ဘိုးဘွားပိုင်မြေဆိုတာဟာ ဘိုးစဉ်ဘောင်ဆက်အမွေ ဓားမဦးချ ဆက်ခံနေထိုင်လာကြတဲ့မြေဖြစ်ပြီး ဥပဒေအရ ပြောရရင်လည်း ဥပဒေပုဒ်မ (၄)၊ ပုဒ်မ ခွဲ (၁၀) အရ ဘိုးဘွားမိဘလက်ထက်ကတည်းက ပိုင်ဆိုင်လာတဲ့၊ လွှဲပြောင်းဆက်ခံခွင့်ရှိတဲ့ မြေအမျိုး အစားဖြစ်ပါတယ်။ ဘိုးဘွားပိုင်မြေတွေဟာ အိမ်ခြံမြေလောကမှာ လူကြိုက်များပြီး ဈေးလည်းကောင်းပါတယ်။

ဒီနေ့ခေတ် အခြေအနေအရ အခြားမြေတွေဖြစ်တဲ့ လယ်မြေ၊ ယာမြေ၊ လိုင်စင်မြေ၊ ပါမစ်မြေ၊ မြေငှားဂရမ်မြေ၊ ကျူးကျော်မြေ၊ မြို့ကွက်မြေပုံ၊ မြို့မြေစာရင်း၊ အခွန်လွတ် သာသနာ့မြေ၊ အခွန်လွတ်ဗဒ္ဓသိမ်မြေ စတဲ့ မြေတွေထက် ဘိုးဘွားပိုင်မြေဟာ ခိုင်မာမှု ရှိနေဆဲပါ။ 

ဘိုးဘွားပိုင်မြေကို အမွေဆက်ခံရခြင်းကြောင့်ဖြစ်စေ၊ ရောင်းချဝယ်ယူလိုက်ခြင်းကြောင့်ဖြစ်စေ အမည်ပြောင်းလဲမှုတွေ လုပ်ရပါတယ်။ အမည်ပြောင်းလဲမှုအတွက် ဘယ်လိုလျှောက်ထားရမလဲဆိုတာ ဗဟုသုတရစေဖို့ ဖော်ပြလိုက်ပါတယ်။

ဘိုးဘွားပိုင်မြေကို အမည်ပြောင်း လျှောက်ထားတဲ့အခါ အောက်ပါအတိုင်း အမျိုးအစားခွဲပါတယ်။ 
- အမည်ပြောင်း
- ဦးပိုင်းအမည်ပြောင်း ( ဦးပိုင်တစ်ခုကို ခွဲစိတ်ပြီး အမည်ပြောင်း လျှောက်ထားခြင်း )
-  အမည်ဖြည့်စွက်ခြင်း (မူလအမည်ပေါက်အပြင် နောက်ထပ် လူတစ်ဦး၊ နှစ်ဦးကို ပိုင်ဆိုင်သူအဖြစ် ထပ်ထည့်ခြင်း) 
- အမည်ပယ်ဖျက်ခြင်း (မူလနှစ်ဦး၊ သုံးဦး အမည်ပေါက်မှ တစ်ဦးဦးကို ပယ်ဖျက်ပေးဖို့ လျှောက်ထားခြင်း) 



ဘိုးဘပိုင်မြေ အမည်ပြောင်းလျှောက်ထားရာမှာ အောက်ဖော်ပြပါ စာချုပ်စာတမ်းနဲ့ အထောက်အထားများ လိုအပ်ပါတယ်။
- လျှောက်ထားသူရဲ့ မှတ်ပုံတင် မိတ္တူမှန်
- မြေပုံ၊ မြေရာဇဝင်မူရင်း
-  အမွေဆက်ခံခြင်း ဖြစ်ပါက အဆင့်ဆင့် အမွေဆက်ခံမှု စာချုပ်စာတမ်း၊ မိတ္တူ
- အရောင်းအဝယ် ဖြစ်ပါက အဆင့်ဆင့် အရောင်းအဝယ်ပြုလုပ်သည့် မှတ်ပုံတင်စာချုပ် မိတ္တူမှန်
- တရားရုံး ဒီဂရီ (သို့မဟုတ်) တရာမပုံစံ (၁၀၆)၊ တရားရုံးမှ အမည်ပြောင်းပေးရန် အကြောင်းကြားစာ
- အမည်ပေါက် သေဆုံးပါက သေစာရင်း မိတ္တူမှန်
- အိမ်ထောင်စုဇယား မိတ္တူမှန်
- အဆောက်အဦး ဓာတ်ပုံ
- ရပ်ကွက်အုပ်ချုပ်ရေးမှူး ထောက်ခံချက်

အထက်ဖော်ပြပါ အထောက်အထားတွေနဲ့ အမှုတွဲ တည်ဆောက်ပြီး သတင်းစာမှာ ထည့်ကြော်ငြာရပါမယ်။ ကြောငြာလို့ ကန့်ကွတ်မှု အရှုပ်အရှင်း မရှိရင်တော့ ၁ လ အတွင်း အမည်ပေါက် ဆောင်ရွက်နိုင်ပြီ ဖြစ်ပါတယ်။ 

ဒီအချက်အလက်တွေကတော့ အိမ်ခြံမြေ ဥပဒေရေးရာ ဖော်ပြချက်များထဲမှ ကောက်နုတ်ဖော်ပြခြင်း ဖြစ်ပါတယ်။

စာဖတ်သူ မိတ်ဆွေများအားလုံး အိမ်ကောင်း၊ မြေကောင်းများ ပိုင်ဆိုင်ရပါစေကြောင်း ဆုမွန်ကောင်း တောင်းလိုက်ပါတယ်။