝယ်ယူမှုတွင် ၂၀၂၆ ခုနှစ်၊ မတ်လ ၃၁ ရက်နေ့အထိ အစုရှယ်ယာရှင်မှ ချေးပေးငွေ အမေရိကန်ဒေါ်လာ ၁၀၆ သန်းခန့်လည်း ပါဝင်မည် ဖြစ်သည်ဟု သိရှိရပါတည်။

Credit By : BETV Business