ဘဏ်အာမခံ (Bank Guarantee)

ဘဏ်အာမခံ (Bank Guarantee) ဆိုတာ လုပ်ငန်းတွေအနေနဲ့ဘဏ်တွေဆီကရနိုင်တဲ့ ဘဏ္ဍာရေး အထောက်အကူတွေထဲက အစိတ်အပိုင်း တခုဖြစ်ပါတယ်။ လုပ်ငန်းရဲ့ဝန်ဆောင်မှုပေးရန် တာဝန်ရှိမှုတခုအတွက်၊ ဒါမှမဟုတ် ပေးချေရန် တာဝန်ရှိမှုတခုအတွက် ဘဏ်ကအာမခံပေးရတဲ့သဘောပါ။ ဒီတာဝန်ရှိမှုကို လုပ်ငန်းကပျက်ကွက်ခဲ့ရင် ဘဏ်ကကြားဝင် စိုက်လျော်ပေးရပါတယ်။ ဘဏ်မှအာမခံခြင်းကြောင့်လည်း စီးပွါးရေးလုပ်ငန်းတွေအကြား ယုံကြည်စိတ်ချမှု ရရှိပြီး လုပ်ငန်းဆက်လက် အကောက်အထည် ဖော်နိုင်မှာဖြစ်ပါတယ်။

စီးပွါးရေးလုပ်ငန်းတွေအနေနဲ့ ကုန်ပစ္စည်းဝယ်ယူခြင်း၊ လုပ်ငန်းအတွက် စက်ပစ္စည်း ဝယ်ယူခြင်း၊ ဆောက်လုပ်ခြင်း၊ လုပ်ငန်းတိုးချဲ့ခြင်း၊   ဈေးကွက်ချဲ့ထွင်ခြင်း၊ ချေးငွေရယူခြင်းတို့လုပ်ရလေ့ရှိတာကြောင့် ဘဏ်အာမခံ ကလည်း မြင့်မားတဲ့လိုအပ်ချက်တခု ဖြစ်နေပါတယ်။

လုပ်ငန်းနယ်ပယ်မှာ အသုံးပြုနေကြတဲ့ ဘဏ်အာမခံ အမျိုးအစား အများအပြားရှိပါတယ်။ အဲ့ဒီအထဲက အသုံးများတဲ့ ဘဏ်အာမခံ အမျိုးအစားအချို့ကို ရှင်းပြသွားပါ့မယ်။

 (၁) တင်ဒါအာမခံ (Bid Bond)

ဥပမာ ကျနော်က ဆောက်လုပ်ရေးတင်ဒါတခုကို ဝင်တယ်ဆိုပါစို့ အဆက်အသွယ်အသစ်   ကြောင့်ဖြစ်ဖြစ်၊ ပေါ်လစီမူဝါဒ လိုအပ်ချက်အရပဲ ဖြစ်ဖြစ် တင်ဒါခေါ်တဲ့ အဖွဲ့အစည်း အနေနဲ့ ဘဏ်အာမခံတမျိုး ဖြစ်တဲ့ Bid Bond ကို ပူးတွဲတင်ဖို့ တောင်းဆိုနိုင်ပါတယ်။ ဒီ Bid Bond ဟာ တင်ဒါတန်ဖိုးရဲ့ ရာခိုင်နှုန်းတစုံတရာ တန်ဖိုးရှိရပြီး တင်ဒါပြီးသွားတဲ့အချိန်အထိ တည်မြဲနေရတတ်ပါတယ်။

 (၂) ဆောင်ရွက်မှုအာမခံ (Performance Bond)

အခုကျနော် တင်ဒါအောင် သွားတယ် ဆိုပါစို့။ ဝယ်လက်နဲ့တည်ဆောက်ရေးစာချုပ် ချုပ်ဆိုရပါပြီ။ ဒီနေရာမှာ တည်ဆောက်မှုလုပ်ငန်းကို ပြီးမြောက်အောင် ဆောင်ရွက်ဖို့ တာဝန်ခံတဲ့ အနေနဲ့ ဘဏ်အာမခံနောက်တမျိုးဖြစ်တဲ့ Performance Bond ကိုတောင်းခံတတ်ပါတယ်။ ဒီအာမခံရဲ့ တန်ဖိုးဟာလည်း အများအားဖြင့် ကန်ထရိုက်စာချုပ်တန်ဖိုး ရဲ့ ရာခိုင်နှုန်းတစုံတရာ ဖြစ်နေတတ်ပါတယ်။

 (၃) ကြိုတင်ပေးချေမှုအတွက်အာမခံ (Advance Payment Guarantee)

တခါ စာချုပ်ထဲမှာ ပါဝင်တဲ့ လုပ်ငန်းပြီးမြောက်မှု အဆင်အလိုက် ငွေပေးချေရေး အစီအစဉ် နဲ့အတူ ပိုင်ရှင်ရဲ့ကြိုတင်ပေးချေ မှုများအတွက် ဘဏ်အာမခံနောက်တမျိုး ဖြစ်တဲ့ Advance Payment Guarantee ကိုတောင်းခံတတ်ပါတယ်။ အာမခံကာလဟာ ငွေပေးချေတဲ့အချိန်မှ ဆောက်လုပ်မှုပြီးစီးပြီး ပိုင်ရှင်ကို အပ်နှံတဲ့အချိန်အထိ ဖြစ်ပါတယ်။

 (၄) ပြင်ဆင်ဆောင်ရွက်မှုအာမခံ (Punch Performance Guarantee )

  ဆောက်လုပ်ပြီး ပိုင်ရှင်ကို အပ်နှံတဲ့အခါ သဘောတူစာချုပ်ထားတဲ့ အရည်အသွေးအတိုင်း ပစ္စည်းအတိုင်းဖြစ်ရပါမယ်။ စစ်ဆေးကြည့်လို့ ကွာခြားချက်တွေရှိခဲ့ရင် ကျနော့်အနေနဲ့ တာဝန်ယူပြင်ဆင် ပြုပြင်ပေးရပါမယ်။ အရည်အသွေး လိုအပ်ချက်တွေ ပြင်ဆင်စရာတွေ ထပ်မံလိုအပ်မယ့် အချိန်ကာလတို့ကို စာရင်းလုပ် ဆက်စပ်နေတဲ့ စရိတ်ခန့်မှန်းခြေတွေကို တွက်ချက်ရပါပြီ။ ဒီအပေါ်အခြေခံပြီး ကိုင်ရှင်က ဆောင်ရွက်မှုအာမခံ Punch Performance Guarantee ကိုထပ်မံ တောင်းခံလာနိုင်ပါတယ်။

 (၅) လွှဲပြောင်းပြီးနောက်ပိုင်းအာမခံ (Warranty Bond)

ကျနော့်ရဲ့ ဆောက်လုပ်ရေးပြီးစီး ပါပြီ။ ပိုင်ရှင်ကိုလည်း ပြင်ဆင်စရာတွေ ပြင်ဆင်ပြီး ပစ္စည်းလွှဲပြောင်းပြီးပါပြီ။ ဒါပေမယ့် စာချုပ်အရ ပိုက်ရှင်ကို အာမခံမှုနောက်တခု ပေးရပါမယ်။ ဥပမာတနှစ်အတွင်: ချို့ယွင်းမှုတွေအတွက် အကုန်အကျခံ ပြင်ဆင်ပေးဖို့အာမခံချက်ဖြစ်ပါတယ်။ ဒီအတွက် ဘဏ်အာမခံ Warranty Bond ကိုဘဏ်မှရယူရပါမယ်။

ဒီဥပမာအရ ဘဏ်အာမခံလိုအပ်ချက်တွေကို လုပ်ငန်းအပ်သူ၊ ပစ္စည်းပိုင်ရှင်ဘက်က တောင်းခံနိုင်သလို ဝန်ဆောင်မှုပေးသူ၊ ရောင်းသူဖက်ကလည်း လုပ်ငန်းအပ်သူရဲ့ ဘဏ္ဍာငွေတောင့်တင်း ခိုင်မာမှုအတွက် ဘဏ်အာမခံ ပြန်လည်တောင်းခံ နိုင်ပါတယ်။

အထက်မှာ ဖေါ်ပြထားတဲ့ ဘဏ်အာမခံတွေလိုပဲ Credit Line Guarantee နဲ့ Standby Letter of Credit တို့ဟာလည်း စီးပွါးရေးနယ်ပယ်မှာ အသုံးများတဲ့ ဘဏ်အာမခံတွေပဲဖြစ်ပါတယ်။

သတိပြုရမှာက စီးပွါးရေး သဘောတူညီချက်တွေမှာ ဘဏ်အာမခံလိုအပ်ချက် ပုံစံနဲ့ အာမခံမှာ ပါဝင်တဲ့ အချက်အလက်တွေ ကွားခြားတတ်ပါတယ်။ ဒါကလည်း စီးပွါးရေးနယ်ပယ်၊ စီးပွါးရေး အခြေအနေ နဲ့ ဆက်ဆံရေး ပေါ်တွေမှာမူတည်ပါတယ်။ နိုင်ငံတကာစီးပွါးရေး လုပ်ငန်းကြီးတွေ အနေနဲ နိုင်ငံတကာအဆင့်ဘဏ် တွေက ထုတ်ပေးတဲ့ ဘဏ်အာမခံတွေကို သာ လက်ခံလေ့ရှိပါတယ်။ ဘဏ်တွေအနေနဲ့ကလည်း ဘဏ်မှ အာမခံပေးရမယ့် လုပ်ငန်းအဖွဲ့အစည်းရဲ့ ငွေကြေးခိုင်မာ တောင့်တင်းမှု နဲ့ ဆုံးရှုံးနိုင်မှုအန္တရာယ်အလားအလာ တို့ကို စီစစ်သုံးသပ်ပြီးမှသာ ဘဏ်မှအာမခံချက်ကို ထုတ်ပေးတာဖြစ်ပါတယ်။

အဓိကကတော့ ဘဏ်လုပ်ငန်းဖွံ့ဖြိုးတိုးတက်ပြီး နိုင်ငံတကာအဆင့်ဘဏ်တွေနဲ့ ဆက်ဆံရေးရှိနေဖို့ဖြစ်ပါတယ်။

Ref : W&A Business and Finance

Photo Credit : financialexpress

Posted By : Wai Phyoe